ରାଇରଙ୍ଗପୁର,୨୦ା୧୨(ମନୋରଞ୍ଜନ ତିରିଆ): ବାମନଘାଟୀ ଉପଖଣ୍ଡ ଅଧୀନସ୍ଥ ବିଜାତଳା ବ୍ଲକ ଚଢ଼େଇପାହାଡ଼ି ପଞ୍ଚାୟତର ୪ ଗ୍ରାମ ଯଥା- ବଡ଼ଜାରୀ, କିତାବେଡ଼ା, ଡାହୁପାଣି ଏବଂ ଫୁଲବାଡ଼ିଆର ଲୋକମାନେ ବଡ଼ଜାରୀଠାରୁ କିତାବେଡ଼ା ପର୍ଯ୍ୟନ୍ତ ରାସ୍ତାକୁ ପିଚୁ କରାଯିବା ପାଇଁ ଅନୁମତି ଦେବାକୁ ରାଇରଙ୍ଗପୁର ବନାଞ୍ଚଳ ଅଧିକାରୀଙ୍କର ଦ୍ୱାରସ୍ଥ ହୋଇଛନ୍ତି। ବଣପାହାଡ଼ ଘେରା ଚଢ଼େଇପାହାଡ଼ି ପଞ୍ଚାୟତ ଅନ୍ତର୍ଗତ ବଡ଼ଜାରୀ, କିତାବେଡ଼ା, ଡାହୁପାଣି ଏବଂ ଫୁଲବାଡ଼ିଆ ଗ୍ରାମ ଏବେ ବି ବିକାଶଠାରୁ ଦୂରରେ ରହିଛନ୍ତି। ଗମନାଗମନ ପାଇଁ ଆବଡ଼ାଖାବଡ଼ା ମାଟି ରାସ୍ତା ହିଁ ଭରସା। ୫/୬ ମାସ ତଳେ ଏଠାକାର ଜନସାଧାରଣ ରାସ୍ତା ମରାମତି ପାଇଁ ଜଲାପାଳ ବିନୀତ ଭରଦ୍ୱାଜଙ୍କର ଦ୍ୱାରସ୍ଥ ହୋଇଥିଲେ। ଏହାପରେ ପରେ ଫୁଲବାଡ଼ିଆ ଗ୍ରାମବାସୀଙ୍କ ତରଫରୁ ତତ୍କାଳୀନ ୫-ଟି ସଚିବ ତଥା ଏବେକାର ୫-ଟି ଅଧ୍ୟକ୍ଷ କାର୍ତ୍ତିକ ପାଣ୍ଡିଆନ୍ଙ୍କୁ ବିଶୋଇ ଗସ୍ତ ସମୟରେ ସାକ୍ଷାତ କରି ଜନସାଧାରଣଙ୍କ ଯୋଗାଯୋଗ ନିମନ୍ତେ ରହିଥିବା ରାସ୍ତାର ଉନ୍ନତିକରଣ କରାଯିବା ନିମନ୍ତେ ଦୃଷ୍ଟି ଆକର୍ଷଣ କରିଥିଲେ। ଇତିମଧ୍ୟରେ ବଡ଼ଜାରୀଠାରୁ କିତାବେଡ଼ା ପର୍ଯ୍ୟନ୍ତ ରାସ୍ତାକୁ ପ୍ରଧାନମନ୍ତ୍ରୀ ଗ୍ରାମ୍ୟସଡ଼କ ଯୋଜନା(ପିଏମ୍ଜିଏସ୍ଓ୍ବାଇ)ରେ ଅନ୍ତର୍ଭୁକ୍ତ କରାଯାଇ ଏହାର ରାସ୍ତା ପିଚୁ କାମଡ଼ିସେମ୍ବର ପହିଲାରୁ ସମ୍ପୃକ୍ତ ଠିକାଦାର ହରିହର ଗିରିଙ୍କ ଦ୍ୱାରା ଆରମ୍ଭ ହୋଇଛି। ମାତ୍ର ପିଏମ୍ଜିଏସ୍ଓ୍ବାଇ ଯୋଜନାରେ ରାସ୍ତାର ନିର୍ମାଣ କାର୍ଯ୍ୟ କିଛି ଦିନ ଚାଲିବା ପରେ ବନାଞ୍ଚଳ ଯୋଗୁ ଏହାର ନିର୍ମାଣ କାର୍ଯ୍ୟକୁ ବନ ବିଭାଗ ତରଫରୁ ବନ୍ଦ କରାଯାଇଛି। ଆଜି ପୁନର୍ବାର ପିଏମ୍ଜିଏସ୍ଓ୍ବାଇରେ ରାସ୍ତାର ନିର୍ମାଣ କାମକୁ ଚାଲୁ ରଖାଯିବା ନିମନ୍ତେ ଉକ୍ତ ରାସ୍ତା ଉପରେ ଦୈନନ୍ଦିନ ନିର୍ଭର କରୁଥିବା ୪ଟି ଗ୍ରାମର ଲୋକମାନେ ମିଳିତ ଭାବେ ରାଇରଙ୍ଗପୁରଠାରେ ବନାଞ୍ଚଳ ଅଧିକାରୀଙ୍କୁ ଲିଖିତ ଅନୁରୋଧ କରିଛନ୍ତି। ଡାହୁପାଣି ବନସୁରକ୍ଷା ସମିତି, ବଡ଼ଜାରୀ ବନସୁରକ୍ଷା ସମିତି, ଫୁଲବାଡ଼ିଆ ବନସୁରକ୍ଷା ସମିତି ଓ କିତାବେଡ଼ା ବନ ସୁରକ୍ଷାସମିତିର ସଭ୍ୟସଭ୍ୟାମାନେ ରାଇରଙ୍ଗପୁରଠାରେ ବନାଞ୍ଚଳ ଅଧିକାରୀ ଜ୍ୟୋତିରଞ୍ଜନ ସେନାପତିଙ୍କୁ ସାକ୍ଷାତ କରିଛନ୍ତି। ପିଏମ୍ଜିଏସ୍ଓ୍ବାଇରେ ବଡ଼ଜାରୀ-କିତାବେଡ଼ା ରାସ୍ତାର ନିର୍ମାଣ ପାଇଁ ଅନୁମତି ଦେବାକୁ ବନାଞ୍ଚଳ ଅଧିକାରୀ ଶ୍ରୀ ସେନାପତିଙ୍କୁ ବଡ଼ଜାରୀ, ଫୁଲବାଡ଼ିଆ, ଡାହୁପାଣି, କିତାବେଡ଼ା ଗ୍ରାମବାସୀଙ୍କ ତରଫରୁ ଲକ୍ଷ୍ମୀ ସିଂ, ରବିନ୍ଦ୍ର ସିଂ, ଗୁରୁ ଦେହୁରୀ, ଗୋବର୍ଦ୍ଧନ ଦେହୁରୀ, ଲାଲ ମୁଣ୍ଡା, ସନାତନ ମୁଣ୍ଡା, ସୁରାଇ ଆଲଡ଼ା, ଯଦୁନାଥ ମୁମୁ, ଖେଲାରାମ ମୁର୍ମୁ ପ୍ରମୁଖ ଅନୁରୋଧ କରିଛନ୍ତି।