କୁର୍ନୋଲ, ୨୯।୬- ଆନ୍ଧ୍ରପ୍ରଦେଶର କୁର୍ନୋଲ ଜିଲାରେ ଏକ ଚରମ ଅମାନବୀୟ ଘଟଣା ଏବେ ସାମ୍ନାକୁ ଆସିଛି। ଜଣେ ଗର୍ଭବତୀଙ୍କ ମୃତ୍ୟୁ ହେବାପରେ ଗ୍ରାମବାସୀ ଓ ପରିବାର ଲୋକେ ତାଙ୍କର ଶବକୁ ଅନ୍ତିମ ସଂସ୍କାର କରିବା ବଦଳରେ ଜଙ୍ଗଲ ମଧ୍ୟରେ ଗଛରେ ବାନ୍ଧି ଦେଇ ପଳାଇ ଆସିଛନ୍ତି। ଅନ୍ଧବିଶ୍ୱାସର ବଶବର୍ତ୍ତୀ ହୋଇ ଗ୍ରାମବାସୀ ଏଭଳି କରିଥିବା ଜଣାପଡ଼ିଛି। ଘଟଣାରୁ ଜଣାପଡ଼ିଛି ଯେ, କୁର୍ନୋଲ ଜିଲାର ରୁଦ୍ରଭରମ ଅଞ୍ଚଳର ଧମେନ୍ଦ୍ର ନାମକ ଜଣେ ବ୍ୟକ୍ତିଙ୍କ ସ୍ତ୍ରୀ ଲାବଣ୍ୟ ୯ ମାସର ଗର୍ଭବତୀ ଥିଲେ। ପ୍ରସବ ଯନ୍ତ୍ରଣା ହେବାରୁ ଗତ ଶୁକ୍ରବାର ତାଙ୍କୁ ହସ୍ପିଟାଲ ନିଆଯାଇଥିଲା। ତେବେ ସେଠାରେ ପ୍ରସବ ପୂର୍ବରୁ ମହିଳାଙ୍କ ମୃତ୍ୟୁ ହୋଇଯାଇଥିଲା। ଏହାପରେ ମହିଳାଙ୍କ ପରିବାର ଲୋକେ ଶବକୁ ଧରି ଗ୍ରାମକୁ ଆସିଥିଲେ। ରୀତିନୀତି ଅନୁଯାୟୀ ଅନ୍ତିମ ସଂସ୍କାର ପାଇଁ ପରିବାର ଲୋକେ ପ୍ରସ୍ତୁତି ଆରମ୍ଭ କରିଦେଇଥିବାବେଳେ ଗ୍ରାମବାସୀମାନେ ଏହାକୁ ବିରୋଧ କରିଥିଲେ। ‘ଯେହେତୁ ମହିଳାଙ୍କ ପେଟରେ ସନ୍ତାନ ରହିଛି ତେଣୁ ତାଙ୍କର ଅନ୍ତିମ ସଂସ୍କାର ହୋଇପାରିବ ନାହିଁ। ଯଦି ଅନ୍ତିମ ସଂସ୍କାର କରାଯାଏ ତେବେ ଗ୍ରାମ ପାଇଁ ଅମଙ୍ଗଳ ହେବ’ ବୋଲି ଗ୍ରାମର ମୁଖିଆ କହିଥିଲେ। ଏହାପରେ ପରିବାର ଲୋକ ଓ ଗ୍ରାମବାସୀ ମିଶି ମହିଳାଙ୍କ ଶବକୁ ଜଙ୍ଗଲକୁ ନେଇ ଏକ ରଶି ସହାୟତାରେ ଗଛରେ ବାନ୍ଧି ଦେଇ ପଳାଇ ଆସିଥିଲେ। ତେବେ ରବିବାର ଦିନ ଏହି ଘଟଣା ସାମ୍ନାକୁ ଆସିଥିଲା ଯେତେବେଳେ ଅନ୍ୟ କିଛି ଗ୍ରାମର ଲୋକ ଜଙ୍ଗଲରେ ଗଛରେ ବନ୍ଧା ହୋଇଥିବା ଅବସ୍ଥାରେ ମହିଳାଙ୍କ ଶବ ଦେଖିଥିଲେ। ଏହି ଭୟଙ୍କର ଦୃଶ୍ୟକୁ ଦେଖି ଗ୍ରାମବାସୀ ସ୍ଥାନୀୟ ପୋଲିସକୁ ଖବର ଦେଇଥିଲେ। ପରେ ପୋଲିସ ପକ୍ଷରୁ ମହିଳାଙ୍କ ଅନ୍ତିମ ସଂସ୍କାର କରାଯାଇ ଘଟଣାର ତଦନ୍ତ ଆରମ୍ଭ ହୋଇଛି।