ନୂଆଦିଲ୍ଲୀ,୫।୧୦ : ବ୍ରିଜ ତଳେ ଫସିଥିବା ଏୟାର ଇଣ୍ଡିଆର ଏକ ବିମାନକୁ ନେଇ ଏବେ ସୋସିଆଲ ମିଡିଆରେ ଖୁବ୍ ଚର୍ଚ୍ଚା ହେଉଛି। ଭାଇରାଲ ହେଉଥିବା ଏକ ଭିଡିଓରେ ଦିଲ୍ଲୀ ବିମାନ ବନ୍ଦରରୁ ନିଆଯାଉଥିବା ସ୍କ୍ରାପଡ୍ ବିମାନ ଏକ ବ୍ରିଜରେ ଅଟକି ଯାଇଥିବା ଦେଖିବାକୁ ମିଳିଛି। ଓ୍ବିଙ୍ଗ୍ସ (ପଙ୍ଖ) ନ ଥିବା ବିମାନକୁ ଦିଲ୍ଲୀ-ଗୁରୁଗ୍ରାମ ହାଇଓ୍ବେରେ ନିଆଯାଉଥିଲା।
ତେବେ ବ୍ରିଜ୍ରେ ବିମାନ ଫସି ଯିବାରୁ ରାସ୍ତାରେ ଆଂଶିକ ଟ୍ରାଫିକ ସମସ୍ୟା ସୃଷ୍ଟି ହୋଇଥିଲା। କିନ୍ତୁ ଭିଡିଓରେ ହାଇଓ୍ବେର ଅନ୍ୟ ପାର୍ଶ୍ୱରେ ଗାଡ଼ି ଚଳାଚଳ ଜାରି ରହିଥିବା ଦେଖିବାକୁ ମିଳିଛି।
ଏୟାର ଇଣ୍ଡିଆ ପକ୍ଷରୁ ଜାରି କରାଯାଇଥିବା ବିଜ୍ଞପ୍ତିରେ କୁହାଯାଇଛି, ପଞ୍ଜୀକୃତ ତାଲିକାରୁ ହଟା ଯାଇଥିବା ବିମାନକୁ ବିକ୍ରି କରାଯାଇଛି। ଏହାକୁ ଶନିବାର ରାତିରେ ଗ୍ରାହକ ନେଉଥିବା ବେଳେ ଏହା ଫୁଟ୍ ଓଭରବ୍ରିଜରେ ଫସି ଯାଇଥିଲା। ଏଥିରେ ବିମାନ ସହ ଏୟାର ଇଣ୍ଡିଆର କୌଣସି ସହଭାଗୀଦାରିତା ନାହିଁ।