ନୂଆଦିଲ୍ଲୀ, ୨୬ା୧୨ (ପି.ଟି.)-ଚାମ୍ପିୟନ ରେସ୍ଲର ଭିନେଶ ଫୋଗତଙ୍କ ୪୦ ଦିନିଆ କ୍ୟାମ୍ପ ପାଇଁ କେନ୍ଦ୍ର ସରକାର ମଞ୍ଜୁର କରିଛନ୍ତି। ଭିନେଶଙ୍କ ସହିତ ତାଙ୍କ ବ୍ୟକ୍ତିଗତ କୋଚ୍ ଓଲର ଆକସ୍, ସ୍ପେୟାରିଂ ପାର୍ଟନର ପ୍ରିୟଙ୍କା ଫୋଗତ ଏବଂ ଫିଜିଓଥେରାପିଷ୍ଟ ପୂର୍ଣ୍ଣିମା ରମଣ ନାଗମଦିର ଏହି କ୍ୟାମ୍ପରେ ସାମିଲ ହେବେ। ଏ ବାବଦରେ ମୋଟ ୧୫.୫୧ ଲକ୍ଷ ଟଙ୍କା ଖର୍ଚ୍ଚ ହେବ। କ୍ୟାମ୍ପ ପାଇଁ ସରକାରଙ୍କ ଟାର୍ଗେଟ୍ ଅଲିମ୍ପିକ ପୋଡିୟମ ସ୍କିମ୍ (ଟପ୍ସ)ରୁ ଅର୍ଥ ମଞ୍ଜୁର ହେବ। ଡିସେମ୍ବର ୨୮ରୁ ଜାନୁୟାରୀ ୨୪ ପର୍ଯ୍ୟନ୍ତ ହଙ୍ଗେରୀର ବୁଦାପେଷ୍ଟସ୍ଥିତ ଭାସାସ ସ୍ପୋଟର୍ସ କ୍ଲବ ଏବଂ ଜାନୁୟାରୀ ୨୪ରୁ ଫେବୃୟାରୀ ୫ ପର୍ଯ୍ୟନ୍ତ ପୋଲାଣ୍ଡର ସିଜ୍ରକ୍ସ୍ଥିତ ଅଲିମ୍ପିକ ଟ୍ରେନିଂ ସେଣ୍ଟରଠାରେ କ୍ୟାମ୍ପ ଅନୁଷ୍ଠିତ ହେବ। ପକେଟ୍ ଭତ୍ତା ବ୍ୟତୀତ ବିମାନ ଯାତ୍ରା, ସ୍ଥାନୀୟ ପରିବହନ, ବୋର୍ଡିଂ ଏବଂ ଲଜିଂ ବାବଦରେ ସମସ୍ତ ଖର୍ଚ୍ଚ ହିସାବରେ ରହିଛି। ଭିନେଶ ଟାର୍ଗେଟ୍ ଅଲିମ୍ପିକ ପୋଡିୟମ ସ୍କିମ୍ରେ ସ୍ଥାନ ପାଇଛନ୍ତି। ଟୋକିଓ ଗେମ୍ସରେ ତାଙ୍କଠାରୁ ପଦକ ଆଶା କରାଯାଉଛି। ଭିନେଶଙ୍କ ବ୍ୟକ୍ତିଗତ କୋଚ୍ ଆକସ ଏବଂ ଟ୍ରେନିଂ କ୍ୟାମ୍ପର ଯୋଜନା କରିଛନ୍ତି। କ୍ୟାମ୍ପରେ ୟୁରୋପିଆନ ରେସ୍ଲରମାନଙ୍କ ସହ ଟ୍ରେନିଂ ନେବା ଦ୍ୱାରା ଭିନେଶଙ୍କ ଦକ୍ଷତା ବୃଦ୍ଧି ପାଇବ।