କୁହାଯାଏ, ମଣିଷ ଯଦି ଚାହେଁ ତେବେ ମାନବିକତା ମାଧ୍ୟମରେ ସେ ସମଗ୍ର ଦୁନିଆକୁ ଆହୁରି ସୁନ୍ଦର କରିପାରିବ। ଠିକ୍ ଏହି କଥାକୁ ପ୍ରମାଣ କରି ଦେଖାଇଛନ୍ତି ତାମିଲନାଡୁର ଶିବଗଙ୍ଗା ଜିଲାବାସୀ। ଯେଉଁଠାରେ ଏକ ପକ୍ଷୀ ପାଇଁ ସମଗ୍ର ଗାଁ ୩୫ ଦିନ ଅନ୍ଧାରରେ ରହିଥିଲା।
ପ୍ରକୃତ କଥା ହେଲା ଶିବଗଙ୍ଗାରେ ଷ୍ଟ୍ରିଟଲାଇଟ୍ ଯେଉଁ ସୁଇଚ୍ବୋର୍ଡରେ ଚାଲୁଥିଲା ସେହିଠାରେ ଏକ ପକ୍ଷୀ ଅଣ୍ଡା ଦେଇଥିଲା। ଲୋକମାନେ ଭୟ କରୁଥିଲେ ଯଦି ସୁଇଚ୍ବୋର୍ଡ ବ୍ୟବହାର କରାଯାଏ, ତେବେ ପକ୍ଷୀର ଅଣ୍ଡା ଫାଟିଯିବ। ଏହା ଦେଖି ପୂରା ଗାଁ ସ୍ଥିର କଲା ଯେ, ଅଣ୍ଡା ଫୁଟିବା ପର୍ଯ୍ୟନ୍ତ ସୁଇଚ୍ବୋର୍ଡ ବ୍ୟବହାର କରାଯିବ ନାହିଁ। ଲକ୍ଡାଉନ୍ର ପ୍ରଥମ ଦିନରେ ଗ୍ରାମବାସୀ ଏହା ଜାଣିବାକୁ ପାଇଥିଲେ। ଯେତେବେଳେ ଲୋକମାନେ ବସାକୁ ନିରୀକ୍ଷଣ କଲେ ସେଥିରେ ୩ଟି ନୀଳ ଏବଂ ଗୋଟିଏ ସବୁଜ ଅଣ୍ଡା ଥିବା ଦେଖିବାକୁ ପାଇଥିଲେ। ଜଣେ ବ୍ୟକ୍ତି ଗାଁର ହ୍ବାଟ୍ସଆପ୍ ଗ୍ରୁପରେ ପକ୍ଷୀବସାର ଫଟୋ ଶେୟାର କରିଥିଲେ। ଏହା ପରେ ହ୍ବାଟ୍ସଆପ୍ ଗ୍ରୁପ୍ର ବ୍ୟବହାରକାରୀମାନେ ସ୍ଥିର କଲେ ଯେ, ଅଣ୍ଡା ନ ଫୁଟିବା ପର୍ଯ୍ୟନ୍ତ ଗାଁରେ ଲାଇଟ୍ ଜଳିବ ନାହିଁ। ତେଣୁ ଗାଁକୁ ୩୫ ଦିନ ଅନ୍ଧକାରରେ ରଖାଗଲା।
ସୂଚନା ଅନୁଯାୟୀ, ପଞ୍ଚାୟତ ସଭାପତି ଏଚ୍. କାଲେଶ୍ୱରୀ ମଧ୍ୟ ଏହି ଅଭିଯାନରେ ଭାଗ ନେଇଥିଲେ। ତେବେ ଗାଁର କିଛି ଲୋକ ମଧ୍ୟ ଏହି ନିଷ୍ପତ୍ତିକୁ ବିରୋଧ କରିଥିଲେ। ପକ୍ଷୀ ଓ ଅଣ୍ଡା ପାଇଁ ଗାଁକୁ ଅନ୍ଧାରରେ ରଖିବା ପାଇଁ ସେମାନେ ରାଜି ହେଉ ନ ଥିଲେ। ମାତ୍ର ପରେ ଗ୍ରାମବାସୀ ଏ ବାବଦରେ ଏକ ବୈଠକ କରିଥିଲେ। ଏଥିରେ ସମସ୍ତେ ଲାଇଟ୍ ବନ୍ଦ କରିବାକୁ ରାଜି ହୋଇଥିଲେ।
