ଭୁବନେଶ୍ୱର,୩୦।୧(ବ୍ୟୁରୋ):ଯେକୌଣସି ହିଂସା ଗ୍ରହଣୀୟ ନୁହେଁ। ସ୍ବାସ୍ଥ୍ୟମନ୍ତ୍ରୀ ନବ ଦାସଙ୍କ ଉପରେ ହୋଇଥିବା ଗୁଳିମାଡ଼ ଘଟଣାକୁ ମୁଁ ନିନ୍ଦା କରୁଛି। ଏହାଦ୍ୱାରା ରାଜ୍ୟରେ ଆଇନଶୃଙ୍ଖଳା ବୋଲି କିଛି ନାହିଁ, ଏହା ପ୍ରମାଣିତ ହୋଇଛି। ଓଡ଼ିଶାରେ କୌଣସି ମନ୍ତ୍ରୀ ଉପରେ ଗୁଳିମାଡ଼ ଘଟଣା, ତାହା ପୁଣି ଜଣେ ପୋଲିସ ଗୁଳିମାଡ଼ କରିବା ନୂଆ କଥା। ଯେଉଁ ରାଜ୍ୟରେ ମନ୍ତ୍ରୀମାନେ ସୁରକ୍ଷିତ ନାହାନ୍ତି ସେ ରାଜ୍ୟରେ ସାଧାରଣ ଲୋକଙ୍କ କଥା କିଏ ପଚାରୁଛି। ରାଜ୍ୟରେ ଜଣେ ପୋଲିସ ଡିଜି ଅଛନ୍ତି ଏହା ଲୋକେ ଜାଣିନାହାନ୍ତି। ଯେହେତୁ ଗୃହ ବିଭାଗ ଦାୟିତ୍ୱରେ ଖୋଦ୍ ମୁଖ୍ୟମନ୍ତ୍ରୀ ଅଛନ୍ତି ତେଣୁ ସେ ଉତ୍ତରଦାୟୀ। ମୁଖ୍ୟମନ୍ତ୍ରୀ ଓଡ଼ିଶାରେ ନିର୍ବାଚନ ଜିତିବାରେ ଇତିହାସ ସୃଷ୍ଟି କରିଥିଲେ ବି ଗୁଣ୍ଡାଶ୍ରେଣୀୟ ଲୋକଙ୍କୁ ନିଯୁକ୍ତ କରୁଛନ୍ତି ନିର୍ବାଚନ ଜିତିବା ପାଇଁ। ଏପରି କି ସେମାନଙ୍କୁ ମନ୍ତ୍ରୀ ପଦ ବି ଦେଉଛନ୍ତି। ଅତଏବ ମନ୍ତ୍ରୀଙ୍କ ଉପରକୁ ଗୁଳି କରିବାରେ ଆଶ୍ଚର୍ଯ୍ୟ ହେବାର କିଛିନାହିଁ। ଯେହେତୁ ମୁଖ୍ୟମନ୍ତ୍ରୀ ଦାୟୀ, ତେଣୁ ସେ ତାଙ୍କ ବିବେକକୁ ପଚରାନ୍ତୁ ପରବର୍ତ୍ତୀ ସମୟରେ ସେ କ’ଣ ପଦକ୍ଷେପ ନେବେ। ଯଦି ସତ୍ୟ ଲୋକଲୋଚନକୁ ଆସିବ ନାହିଁ ତେବେ ଓଡ଼ିଶାର ଭବିଷ୍ୟତ ଅନ୍ଧକାରମୟ। ମନ୍ତ୍ରୀ ଦାସଙ୍କ ବିୟୋଗରେ ମୁଁ ଗଭୀର ମର୍ମାହତ। ତାଙ୍କ ଆତ୍ମାର ସଦ୍ଗତି କାମନା କରୁଛି।
– ନରସିଂହ ମିଶ୍ର, ବିଧାୟକ, ବଲାଙ୍ଗୀର