ଅହମ୍ମଦାବାଦ,୪।୨: ଓ୍ବେଷ୍ଟଇଣ୍ଡିଜ ବିପକ୍ଷରେ ରବିବାରଠାରୁ ଆରମ୍ଭ ହେବାକୁ ଯାଉଛି ୩ ମ୍ୟାଚ୍ ବିଶିଷ୍ଟ ଦିନିକିଆ ସିରିଜ୍। ଅଧିନାୟକ ଭାବେ କ୍ୟାରିୟର ଶେଷ ହେବା ପରେ ମଧ୍ୟ ବରିଷ୍ଠ ବ୍ୟାଟର ବିରାଟ କୋହଲିଙ୍କ ପ୍ରଦର୍ଶନ ଉପରେ ସଭିଙ୍କ ଦୃଷ୍ଟିରେ ରହିବ। ଏହି ମ୍ୟାଚ୍ରେ ପୂର୍ବତନ ଅଧିନାୟକ ଦୁଇ ବର୍ଷ ହେଲା ଜାରି ରହିଥିବା ଶତକ ମରୁଡି ଶେଷ କରିପାରନ୍ତି। ଏହା ଛଡ଼ା ଏକ ସ୍ବତନ୍ତ୍ର ମାଇଲଷ୍ଟୋନ ହାସଲ ଲକ୍ଷ୍ୟରେ ରହିବେ ୩୩ ବର୍ଷୀୟ ବ୍ୟାଟର।
ଭାରତ ମାଟିରେ ୫ ହଜାର ରନ୍ ପୂରଣ କରିବା ପାଇଁ କୋହଲିଙ୍କୁ ଆଉ ମାତ୍ର ୬ ରନ୍ ଦରକାର। ଏହି ରନ୍ ହାସଲ କରିବା କୋହଲିଙ୍କ ଲାଗି ବଡ଼ କଥା ନୁହେଁ। ଏଭଳି ହେଲେ ସେ ବିଶ୍ୱର ଦ୍ୱିତୀୟ ବ୍ୟାଟର ଭାବେ ଭାରତୀୟ ମାଟିରେ ୫ହଜାର ରନ୍ ପୂରଣ କରିବେ। ଏପର୍ଯ୍ୟନ୍ତ କିମ୍ବଦନ୍ତୀ ବ୍ୟାଟର ସଚିନ ତେନ୍ଦୁଲକର ଏକମାତ୍ର ଖେଳାଳି ଏହି ମାଇଲଷ୍ଟୋନ ହାସଲ କରିଥିଲେ।
କୌତୁହଳର କଥା ହେଲା, ସଚିନ ଭାରତରେ ୫୦୦୦ ଦିନିକିଆ ରନ୍ ଓ୍ବେଷ୍ଟଇଣ୍ଡିଜ ବିପକ୍ଷ ମ୍ୟାଚ୍ରେ ପୂରଣ କରିଥିଲେ। ଆଉ ସମାନ ଘଟଣା ଘଟିବାକୁ ଯାଉଛି କୋହଲିଙ୍କ କ୍ଷେତ୍ରରେ।