ଭଞ୍ଜନଗର,୧୨।୩: ଗଞ୍ଜାମ ଜିଲା ତାରସିଂ ଥାନା ଅଞ୍ଚଳରେ ଚୋରି ବଢ଼ିବାରେ ଲାଗିଛି। ଏଭଳି ସ୍ଥିତିରେ ଗୁରୁବାର ରାତିରେ ଗେରେଡ଼ା ନିକଟ ଏକ ସାହିରେ ଜଣେ ବ୍ୟାଙ୍କ କର୍ମଚାରୀ ଓ ତାଙ୍କ କାର୍ ଡ୍ରାଇଭରଙ୍କୁ ଚୋର ଭାବି କିଛି ଲୋକ ଅଟକ ରଖିଥିଲେ। ପୋଲିସ ପହଞ୍ଚି ଲୋକଙ୍କ ସହ ଆଲୋଚନା କରୁଥିବା ବେଳେ କୌଣସି ଏକ କଥାକୁ ନେଇ ପୋଲିସ ଓ ଗ୍ରାମବାସୀଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା। ପରେ ପୋଲିସ ଲାଠିଚାଳନା କରିବାରୁ କେତେଜଣ ଯୁବକ ଆହତ ହୋଇଛନ୍ତି। ସେହିପରି ଜଣେ ଏଏସ୍ଆଇଙ୍କ ସମେତ ୩ ପୋଲିସ କର୍ମଚାରୀ ମଧ୍ୟ ଆହତ ହୋଇଛନ୍ତି। ପୋଲିସକୁ ଆକ୍ରମଣ କରିଥିବା ଅଭିଯୋଗରେ ସମ୍ପୃକ୍ତ ଅଞ୍ଚଳର ୨୦ ଜଣଙ୍କ ନାମରେ ନଂ.୫୮/୨୧ରେ ମାମଲା ରୁଜୁ ହୋଇଛି। ପୋଲିସ ଶୁକ୍ରବାର ୩ ଜଣଙ୍କୁ ଗିରଫ କରିଛି। ଗୁରୁବାର ଅପରାହ୍ନରେ ଆସିକା ଅଞ୍ଚଳର ବ୍ୟାଙ୍କ କର୍ମଚାରୀ ଜଣକ ଗେରେଡ଼ାସ୍ଥ ତାଙ୍କ ବନ୍ଧୁଙ୍କ ଘରକୁ କାର୍ରେ ଯାଇଥିଲେ। କାର ଚାଳକ ବାହାରେ ଅପେକ୍ଷା ନ କରି ଗାଡ଼ି ଧରି ଗାଁରେ ବୁଲିଥିଲେ। ଗ୍ରାମବାସୀ ସନ୍ଦେହ କରି କାର ଚାଳକଙ୍କୁ ଅଟକାଇ ଥିଲେ। ବ୍ୟାଙ୍କ କର୍ମଚାରୀ ଜଣଙ୍କ ଏହା ଜାଣିବା ପରେ ଘଟଣା ସ୍ଥଳରେ ପହଞ୍ଚି ନିଜ ପରିଚୟ ଦେଇଥିଲେ। ହେଲେ କିଛି ଲୋକ ବ୍ୟାଙ୍କ କର୍ମଚାରୀ ଓ ତାଙ୍କ ଡ୍ରାଇଭରଙ୍କୁ ଚୋର ଭାବି ଦୁର୍ବ୍ୟବହାର କରିବା ସହ ଧସ୍ତାଧସ୍ତି କରିଥିଲେ। ପୋଲିସ ପହଞ୍ଚିବାରୁ ସମସ୍ୟା ସମାଧାନ ହେବା ବଦଳରେ ବଢ଼ିଯାଇଥିଲା। ବିଳମ୍ବିତ ରାତିରେ ଅଧିକ ଫୋର୍ସ ପହଞ୍ଚିବା ପରେ ସ୍ଥିତି ନିୟନ୍ତ୍ରଣକୁ ଆସିଥିଲା।
