ବରଗଡ଼ ଅଫିସ୍,୧୨।୧।: ବରଗଡ଼ ଜିଲା ବିଜେପୁର ବ୍ଲକ ଶିକ୍ଷା ବିଭାଗ ଅଧୀନରେ କାର୍ଯ୍ୟରତ ଜଣେ କେନ୍ଦ୍ର ସାଧନ ସଂଯୋଜକ(ସିଆର୍ସିସି) ସ୍ଥାନୀୟ ଶିକ୍ଷକଙ୍କ ପ୍ରତି ଆଶାଳୀନ ବ୍ୟବହାର ସୋସିଆଲ ମିଡ଼ିଆରେ ଭାଇରାଲ ହେବା ଘଟଣା ଚର୍ଚ୍ଚାର ବିଷୟ ହୋଇଛି । ବ୍ଲକ ଶିକ୍ଷକ ସଂଘ ସମ୍ପୃକ୍ତ ଶିକ୍ଷକଙ୍କ ବ୍ୟବହାରକୁ ନିନ୍ଦା କରିବା ସହିତ କାର୍ଯ୍ୟାନୁଷ୍ଠାନ ଦାବି କରିଛି। ଏହି କ୍ରମରେ ମଙ୍ଗଳବାର ସଂଘ ପକ୍ଷରୁ ବିଜେପୁର ବ୍ଲକ ଶିକ୍ଷା ଅଧିକାରୀ ପ୍ରଫୁଲ୍ଲ କୁମାର ନନ୍ଦଙ୍କୁ ଏକ ସ୍ମାରକପତ୍ର ପ୍ରଦାନ କରି ସମ୍ପୃକ୍ତ ସିଆର୍ସିସିଙ୍କ ବିରୋଧରେ ଆବଶ୍ୟକ ପଦକ୍ଷେପ ନେବାକୁ ଦାବି କରାଯାଇଛି। ବାର୍ଷିକ ବେତନ ବୃଦ୍ଧି ପାଇଁ ବ୍ଲକ ଶିକ୍ଷା ଅଧିକାରୀ ଏକ ନୂତନ ଫର୍ମ ଲାଗୁ କରିଥିଲେ। କିନ୍ତୁ ଶିକ୍ଷକମାନେ ପୂର୍ବରୁ ଏହାକୁ ବିରୋଧ କରୁଥିଲେ। ସମ୍ପୃକ୍ତ ସିଆର୍ସିସି ଏହାକୁ ନେଇ ଶିକ୍ଷକଙ୍କୁ ହଇରାଣ କରିବା ସହିତ ଆଶାଳୀନ ବ୍ୟବହାର କରିଥିବା ସଂଘ ପକ୍ଷରୁ ଅଭିଯୋଗ ହୋଇଛି। ଶିକ୍ଷା ବିଭାଗ ଏଥିରେ କିଭଳି ପଦକ୍ଷେପ ନେଉଛି, ତାକୁ ଏବେ ଶିକ୍ଷକମାନେ ଚାହିଁ ବସିଛନ୍ତି।