ସୋସିଆଲ ମିଡିଆରେ ଅନେକ ଚମକାଇବା ଭଳି ଭିଡିଓ ଦେଖିଥାଇ ପାରନ୍ତି, ହେଲେ ଏବେ ଏକ ଏଭଳି ଭିଡିଓ ଭାଇରାଲ ହେଉଛି ଯାହାକୁ ଦେଖିଲେ ଲୋମ ଟାଙ୍କୁରି ଉଠିବ। କାରଣ ଭିଡିଓଟିରେ ବରଯାତ୍ରୀମାନେ ସତ ସତିକା ନାଗ ସହ ‘ନାଗିନ୍ ଡ୍ୟାନ୍ସ’ କରୁଥିବା ଦେଖାଯାଉଛି। ସମସ୍ତେ ନାଚରେ ଏତେ ମସଗୁଲ ଯେ ସାପ ପ୍ରତି ତାଙ୍କର ଡର ଟିକିଏ ନାହିଁ। ହେଲେ ଭିଡିଓ ଦେଖି ଲୋକଙ୍କ ହୋସ୍ ଉଡି ଯାଇଛି। ଏପରିକି ଘଟଣାକୁ ନେଇ ଥାନାରେ ଅଭିଯୋଗ କରାଯାଇଥିବା କୁହାଯାଉଛି।
ଭାଇରାଲ ହେଉଥିବା ଭିଡିଓଟି ଓଡ଼ିଶାର ମୟୂରଭଞ୍ଜର। ଏଥିରେ ଜଣେ ସାପୁଆ କେଳାଙ୍କୁ ଦେଖିବାକୁ ମିଳିଛି। ସେ ନାଗ ସାପକୁ ହାତରେ ଧରି ନାଚୁଛନ୍ତି। ସେହିଭଳି ବରଯାତ୍ରୀମାନେ ନିର୍ଡର ହୋଇ ସାପ ସହ ନାଚୁଥିବା ଦେଖାଯାଇଛି। ପୂର୍ବରୁ ଏଭଳି କେହି ସାପ ସହ ନାଗିନ ଡ୍ୟାନ୍ସ କରି ନ ଥିଲେ । ଏଣୁ ଭିଡିଓକୁ ଦେଖି ଅନେକ ଚକିତ ହୋଇଯାଇଛନ୍ତି। ଏହାଛଡ଼ା ସ୍ଥାନୀୟ ଲୋକମାନେ ବରଯାତ୍ରୀଙ୍କ ଏଭଳି ନୃତ୍ୟକୁ ଦେଖି ପୋଲିସ ନିକଟରେ ଅଭିଯୋଗ କରିଛନ୍ତି। ଘଟଣାରେ ପୋଲିସ ୫ଜଣଙ୍କୁ ଗିରଫ କରିଥିବା କୁହାଯାଉଛି। ଏହା ଏବେ ଚାରିଆଡେ ଚର୍ଚ୍ଚାର ବିଷୟ ପାଲଟିଛି।