କୋରାପୁଟ/ଲମତାପୁଟ,୨ା୫(ସ୍ବ.ପ୍ର/ଡି.ଏନ.ଏ.): କୋରାପୁଟ ଜିଲା ଲମତାପୁଟ ବ୍ଲକର କୁମାରଗନ୍ଧଣାସ୍ଥିତ ଏକ ଚୂନମାଟି ଖଣି ଖନନକୁ ବିରୋଧ କରି ସୋମବାର ଗ୍ରାମବାସୀ ପୋଲିସ ଉପରକୁ ଆକ୍ରମଣ କରିଛନ୍ତି। ନନ୍ଦପୁର ଥାନା ଅଧିକାରୀଙ୍କୁ ଏକ ଖାଲରେ ପକାଇ ଦେଇଛନ୍ତି। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ପ୍ରକାଶ ପାଇଛି।
ଖବରରୁ ଜଣାପଡିଛି, ଜିଲାର ଲମତାପୁଟ ବ୍ଲକ ଅନ୍ତର୍ଗତ କୁମାରଗନ୍ଧଣା ପଞ୍ଚାୟତରେ ଥିବା ଚୂନମାଟି ଖଣିକୁ ଯେଉଁ କମ୍ପାନୀ ଖନନ କରୁଛି, ସେ ଅଞ୍ଚଳବାସୀଙ୍କ ସହ ଆଲୋଚନା କରି ଅଞ୍ଚଳରେ ଉନ୍ନୟନମୂଳକ କାର୍ଯ୍ୟ କରିବା ପରେ ଖନନ ଆରମ୍ଭ କରିବାକୁ ଖଣି ପାର୍ଶ୍ୱବର୍ତ୍ତୀ ଗ୍ରାମବାସୀ ଦାବି କରିଛନ୍ତି। ସୋମବାର କୁମାର ଗନ୍ଧଣା ପଞ୍ଚାୟତରେ ଚୂନମାଟି ଖଣି ଖନନ ଜାଗାକୁ କମ୍ପାନୀର ସୁରକ୍ଷାକର୍ମୀ ଯାଇଥିଲେ। ସେଠାରେ ପ୍ରାୟ ଶତାଧିକ ଗ୍ରାମବାସୀ ପହଞ୍ଚତ୍ ସୁରକ୍ଷାକର୍ମୀଙ୍କୁ ଅଟକାଇ ଧମକଚମକ ଦେଇଥିଲେ। ଖବରପାଇ ନନ୍ଦପୁର ପୋଲିସ ଘଟଣାସ୍ଥଳରେ ପହଞ୍ଚତ୍ ଉଭୟଙ୍କୁ ବୁଝାଶୁଝା କରୁଥିବା ବେଳେ ହଠାତ୍ ଗ୍ରାମବାସୀ ମାରଣାସ୍ତ୍ର ଦେଖାଇ ଭୟଭୀତ କରି ନନ୍ଦପୁର ଥାନା ଅଧିକାରୀ ପ୍ରଫୁଲ୍ଲ କୁମାର ଲାକ୍ରାଙ୍କୁ ଏକ ଖାଲରେ ପକାଇ ଦେଇଥିଲୋ ଏ ନେଇ ପୋଲିସ ପୁଣି ଥରେ ଗ୍ରାମବାସୀଙ୍କୁ ବୁଝାଶୁଝା କରିଥିଲେ ମଧ୍ୟ ସେମାନେ କିଛି ଶୁଣି ନ ଥିଲେ। ଗ୍ରାମବାସୀ ପୋଲିସଙ୍କୁ ଆକ୍ରମଣ କରିଥିଲେ । ଏହି ଘଟଣାରେ ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇଛି। ପୋଲିସ ଉପରକୁ ଆକ୍ରମଣ କରିଥିବା ପ୍ରାୟ ୫୦ ଜଣଙ୍କ ନାମରେ ମାମଲା ରୁଜୁ ହୋଇଛି।
ସୂଚନାଯୋଗ୍ୟ, ଗତ କିଛି ଦିନ ତଳେ ନନ୍ଦପୁର ବ୍ଲକର ପାଡୁଆ ଥାନା ଅଞ୍ଚଳରେ ଅବକାରୀ ଚଢାଉ ସମୟରେ ଗଞ୍ଜେଇ ମାଫିଆ ଓ ଗ୍ରାମବାସୀ ଅବକାରୀ ଏବଂ ପୋଲିସ କର୍ମଚାରୀଙ୍କୁ ଆକ୍ରମଣ କରିବା ସହିତ ସେମାନଙ୍କୁ ଦୀର୍ଘ ୮ ଘଣ୍ଟା ଅଟକ ରଖିଥିଲେ।