ନୂଆଦିଲ୍ଲୀ,୧୦।୯: ଇଂଲଣ୍ଡରେ ଭାରତୀୟ ଟିମ୍ ଉଲ୍ଲେଖନୀୟ ପ୍ରଦର୍ଶନ କରି ଚଳିତ ଟେଷ୍ଟ ସିରିଜରେ ୨-୧ରେ ଆଗୁଆ ରହିଥିଲା। ଶୁକ୍ରବାର ମାଞ୍ଚେଷ୍ଟରରେ ଅନ୍ତିମ ମୁକାବିଲା ଖେଳାଯିବାକୁ ଥିବା ବେଳେ ଏଥିରେ ଭାରତ ବିଜେତା ହୋଇ ଇତିହାସ ରଚିବ ବୋଲି ଆଶା କରାଯାଉଥିଲା। ହେଲେ କରୋନା ଯୋଗୁ ଅନ୍ତିଶ୍ଚିତତାକୁ ଠେଲି ହୋଇଯାଇଛି ଏହି ସିରିଜ୍। ଶେଷ ଟେଷ୍ଟକୁ ବାତିଲ କରିଦିଆଯାଇଥିବା ନେଇ ସ୍ପଷ୍ଟ କରାଯାଇଛି। ତେବେ ଏଥିରେ ବିଜେତା କିଏ ହେବ ସେ ନେଇ କୌଣସି ସୂଚନା ଦିଆଯାଇ ନ ଥିବା ବେଳେ ଆଗାମୀ ଦିନରେ ପୁନର୍ବାର ମ୍ୟାଚ୍କୁ ଖେଳାଯିବାକୁ ଆଲୋଚନା ଜାରି ରହିଛି। ପୂର୍ବରୁ ଶ୍ରୀଲଙ୍କା ଗସ୍ତ ବେଳେ କରୋନା ଯୋଗୁ ଭାରତୀୟ ଟିମ୍ ଅଡୁଆରେ ପଡ଼ିଥିବା ବେଳେ ଏବେ ଇଂଲଣ୍ଡରେ ମଧ୍ୟ ଏଭଳି ସ୍ଥିତି ଉପୁଜିଛି। ଏସବୁକୁ ନେଇ କ୍ରିକେଟ ବିଶେଷଜ୍ଞମାନେ ବାୟୋ ବବଲ୍କୁ ନେଇ ପ୍ରଶ୍ନ ଉଠାଇଛନ୍ତି। ଏତେ ଶକ୍ତ କଟକଣା ଭିତରେ କରୋନା କିଭଳି ଆସିଲା ବୋଲି ପ୍ରଶଂସକ ଯୁକ୍ତି ବାଢ଼ୁଛନ୍ତି।
ନିକଟରେ ଇଂଲଣ୍ଡର ଏକ ପୁସ୍ତକ ଉନ୍ମୋଚନ ଉତ୍ସବରେ ଭାରତୀୟ ଟିମ୍ର ମୁଖ୍ୟ କୋଚ୍ ରବି ଶାସ୍ତ୍ରୀ ଏବଂ ଅଧିନାୟକ ବିରାଟ କୋହଲି ଯୋଗ ଦେଇଥିଲେ। ଓଭାଲ ଟେଷ୍ଟ ପୂର୍ବରୁ ଉଭୟଙ୍କ ସହ କିଛି ଖେଳାଳି ମଧ୍ୟ ଉକ୍ତ ଉତ୍ସବରେ ଯୋଗ ଦେଇଥିଲେ। କାର୍ଯ୍ୟକ୍ରମରେ ବହୁତ ଗହଳି ହୋଇଥିବା ବେଳେ ଯେ କେହି ବିନା ମାସ୍କରେ ଥିଲେ। ଏପରିକି ସାମାଜିକ ଦୂରତା ବଜାୟ ରଖାଯାଇ ନ ଥିଲା। ଏହାର ପରିଣାମସ୍ବରୂପ ଓଭାଲ ଟେଷ୍ଟର ଚତୁର୍ଥ ଦିନ ଶାସ୍ତ୍ରୀଙ୍କ କରୋନା ରିପୋର୍ଟ ପଜିଟିଭ୍ ଆସିଥିଲା। ଏହାପରେ ସେ ଆଇସୋଲେଶନରେ ରହିଥିବା ବେଳେ ତାଙ୍କ ସହ ବୋଲିଂ କୋଚ୍ ଭରତ ଅରୁଣ, ଫିଲ୍ଡିଂ କୋଚ୍ ଆର୍.ଶ୍ରୀଧର ଏବଂ ଫିଜିଓ ନିତୀନ ପଟେଲ ପ୍ରମୁଖ କରୋନା ସଂକ୍ରମିତ ହୋଇଥିଲେ।
ମାଞ୍ଚେଷ୍ଟର ଟେଷ୍ଟ ପୂର୍ବରୁ ଭାରତର ଟ୍ରେନିଂ ସେଶନ୍ ବନ୍ଦ କରିଦିଆଯାଇଥିବା ଖବର ମିଳିଥିଲା। ପରେ ଜୁନିୟର ଫିଜିଓ ଯୋଗେଶ ପରମାର କରୋନା ପଜିଟିଭ୍ ବୋଲି ଜଣାପଡ଼ିଥିଲା। ଏହାପରେ ଖେଳାଳିମାନଙ୍କ ଟେଷ୍ଟ କରାଯାଇଥିଲା। ହେଲେ ସେମାନଙ୍କ ରିପୋର୍ଟ ନେଗେଟିଭ୍ ଆସିଥିଲା। ମାତ୍ର ୩ରୁ ୪ ଦିନ ପରେ କରୋନା ପ୍ରଭାବ ଦେଖାଇଥାଏ ବୋଲି ଖେଳାଳିମାନେ ଆଶଙ୍କା କରୁଛନ୍ତି। ଏଣୁ ସେମାନେ ମ୍ୟାଚ୍ ଖେଳିବାକୁ ଅରାଜି ହେବା ସହ ବିସିସିଆଇକୁ ଚିଠି ଲେଖିଥିଲେ। ଶେଷରେ ମ୍ୟାଚ୍କୁ ବାତିଲ କରିଦିଆଯାଇଛି।
କହିରଖୁଛୁ, ସିରିଜ୍ ଆରମ୍ଭ ପୂର୍ବରୁ ରିଷଭ ପନ୍ତ କରୋନା ପଜିଟିଭ୍ ଚିହ୍ନଟ ହୋଇଥିଲେ। ଏଥିନେଇ ବିସିସିଆଇ ସଚିବ ସମସ୍ତ ଖେଳାଳିମାନଙ୍କୁ କଟକଣାରେ ରହିବାକୁ ଏବଂ ଭିଡ ସ୍ଥାନକୁ ନ ଯିବାକୁ ପରାମର୍ଶ ଦେିଥିଲେ। ହେଲେ ଚତୁର୍ଥ ଟେଷ୍ଟ ପୂର୍ବରୁ ଶାସ୍ତ୍ରୀ ନିଜେ ବାହାରକୁ ଯିବା ସହ ଦଳର କିଛି ଖେଳାଳିଙ୍କୁ ସାଙ୍ଗରେ ନେଇ ଯାଇଥିଲେ। ଏହାକୁ ନେଇ ବିସିସିଆଇ ଅସନ୍ତୋଷ ପ୍ରକାଶ କରିଥିବା ଜଣାପଡ଼ିଛି। ଗୋଟିଏ ଭୁଲ ଯୋଗୁ ଏସବୁ ଆରମ୍ଭ ହୋଇଛି ବୋଲି ବିସିସିଆଇର ଜଣେ ଅଧିକାରୀ କହିଛନ୍ତି। ସେହି ଗୋଟିଏ ଭୁଲ ଯୋଗୁ ସମସ୍ତେ ଅସୁବିଧାରେ ପଡ଼ିଲେ ବୋଲି ସେ ମଧ୍ୟ କହିଛନ୍ତି।