ହାଇଦ୍ରାବାଦ, ୨୯।୬- ପ୍ରାଣୀଙ୍କ ପ୍ରତି ମଣିଷର ବର୍ବରତାର ଆଉ ଏକ ଚିତ୍ର ଏବେ ସାମ୍ନାକୁ ଆସିଛି। ତେଲଙ୍ଗାନାର ଖାମ୍ମମ ଜିଲାରେ ଗୋଟିଏ ମାଙ୍କଡ଼କୁ ଗ୍ରାମବାସୀ ଫାଶୀ ଦେଇ ଦେଇଥିବାର ଭିଡ଼ିଓ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଭିଡିଓରେ ମାଙ୍କଡଟି ଜୀବନ ରକ୍ଷା ପାଇଁ ଛଟପଟ ହେଉଥିବାବେଳେ ୩ ଜଣ ଲୋକ ଏହାର ମଜା ଉଠାଉଥିବାର ଦେଖିବାକୁ ମିଳିଛି। ଭେମସୁରୁ ମଣ୍ଡଳର ଅମ୍ମାପଲିମ ଗ୍ରାମରେ ଶୁକ୍ରବାର ଘଟିଥିବା ଏହି ଘଟଣାରେ ସ୍ଥାନୀୟ ପୋଲିସ ୩ଜଣଙ୍କୁ ଗିରଫ କରିଥିବା ଜଣାପଡ଼ିଛି। ଘଟଣାରୁ ପ୍ରକାଶ ଯେ, ଶୁକ୍ରବାର ଦଳେ ମାଙ୍କଡ଼ ଗ୍ରାମରେ ପଶି ବାଡ଼ି ବଗିଚାରେ କ୍ଷତି ପହଞ୍ଚାଇଥିଲେ। ଏହାପରେ ମୁଖ୍ୟ ଅଭିଯୁକ୍ତ ସାଧୁ ଭେଙ୍କଟେଶ୍ୱର ରାଓ ଓ ଅନ୍ୟ ୨ଜଣ ଗ୍ରାମବାସୀ ମାଙ୍କଡ଼କୁ ବାଡ଼ି ଧରି ଘଉଡ଼ାଇଥିଲେ। ଏହି ସମୟରେ ଗୋଟିଏ ମାଙ୍କଡ଼ ତଳେ ପଡ଼ି ଆହତ ହୋଇଥିଲା। ଏହାପରେ ୩ ଜଣ ଗ୍ରାମବାସୀ ମାଙ୍କଡ଼ ବେକରେ ରଶି ବାନ୍ଧି ତାକୁ ଗଛରେ ଝୁଲାଇ ଦେଇଥିଲେ। ମାଙ୍କଡ଼ଟି ଜୀବନ ରକ୍ଷା ପାଇଁ ଛଟପଟ ହେଉଥିବା ଭିଡିଓରୁ ଜଣାପଡ଼ିଛି। ସ୍ଥାନୀୟ ଫରେଷ୍ଟ ଅଫିସରଙ୍କ କହିବା ଅନୁଯାୟୀ, ମାଙ୍କଡଟି ମରିଯାଇଥିବା ଭାବି ଗ୍ରାମବାସୀମାନେ ତାକୁ ବାନ୍ଧି ଝୁଲାଇ ଦେଇଥିଲେ। ଅନ୍ୟ ମାଙ୍କଡ଼ମାନେ ଏହା ଦେଖିଲେ ଆଉ ଭୟରେ ଗ୍ରାମକୁ ଆସିବେନି ବୋଲି ଗ୍ରାମବାସୀ ଭାବି ଏଭଳି କରିଥିଲେ। ମାଙ୍କଡ଼ଟି ଛଟପଟ ହେଉଥିବାବେଳେ ଏହାର ଭିଡିଓ କରାଯାଇ ହ୍ବାଟସଆପ୍ ଗ୍ରୁପ୍ରେ ଛଡ଼ା ଯାଇଥିଲା। ଏହାପରେ ବନ ବିଭାଗ ଏହି ଘଟଣା ଜାଣିବା ପରେ ତଦନ୍ତ କରି ୩ ଜଣଙ୍କୁ ଗିରଫ କରିଥିଲା। ଉଲ୍ଲେଖଯୋଗ୍ୟ, କିଛିଦିନ ତଳେ କେରଳରେ ଏକ ଗର୍ଭଣୀ ହାତୀକୁ କିଛି ଦୁବୃର୍ତ୍ତ ସପୁରୀ ମଧ୍ୟରେ ବାଣ ପୁରାଇ ଖାଇବାକୁ ଦେଇଥିଲେ। ହାତୀଟି ସପୁରୀ ଖାଇବା ପରେ ବିସ୍ଫୋରଣରେ ଏହାର ପାଟିରେ ବିରାଟ କ୍ଷତ ସୃଷ୍ଟି ହୋଇଥିଲା ଏବଂ କିଛିଦିନ ପରେ ପ୍ରାଣ ହରାଇଥିଲା।
