ଜଗନ୍ନାଥପ୍ରସାଦ,୨୫।୪(ଡି.ଏନ.ଏ.): ବିଦ୍ୟୁତ୍କାଟ ଓ ଲୋ ଭୋଲ୍ଟେଜକୁ ନେଇ ଜଗନ୍ନାଥପ୍ରସାଦ ଅଞ୍ଚଳରେ ଅସନ୍ତୋଷ ଦେଖାଦେଇଛି। ଶନିବାର ବିଳମ୍ବିତ ରାତିରେ ବିଦ୍ୟୁତ୍ କାର୍ଯ୍ୟାଳୟଠାରେ ଦୁଇ ଗ୍ରାମବାସୀ ଓ ବିଦ୍ୟୁତ୍ କର୍ମଚାରୀଙ୍କ ମଧ୍ୟରେ ଉତ୍ତେଜନା ସୃଷ୍ଟି ହୋଇଥିଲା। ଫଳରେ ୨ ଗ୍ରାମର ଉପଭୋକ୍ତା ମିଶି ୮ ଜଣ ବିଦ୍ୟୁତ୍ କର୍ମଚାରୀଙ୍କୁ ଗ୍ରାମକୁ ଉଠାଇ ନେଇଥିଲେ। ଦୀର୍ଘ ୮ ଘଣ୍ଟା ବନ୍ଧକ ପରେ ବିଦ୍ୟୁତ୍ ଉପଖଣ୍ଡ ଅଧିକାରୀ ଓ ଗ୍ରାମର ବୁଦ୍ଧିଜୀବୀଙ୍କ ସହ ଆଲୋଚନା ପରେ ପୋଲିସ ଉପସ୍ଥିତିରେ କର୍ମଚାରୀଙ୍କୁ ଛାଡିଥିଲେ।
ସୂଚନା ମୁତାବକ, ଜଗନ୍ନାଥପ୍ରସାଦ ଅଞ୍ଚଳରେ ବେଶ୍ କିଛି ଦିନ ହେବ ବିଦ୍ୟୁତ୍ ବିଭାଗର ତୁହାକୁ ତୁହା ବିଦ୍ୟୁତ୍କାଟ୍ ହେଉଥିଲା। ଶନିବାର ମଧ୍ୟରାତ୍ରିରେ ରାଣୀଭୂମି ଏବଂ ଆଜ୍ଞାପ୍ରସାଦ ଗ୍ରାମର ୧୦୦ ରୁ ଊର୍ଦ୍ଧ୍ୱ ଗ୍ରାମବାସୀ ଏକତ୍ରିତ ହୋଇ ଜଗନ୍ନାଥପ୍ରସାଦସ୍ଥିତ ବିଦ୍ୟୁତ୍ ଷ୍ଟ୍ରକ୍ଚରଠାରେ ପହଞ୍ଚତ୍ ବିଦ୍ୟୁତ୍ କାହିଁକି ନାହିଁ ପ୍ରଶ୍ନ କରିବାରୁ ସେଠାରେ ଥିବା ବିଭାଗର ସୁପରଭାଇଜର ଅତିଷ୍ଠ ହୋଇ ପଡ଼ିଥିଲେ। ଗ୍ରାମର ଉପଭୋକ୍ତା ମିଶି ରାଣୀଭୂମି ଗ୍ରାମକୁ ୨ ଜଣ ଓ ଆଜ୍ଞାପ୍ରସାଦ ଗ୍ରାମକୁ ୬ଜଣ ବିଦ୍ୟୁତ କର୍ମଚାରୀଙ୍କୁ ଘଟଣାସ୍ଥଳରୁ ନିଜ ଗ୍ରାମକୁ ନେଇଯାଇଥିଲେ। ରାତି ତମାମ ଗ୍ରାମବାସୀଙ୍କୁ ଛାଡ଼ିଦେବାକୁ କର୍ମଚାରୀମାନେ ଗୁହାରି କଲା ପରେ ମଧ୍ୟ ଗ୍ରାମବାସୀ ତାଙ୍କୁ ଯିବାକୁ ସୁଯୋଗ ଦେଇନଥିଲେ। ବେଲଗୁଣ୍ଠା ଜେଇ ରଞ୍ଜନ ମଲ୍ଲିକ, ନିର୍ବାହୀ ଯନ୍ତ୍ରୀ ଜଗଜିତ ଦାସ ମହାପାତ୍ର, ଏସ୍ଡିଓ ଆଦିତ୍ୟ କୁମାର ଦାସ ଜଗନ୍ନାଥପ୍ରସାଦ ଥାନାଧିକାରୀଙ୍କୁ ଜଣାଇଥିଲେ। ପୋଲିସ ଟିମ ରବିବାର ସକାଳ ୬ଟାରେ ଗ୍ରାମରେ ପହଞ୍ଚତ୍ ବୁଝାଶୁଝା କରିଥିଲେ ମଧ୍ୟ ଗ୍ରାମବାସୀ ରାଜି ହୋଇନଥିଲେ। ଶେଷରେ ବିଦ୍ୟୁତ୍ ବିଭାଗର ଅଧିକାରୀମାନେ ୧୦ଦିନ ମଧ୍ୟରେ ଅସୁବିଧା ପୂରଣ ପାଇଁ ଆଶ୍ୱାସନା ଦେବାରୁ ସମସ୍ତ ବିଦ୍ୟୁତ୍ କର୍ମଚାରୀଙ୍କୁ ଗଁା ଲୋକେ ଛାଡିଥିଲେ।