ନିଜ ସନ୍ତାନର ଖୁସିରେ ନିଜ ଖୁସି ଖୋଜିଥାନ୍ତି ମା’ବାପା। ଯଦି କାହାର ପୁଅ ନଚେତ ଝିଅ ଦେଶର ସବୁଠାରୁ ବଡ଼ ପରୀକ୍ଷା ୟୁପିଏସ୍ସି ପାସ୍ କରିଦିଏ ତେବେ ବାପାଙ୍କ ଛାତି ଚୌଡ଼ା ହେବା ସ୍ବାଭାବିକ। କିଛିଦିନ ତଳେ ୟୁପିଏସ୍ସି ପରୀକ୍ଷାଫଳ ବାହାରିଥିଲା। ଏଥିରେ ବୁଲନ୍ଦ ସହରର ପବନ କୁମାରଙ୍କ ଘରର ଭିଡିଓ ଭାଇରାଲ ହୋଇଥିଲା। ଭଙ୍ଗାଦଦରା ଘରେ ରହୁଥିବା ଏହି ଯୁବକ ୟୁପିଏସ୍ସି ପରୀକ୍ଷାରେ କୃତକାର୍ଯ୍ୟ ହୋଇଥିଲେ।
ଏହି କ୍ରମରେ ସୋସିଆଲ ମିଡିଆରେ ଅନ୍ୟ ଜଣେ ୟୁପିଏସ୍ସିରେ ଉର୍ତ୍ତୀର୍ଣ୍ଣ ହୋଇଥିବା ପୁଅଙ୍କ ଭିଡିଓ ସାମ୍ନାକୁ ଆସିଛି। କ୍ଷିତିଜ୍ ଗୁରଭେଲେ ନାମକ ଜଣେ ଛାତ୍ର ସଫଳତା ପାଇଥିବା ନେଇ ଜାଣିବା ପରେ ବାପାଙ୍କୁ ଖୁସିଖବର ଦେବାକୁ ତାଙ୍କ ଅଫିସରେ ପହଞ୍ଚିଥିଲେ। ସେତେବେଳେ ତାଙ୍କ ବାପା ସହକର୍ମୀଙ୍କ ସହ ବସି ଖାଇବା ଖାଉଥିଲେ। କ୍ଷିିତିଜ୍ଙ୍କୁ ଦେଖି ସେ ଚମକି ପଡ଼ିଥିଲେ। ପରେ କ’ଣ ହେଲା ବୋଲି ପଚାରିଥିଲେ। ଏହାପରେ କ୍ଷିତିଜ୍ ବାପାଙ୍କୁ କୁହନ୍ତି‘ ଯେତେବେଳେ ବଡ଼ ଅଫିସର ଆସନ୍ତି ଉଠିଯିବା କଥା’। ଏହା ଶୁଣି ବାପା ସେ ଉର୍ତ୍ତୀର୍ଣ୍ଣ ହୋଇଥିବା ଠଉରାଇପାରନ୍ତି। ସେ ଉଠିଯାଇ ପୁଅଙ୍କୁ କୁଣ୍ଡାଇ ପକାନ୍ତି। ଏହାର ଭିଡିଓ ଭାଇରାଲ ହେଉଛି। କ୍ଷିତିଜ୍ ନିଜର ଇନଷ୍ଟାଗ୍ରାମରେ ଏହି ଭିଡିଓକୁ ଶେୟାର କରିଛନ୍ତି। ଭିଡିଓରେ ଲୋକେ ଭଳିକି ଭଳି ପ୍ରତିକ୍ରିୟା ଦେଉଥିବା ବେଳେ ବାପାଟିଏ ସନ୍ତାନର ଖୁସିର ସ୍ବପ୍ନ ଦେଖିଥାଏ ବୋଲି କହୁଛନ୍ତି।