ନୂଆଦିଲ୍ଲୀ, ୮।୮: କରୋନା ମହାମାରୀ ସମୟରେ ଆଗଧାଡିର ଯୋଦ୍ଧା ପାଲଟିଛନ୍ତି ସ୍ବାସ୍ଥ୍ୟକର୍ମୀ। ସେମାନେ ନିଜ ଜୀବନକୁ ବାଜି ଲଗାଇ ନିସ୍ବାର୍ଥପର ଭାବେ ଲୋକଙ୍କ ସେବା କରିଚାଲିଛନ୍ତି। ଏହି ଯୁଦ୍ଧରେ ଲଢ଼ି ଲଢ଼ି ଥକି ପଡ଼ୁଥିବା ସ୍ବାସ୍ଥ୍ୟକର୍ମୀଙ୍କର ଫଟୋ ଅନେକ ସମୟରେ ସୋସିଆଲ ମିଡିଆରେ ଭାଇରାଲ ହେଉଥିବା ଆମେ ଦେଖିଛୁ। ସେମିତି ଆଉ ଏକ ଫଟୋ ଏବେ ଦେଖିବାକୁ ମିଳିଛି। ଜଣେ ସ୍ବାସ୍ଥ୍ୟକର୍ମୀ ପିପିଇ କିଟ୍ ପିନ୍ଧି ଥକିକରି ତଳେ ଘାସ ଉପରେ ଶୋଇପଡ଼ିଛନ୍ତି। କରୋନାରେ ମୃତ୍ୟୁ ଘଟିଥିବା ଜଣେ ମହିଳାଙ୍କ ମୃତଦେହ ସତ୍କାର ପୂର୍ବରୁ ସ୍ବାସ୍ଥ୍ୟକର୍ମୀଙ୍କ ଏପରି ଅବସ୍ଥା ହୋଇଛି। ଏହି ଫଟୋଟିକୁ ଆଇଏଏସ୍ ଅବନୀଶ ଶରଣ ସୋସିଆଲ ମିଡିଆରେ ଶେୟାର କରିଛନ୍ତି। ଏଥିରେ ସେ କ୍ୟାପଶନ ଲେଖିଛନ୍ତି, ‘କରୋନାରେ ମୃତ୍ୟୁବରଣ କରିଥିବା ଜଣେ ମହିଳାଙ୍କୁ ସତ୍କାର ସମୟରେ ଥକି ପଡ଼ିଥିବା ଜଣେ ସ୍ବାସ୍ଥ୍ୟକର୍ମୀ। କରୋନା ଯୋଦ୍ଧାଙ୍କ ଏପରି ବଳିଦାନକୁ ଇତିହାସରେ ମଧ୍ୟ ମନେ ରଖାଯିବ ବୋଲି ସେ ଲେଖିଛନ୍ତି। ଏହି ଫଟୋଟି ଦିଲ୍ଲୀର ବୋଲି ଜଣାପଡ଼ିଛି।
