ଗୁଆହାଟୀ/ନୂଆଦିଲ୍ଲୀ, ୧୦ା୬: ମଣିପୁର ହିଂସା ଥମିବା ନାଁ ନେଉନି। କିଛିଦିନର ନୀରବତା ପରେ ଶୁକ୍ରବାର ସେଠାରେ ସାନି ହିଂସାକାଣ୍ଡ ଦେଖାଦେଇଛି। ଏଥିରେ ଜଣେ ମହିଳାଙ୍କ ସମେତ ୩ ଜଣଙ୍କର ମୃତ୍ୟୁ ଘଟିଥିବାବେଳେ ଅନ୍ୟ ଦୁଇଜଣ ଆହତ ହୋଇଛନ୍ତି। କୁକି ବହୁଳ କଙ୍ଗପୋକ୍ପି ଜିଲା ଏବଂ ମେଇତି ବହୁଳ ଇମ୍ଫାଲ ଇଷ୍ଟ ଜିଲା ସୀମାବର୍ତ୍ତୀ ଖୋକେନ ଗ୍ରାମରେ ଭୋର ୪ଟା ସମୟରେ ଦୁଇଗୋଷ୍ଠୀ ମଧ୍ୟରେ ଗୁଳିକାଣ୍ଡ ଘଟିଥିଲା। ସେନା ପୋଷାକରେ ଅଜଣା ବନ୍ଧୁକଧାରୀମାନେ ଗ୍ରାମରେ ଧସେଇ ପଶିଥିଲେ। ସେମାନେ ତଲାସି ଅଭିଯାନରେ ଆସିଥିବା ସୈନ୍ୟ ବୋଲି ଗାଁ ଲୋକେ ଧରିନେଇଥିଲେ। କିନ୍ତୁ ସେମାନେ ହଠାତ୍ ଗୁଳି ଚଳାଇବାରୁ ଗାଁର ୩ ଜଣଙ୍କ ଜୀବନ ଯିବା ସହ ଅନ୍ୟ ୨ ଜଣ ଆହତ ହୋଇଛନ୍ତି। ଇଣ୍ଡିଜେନିଅସ୍ ଟ୍ରାଇବାଲ ଲିଡର୍ସ ଫୋରମ୍ (ଆଇଟିଏଲ୍ଏଫ୍) ଏହି ଆକ୍ରମଣର ନିନ୍ଦା କରିଛି।
ମାସେରୁ ଊର୍ଦ୍ଧ୍ୱ ସମୟ ଧରି ମଣିପୁରରେ ହିଂସା ଲାଗିରହିଥିବାବେଳେ ଶତାଧିକ ଲୋକଙ୍କ ଜୀବନ ଗଲାଣି। ୩୫ ହଜାରରୁ ଊର୍ଦ୍ଧ୍ୱ ଲୋକ ଘରଦ୍ୱାର ହରାଇ ଅସ୍ଥାୟୀ ଶିବିରରେ ମୁଣ୍ଡ ଗୁଞ୍ଜିଛନ୍ତି। ମେଇତି ସମ୍ପ୍ରଦାୟକୁ ଅନୁସୂଚିତ ଜନଜାତି ମାନ୍ୟତାକୁ ବିରୋଧ କରି ଗତ ମାସ ୩ ତାରିଖରେ କୁକି ସମ୍ପ୍ରଦାୟ ପକ୍ଷରୁ ଆଦିବାସୀ ଶୋଭାଯାତ୍ରା ବାହାର କରାଯାଇଥିବାବେଳେ ଏହା ହିଂସାର ରୂପ ନେଇଥିଲା। କେନ୍ଦ୍ରୀୟ ତଦନ୍ତକାରୀ ଟିମ୍ (ସିବିଆଇ)କୁ ଏହାର ତଦନ୍ତ ଦାୟିତ୍ୱ ଦିଆଯାଇଛି। ସିବିଆଇ ୬ଟି ଏତଲା ଦାଏର କରିବା ସହ ହିଂସା ପଛର ଷଡ଼ଯନ୍ତ୍ରର ତଦନ୍ତ ଲାଗି ସ୍ବତନ୍ତ୍ର ତଦନ୍ତକାରୀ ଟିମ୍ (ଏସ୍ଆଇଟି) ଗଠନ କରିଛି। ସାମ୍ପ୍ରଦାୟିକ ହିଂସା ଯୋଜନାବଦ୍ଧ ଥିଲା କି ନାହିଁ, ଏହା ପଛର ଷଡ଼ଯନ୍ତ୍ର ଆଦି ୬ଟି ବିଷୟର ତଦନ୍ତ କରିବାକୁ ମଣିପୁର ସରକାର ସିବିଆଇକୁ କହିଛନ୍ତି। ରାଜ୍ୟରେ ହିଂସାକାଣ୍ଡ ଘଟିବା ଦିନଠାରୁ ୩,୭୦୦ରୁ ଅଧିକ ଏତଲା ଦାଏର ହେଲାଣି। ଇମ୍ଫାଲ ଇଷ୍ଟ ଜିଲାରେ ସର୍ବାଧିକ ଏତଲା ଦାଏର ହୋଇଥିବାବେଳେ ଏହା ପଛକୁ କାଙ୍ଗପୋକ୍ସି ଏବଂ ବିଷ୍ଣୁପୁର ରହିଛି।
ଇତିମଧ୍ୟରେ ସ୍ବରାଷ୍ଟ୍ର ମନ୍ତ୍ରୀ ଅମିତ୍ ଶାହା ନାଗା ବିଧାୟକମାନଙ୍କ ସହ ଆଲୋଚନା କରି କୁକି ଏବଂ ମେଇତି ସମ୍ପ୍ରଦାୟ ମଧ୍ୟରେ ସମ୍ପର୍କର ସେତୁ ଭାବେ କାର୍ଯ୍ୟ କରିବାକୁ ଅନୁରୋଧ କରିଛନ୍ତି। କୁକି ବିଧାୟକମାନେ ସ୍ବତନ୍ତ୍ର ପ୍ରଶାସନ ପାଇଁ ଦାବି କରୁଥିବାବେଳେ ନାଗା ବିଧାୟକମାନେ ଏହି ଦାବିଠାରୁ ଦୂରେଇ ରହିଥିବାବେଳେ ସ୍ବରାଷ୍ଟ୍ରମନ୍ତ୍ରୀ ସେମାନଙ୍କୁ ମଣିପୁରରେ ଶାନ୍ତି ସ୍ଥାପନ ଲାଗି ପଦକ୍ଷେପ ନେବାକୁ ନିବେଦନ କରିଛନ୍ତି।
ହିଂସା ପ୍ରଭାବିତ ମଣିପୁରରେ ଇଣ୍ଟରନେଟ ସେବା ବନ୍ଦ ରହିଥିବାବେଳେ ଏହାକୁ ବିରୋଧକରି ଦାଏର ପିଟିଶନ୍ର ଜରୁରୀ ଶୁଣାଣି କରିବାକୁ ସୁପ୍ରିମକୋର୍ଟ ମନା କରିଦେଇଛନ୍ତି। ମଣିପୁରର ୨ ଜଣ ବ୍ୟକ୍ତି ଏହି ପିଟିଶନ ଦାଏର କରିଥିଲେ। ହାଇକୋର୍ଟରେ ଏଭଳି ଏକ ମାମଲାର ଶୁଣାଣି ସ୍ଥଗିତ ରହିଥିବା ଜଷ୍ଟିସ୍ ଅନିରୁଦ୍ଧ ବୋଷ ଏବଂ ରାଜେଶ ବିନ୍ଦଲଙ୍କୁ ନେଇ ଗଠିତ ଅବକାଶକାଳୀନ ଖଣ୍ଡପୀଠ କହିଛନ୍ତି। ହାଇକୋର୍ଟରେ ମାମଲା ବିଚାରାଧୀନ ଥିବାରୁ ପୁନର୍ବାର ଶୁଣାଣିର ଆବଶ୍ୟକତା କ’ଣ ବୋଲି ଖଣ୍ଡପୀଠ ପ୍ରଶ୍ନ କରିବା ସହ ନିୟମିତ ଖଣ୍ଡପୀଠ ନିକଟରେ ଆବେଦନ କରିବାକୁ କହିଛନ୍ତି।