ଆଜିକାଲି ସ୍ବାର୍ଥପର ଦୁନିଆରେ କେହି କାହାକୁ ସହାୟତା କରିବା ବଡ ମୁସ୍କିଲ କାମ ବୋଲି ଧରାଯାଏ। କିନ୍ତୁ ଆଜିବି ଅନେକ ଲୋକ ଅଛନ୍ତି, ଯିଏ କି ନିଜ ମାନବିକତା ପ୍ରଦର୍ଶନ କରି ଚର୍ଚ୍ଚାକୁ ଆସିଥାନ୍ତି। ଆମେରିକାର ନ୍ୟୁୟର୍କରେ ଏକ ଏମିତି ଘଟଣା ଘଟିଛି। ଏକ ବତକ ଏବଂ ତା ଛୁଆକୁ ରାସ୍ତା ପାର୍ କରାଇଦେବା ପାଇଁ ଅଟକିଥିଲା ଟ୍ରାଫିକ୍। କିଛି ମହିଳା ଏବଂ ଅନ୍ୟ ଜଣେ ବ୍ୟକ୍ତି ମିଶି ବତକକୁ ସୁରକ୍ଷିତ ଭାବେ ରାସ୍ତା ପାର କରାଇଥିଲେ। ଏହାର ଭିଡିଓ ସୋସିଆଲ ମିଡିଆରେ ଭାଇରାଲ ହୋଇଛି। ଯୁଜର୍ସ ଏହି ଭିଡିଓକୁ ବେଶ୍ ପସନ୍ଦ ମଧ୍ୟ କରିଛନ୍ତି। ଏପର୍ଯ୍ୟନ୍ତ ଏହି ଭିଡିଓକୁ ୧ ଲକ୍ଷ ୯୦ ହଜାର ଲୋକ ଦେଖିସାରିଲେଣି।