ବାର୍ବାଡୋସ୍,୩୦ା୬: ଭାରତ ଟି-୨୦ ବିଶ୍ୱକପ୍ ୨୦୨୪ ଟ୍ରଫି ଜିତିଛି। ବୃହତ ବିଜୟ ପରେ ଭାରତ ବର୍ତ୍ତମାନ ଦୁଇଟି ଟି-୨୦ ବିଶ୍ୱକପ୍ ଟାଇଟଲ୍ ହାତେଇଛି। ଟି-୨୦ ବିଶ୍ୱକପ୍ ୨୦୨୪ର ଅନ୍ତିମ ମ୍ୟାଚ୍ ଭାରତ ଏବଂ ଦକ୍ଷିଣ ଆଫ୍ରିକା ମଧ୍ୟରେ ଖେଳାଯାଇଥିଲା। ଯେଉଁଥିରେ ଭାରତ ଦକ୍ଷିଣ ଆଫ୍ରିକାକୁ ୭ ରନ୍ରେ ଭାରତ ପରାସ୍ତ କରିଥିଲା। ଏହି ବିଜୟ ପରେ ପ୍ରତ୍ୟେକ ଭାରତୀୟ ଖୁସିରେ ବିଭୋର ହୋଇପଡ଼ିଛନ୍ତି। ବାର୍ବାଡୋସ୍ର କେନ୍ସିଙ୍ଗଟନ ଓଭାଲ ଷ୍ଟାଡିୟମରେ ମଧ୍ୟ ଠିକ୍ ସେମିତି ଝଲକ ଦେଖିବାକୁ ମିଳିଥିଲା। ଫାଇନାଲ ଜିତିବା ପରେ ଅର୍ଶଦୀପ ସିଂ ଏବଂ ବିରାଟ କୋହଲି ପଡ଼ିଆ ମଝିରେ ଭାଙ୍ଗ୍ଡ଼ା ନାଚ କରୁଥିବା ଦେଖିବାକୁ ମିଳିଥିଲା।
ବେକରେ ପଦକ ପିନ୍ଧି ଅର୍ଶଦୀପ ଏବଂ କୋହଲି ଟି -୨୦ ବିଶ୍ୱକପ୍ ୨୦୨୪ର ଫାଇନାଲର ବିଜୟକୁ ଏକ ଭିନ୍ନ ଢଙ୍ଗରେ ପାଳନ କରିଥିଲେ। ଯେଉଁଥିରେ ଉଭୟ ଭାଙ୍ଗଡ଼ା ଡ୍ୟାନ୍ସ କରିଥିଲେ। ତାଙ୍କ ନିକଟରେ ଅକ୍ଷର ପଟେଲ, ମହମ୍ମଦ ସିରାଜ, ରିଙ୍କୁ ସିଂ ଏବଂ ଖଲିଲ ଅହମ୍ମଦ ମଧ୍ୟ ପରସ୍ପର ସହିତ ଷ୍ଟେପ୍ କରୁଥିବା ଦେଖିବାକୁ ମିଳିଥିଲା।
ଟି -୨୦ ବିଶ୍ୱକପ୍ରେ ଅର୍ଶଦୀପ ଚମତ୍କାର ବୋଲିଂ କରିଥିଲେ। ଏହି ଟୁର୍ନାମେଣ୍ଟର ପ୍ରଥମ ମ୍ୟାଚରୁ ତାଙ୍କୁ ପ୍ରଶଂସା କରାଯାଇଥିଲା। ଯେତେବେଳେ ଅଧିନାୟକ ରୋହିତ ଶର୍ମା ଗୋଟିଏ ଉଇକେଟ୍ ଆବଶ୍ୟକ କରନ୍ତି, ସେତେବେଳେ ଅର୍ଶଦୀପ ତାଙ୍କ ପାଇଁ ଉଇକେଟ୍ ନେଉଥିଲେ। ଅର୍ଶଦୀପ ଟି-୨୦ ବିଶ୍ୱକପ୍ ୨୦୨୪ରେ ୮ଟି ମ୍ୟାଚ୍ ଖେଳିଛନ୍ତି। ଏହି ୮ଟି ମ୍ୟାଚ୍ରେ ସେ ୧୭ଟି ଉଇକେଟ୍ ନେଇଥିଲେ। ଏହି ସିଜିନର ଟୁର୍ନାମେଣ୍ଟରେ ତାଙ୍କର ଶ୍ରେଷ୍ଠ ବୋଲିଂ ଫିଗର ହେଉଛି ୯ ରନ୍ ପାଇଁ ୪ ଉଇକେଟ୍। ଯାହା ସେ ଆମେରିକା ବିପକ୍ଷରେ ନେଇଥିଲେ।
ବିରାଟ କୋହଲି ଟି-୨୦ ବିଶ୍ୱକପ୍ ୨୦୨୪ର ଅନ୍ତିମ ମ୍ୟାଚ୍ରେ ଲୋକଙ୍କ ଆଶା ପୂରଣ କରିଥିଲେ। ତାଙ୍କ ବ୍ୟାଟରୁ ସେମିଫାଇନାଲ ମ୍ୟାଚ୍ ପର୍ଯ୍ୟନ୍ତ କୌଣସି ବଡ଼ ଇନିଂସ ଦେଖିବାକୁ ମିଳି ନ ଥିଲା। କିନ୍ତୁ ପ୍ରଶଂସକ ଏବଂ ଭେଟେରାନ ଖେଳାଳିମାନେ ବିଶ୍ୱାସ କରୁଥିଲେ ଯେ, କୋହଲି ଫାଇନାଲରେ ତାଙ୍କ ବ୍ୟାଟ୍ରେ ଏକ ବିସ୍ଫୋରଣ ସୃଷ୍ଟି କରିବେ। ଏହା ହିଁ ଘଟିଲା। ଟି -୨୦ ବିଶ୍ୱକପ୍ ୨୦୨୪ରେ ବିରାଟ କୋହଲି ୧୧୨.୬୮ ହାରରେ ୮ଟି ମ୍ୟାଚ୍ରେ ୧୫୧ ରନ୍ ସଂଗ୍ରହ କରିଥିଲେ। ଯେଉଁଥିରେ ଫାଇନାଲ ମ୍ୟାଚ୍ରେ ସେ ୧୨୮.୮୧ର ଷ୍ଟ୍ରାଇକ ହାରରେ ୫୯ ବଲ୍ରେ ୭୬ ରନ୍ ସଂଗ୍ରହ କରିଥିଲେ।