ନୂଆଦିଲ୍ଲୀ,୨୧।୧୦: ଚଳିତ ବର୍ଷ ମାତାପିତା ହୋଇଥିଲେ ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମା ଏବଂ କ୍ରିକେଟର ବିରାଟ କୋହଲି। ଜାନୁୟାରୀ ୧୧ରେ ତାଙ୍କର ଏକ କନ୍ୟା ସନ୍ତାନ ଜନ୍ମ ନେଇଥିଲା। ଉଭୟ ଝିଅର ନାମ ଭାମିକା ରଖିଥିଲେ। ସେବେଠାରୁ ଭାମିକାଙ୍କୁ ନେଇ ଚର୍ଚ୍ଚା ହେଉଥିଲେ ହେଁ ଏଯାଏ ତାଙ୍କର ମୁହଁ ଦେଖିନାହନ୍ତି ପ୍ରଶଂସକ। ଏବେ କିନ୍ତୁ ବିରୁଷ୍କା ତାଙ୍କର କିଛି ଝଲକ ସୋସିଆଲ ମିଡିଆରେ ଶେୟାର କରିଛନ୍ତି।
ବିରାଟ ଏବେ ଇନ୍ଷ୍ଟାଗ୍ରାମ ଆକାଉଣ୍ଟରେ ଏକ ଫଟୋ ଶେୟାର କରିଛନ୍ତି। ଫଟୋରେ ସେ ସ୍ତ୍ରୀ ଅନୁଷ୍କା ଏବଂ ଭାମିକାଙ୍କ ସହ ବ୍ରେକ୍ଫାଷ୍ଟ କରୁଥିବା ଦେଖାଯାଉଛି। ଫଟୋଟି ଦୁବାଇର। ଏହାକୁ ଶେୟାର କରି ବିରାଟ ହୃଦୟ ଇମୋଜି ଦେଇଛନ୍ତି। ପୂର୍ବରୁ ଅନୁଷ୍କା ଭାମିକାଙ୍କ ଫଟୋ ଶେୟାର କରି ଲେଖିଥିଲେ, ମୋର ପୁରା ହୃଦୟ ଗୋଟିଏ ଫଟୋରେ।
ଅନୁଷ୍କା କିଛି ଦିନ ଧରି ଅଭିନୟରୁ ବ୍ରେକ୍ ନେଇଛନ୍ତି। ସେ ଶେଷ ଥର ପାଇଁ ୨୦୧୮ରେ ଫିଲ୍ମ ‘ଜିରୋ’ରେ ନଜର ଆସିଥିଲେ। ଏହାଛଡ଼ା ସେ ପ୍ରଯୋଜନାରେ ମନୋନିବେଶ କରୁଛନ୍ତି।
