ଅନୁଗୋଳ ଅଫିସ୍, ୮।୭
ବଢ଼ୁଥିବା କରୋନା ସଂକ୍ରମଣକୁ ଦୃଷ୍ଟିରେ ରଖି ଅନୁଗୋଳ ଜିଲା ପ୍ରଶାସନ ପକ୍ଷରୁ ବିଭିନ୍ନ କଟକଣା ଜାରି କରାଯାଇଛି। ବିଶେଷକରି ସକାଳ ୭ଟାରୁ ଅପରାହ୍ନ ୨ଟା ପର୍ଯ୍ୟନ୍ତ ଦୋକାନ ବଜାର ଖୋଲା ରଖିବାକୁ ନିର୍ଦ୍ଦେଶ ଦିଆଯାଇଛି। କିନ୍ତୁ ଅନୁଗୋଳ ସହରର ଅନେକ ବ୍ୟବସାୟୀ ନିର୍ଦ୍ଦେଶ ଉଲ୍ଲଂଘନ କରୁଛନ୍ତି। ଏ ନେଇ ବାରମ୍ବାର ଅଭିଯୋଗ ପରେ ମଙ୍ଗଳବାର ଉପଜିଲାପାଳ ବାସୁଦେବ ଶତପଥୀ ଅନ୍ୟ ଅଧିକାରୀ, ପୋଲିସ ସହ ସହରରେ ବୁଲି ସ୍ଥିତି ଅନୁଧ୍ୟାନ କରିଥିଲେ। ଏହି ସମୟରେ ନିୟମ ମାନୁ ନ ଥିବା ୫ଟି ବ୍ୟବସାୟିକ ପ୍ରତିଷ୍ଠାନକୁ ସିଲ୍ କରିବାକୁ ଉପଜିଲାପାଳ ନିର୍ଦ୍ଦେଶ ଦେଇଥିଲେ।
ଅପରାହ୍ନରେ ଉପଜିଲାପାଳଙ୍କ ସହ ନିୟନ୍ତ୍ରିତ ବଜାର କମିଟି ସମ୍ପାଦକ ଶମ୍ବୁନାଥ ନାୟକ, ଥାନା ଅଧିକାରୀ ରମେଶ ଚନ୍ଦ୍ର ବିଶୋଇ ଓ ଏସ୍ଆଇ ପ୍ରକାଶ ମାଝି ପ୍ରମୁଖ ସହରରେ ଯାଞ୍ଚ କରିଥିଲେ। ୨ଟା ବାଜିସାରିଥିଲେ ମଧ୍ୟ ମେଡିକାଲ ଛକର ଏକ ତେଜରାତି ଦୋକାନରେ ପ୍ରବଳ ଗହଳି ହୋଇଥିବା ଉପଜିଲାପାଳ ଦେଖି ତାହାକୁ ସିଲ୍ କରିବାକୁ ନିର୍ଦ୍ଦେଶ ଦେଇଥିଲେ। ଉକ୍ତ ଦୋକାନ ରାସ୍ତା ଉପରକୁ ବଢ଼ିଥିବାରୁ ୩ ଫୁଟ ଆଜବେଷ୍ଟ ଭାଙ୍ଗିବାକୁ ଉପଜିଲାପାଳ ନିର୍ଦ୍ଦେଶ ଦେଇଥିଲେ। ସେହିପରି ସହରର ଆଉ ଏକ ଦୋକାନ ଭିତରେ ଲୋକଙ୍କ ଗହଳି ଥିଲା। ଦୋକାନ ମାଲିକ ଓ ଭିତରେ ଥିବା କେତେଜଣ ମାସ୍କ ପିନ୍ଧି ନ ଥିଲେ। ଦୋକାନ ବନ୍ଦ ରଖିବା ସମୟ ଗଡ଼ି ଯାଇଥିବାରୁ ପ୍ରଶାସନ ଉକ୍ତ ଦୋକାନ ସିଲ୍ କରିଥିଲା। ଏହାପରେ ବିବାହ ସାମଗ୍ରୀ ବିକ୍ରି ହେଉଥିବା ଏକ କପଡ଼ା ଦୋକାନରେ ପ୍ରବଳ ଗହଳି ଦେଖିବାକୁ ମିଳିଥିଲା। ଲୋକମାନେ କପଡ଼ା କିଣାକିଣି କରିବାକୁ ଭିଡ଼ ଜମାଇଥିଲେ। ତେଣୁ ଦୋକାନକୁ ସିଲ୍ କରାଯାଇଥିବା ସୂଚନା ମିଳିଛି। ଏଥିସହ ଅନ୍ୟ ଦୁଇଟି ଦୋକାନରେ ମଧ୍ୟ ପ୍ରଶାସନ ତାଲା ପକାଇଛି। ଏ ନେଇ ଉପଜିଲାପାଳ ଶତପଥୀ କହିଛନ୍ତି, ଜିଲା ପ୍ରଶାସନ ପକ୍ଷରୁ ବ୍ୟବସାୟୀ, ସାଧାରଣ ଲୋକଙ୍କ ପାଇଁ ନିର୍ଦ୍ଦେଶନାମା ଜାରି କରାଯାଇଛି। କିନ୍ତୁ ବ୍ୟବସାୟୀମାନେ ଏହାକୁ ଅମାନ୍ୟ କରୁଛନ୍ତି। ଦିଆଯାଇଥିବା ସମୟ ପରେ ଦୋକାନ ଖୋଲି ବ୍ୟବସାୟ କରୁଥିବା ଓ ଗହଳି କରୁଥିବାରୁ ସିଲ୍ କରାଯାଇଛି।
