ଦୁବାଇ, ୧୪ା୬ (ପି.ଟି.)-ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି) ହଲ୍ ଅଫ୍ ଫେମ୍ ତାଲିକାରେ ରବିବାର ଖେଳର ୧୦ଜଣ ଆଇକନ୍ଙ୍କୁ ସାମିଲ କରାଯାଇଛି। ୫ଟି ଯୁଗର ୨ଜଣ ଲେଖାଏ ଖେଳାଳିଙ୍କୁ ତାଲିକାଭୁକ୍ତ କରାଯାଇଛି। ଜୁନ୍ ୧୮ରେ ସାଉଥାମ୍ପଟନଠାରେ ଭାରତ ବନାମ ନ୍ୟୁଜିଲାଣ୍ଡ ଉଦ୍ଘାଟନୀ ବିଶ୍ୱ ଟେଷ୍ଟ ଚାମ୍ପିୟନଶିପ୍ ଫାଇନାଲ ପୂର୍ବରୁ ଆଇସିସି ଏହି ଘୋଷଣା କରିଛି। ଟେଷ୍ଟ କ୍ରିକେଟ ଇତିହାସରେ ଖେଳ ପ୍ରତି ଏହି ୧୦ଜଣ କିମ୍ବଦନ୍ତୀଙ୍କ ଉଲ୍ଲେଖନୀୟ ଅବଦାନ ରହିଛି। ସେମାନଙ୍କୁ ସାମିଲ କରାଯିବା ଦ୍ୱାରା ହଲ୍ ଅଫ୍ ଫେମ୍ ତାଲିକାର ସଦସ୍ୟ ସଂଖ୍ୟା ୧୦୩କୁ ବୃଦ୍ଧି ପାଇଛି। ତାଲିକାଭୁକ୍ତ କିମ୍ବଦନ୍ତୀମାନେ ହେଲେ ପ୍ରାରମ୍ଭିକ ଯୁଗ (୧୯୧୮ ପୂର୍ବରୁ) ପାଇଁ ଦକ୍ଷିଣ ଆଫ୍ରିକାର ଅବ୍ରେ ଫକ୍ନର ଓ ଅଷ୍ଟ୍ରେଲିଆର ମଣ୍ଟି ନୋବଲ, ଆନ୍ତଃ ଯୁଦ୍ଧ ଯୁଗ (୧୯୧୮ରୁ୧୯୪୫) ପାଇଁ ଓ୍ବେଷ୍ଟଇଣ୍ଡିଜର ସାର୍ ଲିଏରି କନଷ୍ଟାଣ୍ଟିନ୍ ଓ ଅଷ୍ଟ୍ରେଲିଆର ଷ୍ଟାନ ମ୍ୟାକ୍କେବ୍, ଯୁଦ୍ଧର ପରବର୍ତ୍ତୀ ଯୁଗ (୧୯୪୬ରୁ ୧୯୭୦) ପାଇଁ ଇଂଲଣ୍ଡର ଟେଡ୍ ଡେକ୍ସଟର ଓ ଭାରତର ଭିନୁ ମଙ୍କଡ, ଅନ୍ତର୍ଜାତୀୟ ଦିନିକିଆ ଯୁଗ (୧୯୭୧ରୁ ୧୯୯୫) ପାଇଁ ଓ୍ବେଷ୍ଟଇଣ୍ଡିଜର ଦେସ୍ମଣ୍ଡ ହେନ୍ସ ଓ ଇଂଲଣ୍ଡର ବବ୍ ଓ୍ବିଲ୍ସ ଏବଂ ଆଧୁନିକ ଯୁଗ (୧୯୯୬ରୁ ୨୦୧୬)ପାଇଁ ଜିମ୍ବାଓ୍ବେର ଆଣ୍ଡି ଫ୍ଲାଓ୍ବାର ଓ ଶ୍ରୀଲଙ୍କାର କୁମାର ସଙ୍ଗକାରା। ମଙ୍କଡ଼ଙ୍କୁ ଭାରତର ଅନ୍ୟତମ ଶ୍ରେଷ୍ଠ ଅଲରାଉଣ୍ଡର ବିବେଚନା କରାଯାଇଥାଏ। ସେ ୪୪ ଟେଷ୍ଟ ମ୍ୟାଚ ଖେଳି ୩୧.୪୭ ଆଭରେଜରେ ୨,୧୦୯ ରନ ସଂଗ୍ରହ କରିଛନ୍ତି। ସେ ୩୨.୩୨ ଆଭରେଜରେ ୧୬୨ ଉଇକେଟ ମଧ୍ୟ ଅକ୍ତିଆର କରିଛନ୍ତି। ସେ ଜଣେ ଓପନିଂ ବ୍ୟାଟ୍ସମ୍ୟାନ ଓ ବାମହାତୀ ଧିମା ରକ୍ଷଣଶୀଳ ବୋଲର ଥିଲେ। ସେ ତାଙ୍କ କ୍ୟାରିୟରର ସବୁଠାରୁ ବଡ଼ ସଫଳତା ୧୯୫୨ରେ ଇଂଲଣ୍ଡ ବିପକ୍ଷରେ ଲଡର୍ସଠାରେ ହାସଲ କରିଥିଲେ। ସେ ୭୨ ଓ ୧୮୪ ରନ କରିବା ସହ ମ୍ୟାଚରେ ୯୭ ଓଭର ବୋଲିଂ କରିଥିଲେ। ସେ ହେଉଛନ୍ତି ବିଶ୍ୱର ତୃତୀୟ କ୍ରିକେଟର ଯିଏକି ଟେଷ୍ଟ କ୍ରିକେଟରେ ପ୍ରତ୍ୟେକ ପୋଜିଶନରେ ବ୍ୟାଟିଂ କରିଛନ୍ତି। ସେ ଆହୁରି ମଧ୍ୟ ଅନ୍ୟ ଜଣେ କିମ୍ବଦନ୍ତୀ କ୍ରିକେଟର ସୁନୀଲ ଗାଭାସ୍କରଙ୍କୁ କୋଚିଂ ଦେଇଛନ୍ତି। ଗାଭାସ୍କର ପୂର୍ବରୁ ହଲ୍ ଅଫ୍ ଫେମ୍ର ସଦସ୍ୟ ହୋଇସାରିଛନ୍ତି।
