କେନ୍ଦୁଝର,୫।୧୦(ନରେଶ ଚନ୍ଦ୍ର ପଟ୍ଟନାୟକ): କେନ୍ଦୁଝର ଜିଲା ବାଂଶପାଳ ବ୍ଲକ ଏକ ଆସିବାସୀ ଅଧ୍ୟୁଷିତ ଅଞ୍ଚଳ ହୋଇଥିବା ବେଳେ ନୟାକୋଟ ଥାନା ଅନ୍ତର୍ଗତ ବାଂଶପାଳ ଠାରେ ରହିଛି ଏକ ସରକାରୀ ମଦ ଦୋକାନ। ଏହି ମଦ ଦୋକାନର କର୍ମଚାରୀ ଦିନ ଦ୍ୱି ପହରେ ଏକ ଟିଭିଏସ ବାଇକ ନଂ ଜେଏଚ୦୬ଜି ୧୬୭୩ ଯୋଗେ କ୍ଷୀର ବିକ୍ରି କଲାଭଳି ବିଦେଶୀ ମଦକୁ ପ୍ରତେକ ଦିନ ଗାଁର ପ୍ରତେକ ଦୋକାନକୁ ଯୋଗାଇଥାଆନ୍ତି। ଯାତ୍ରାଗ୍ରାମର ମହିଳାମାନେ ଅନେକ ଥର ବାରଣ କରିଥିବା ସତ୍ତ୍ୱେ ମଧ୍ୟ ଏହି ଦୋକାନର କର୍ମଚାରୀ ତାହାକୁ କର୍ଣ୍ଣପାତ କରୁ ନ ଥିଲେ। ଗୁରୁବାର ସକାଳୁ ବାଂଶପାଳ ମଦ ଦୋକାନର କର୍ମଚାରୀ ଯାତ୍ରାଗ୍ରାମ ଦେଇ ବିଦେଶୀ ମଦ ନେଇ ଯାଉଥିବା ବେଳେ ଗ୍ରାମବାସୀ ଅଟକ ରଖିଥିଲେ l ଅଟକ ରଖି ନୟାକୋଟ ପୋଲିସକୁ ଜଣାଇଥିଲେ। ନୟାକୋଟ ପୋଲିସ ପହଞ୍ଚି ତେଲକୋଇ ଅବକାରୀ ବିଭାଗକୁ ଜଣାଇଥିଲେ। ଅବକାରୀ ବିଭାଗର ଥାନା ଅଧିକାରୀ ଘଟଣାସ୍ଥଳରେ ବହଞ୍ଚି ତିନି ପେଟି ବିଦେଶୀ ମଦ, ଏକ ଟିଭିଏସ ବାଇକ ଜବତ କରିଛି। ମଦ ନେଇ ଯାଉଥିବା କର୍ମଚାରୀମାନଙ୍କୁ ତେଲକୋଇ ଅବକାରୀ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି। । ତେବେ ଏନେଇ ପୋଲିସ କିଛି କହୁ ନ ଥିବା ବେଳେ ଏଭଳି କାରବାରକୁ ସ୍ଥାନୀୟ ବୁଦ୍ଧିଜୀବୀ ଓ ମହିଳାମାନେ ତୀବ୍ର ବିରୋଧ କରୁଛନ୍ତି। ଏଭଳି ମଦ ଦୋକାନର ମାଲିକ ବେନିୟମ ଭାବେ ଗାଁକୁ ଗାଁ ମଦ ଯୋଗାଉଥିବା ଯୋଗୁଁ ତାହାର ଲାଇସେନ୍ସକୁ ବାତିଲ କରିବାକୁ ଗ୍ରାମବାସୀ ଦାବି କରଛନ୍ତି।