ନୂଆଦିଲ୍ଲୀ,୨୨।୧: ଭାରତୀୟ ଦଳର ପ୍ରମୁଖ ବ୍ୟାଟ୍ସମ୍ୟାନ୍ଙ୍କ ମଧ୍ୟରୁ ଅଧିନାୟକ ବିରାଟ କୋହଲି ଏବଂ ରୋହିତ ଶର୍ମାଙ୍କ ମଧ୍ୟରେ କୌଣସି ନା କୌଣସି କାରଣରୁ ମୁକାବିଲା ଦେଖିବାକୁ ମିଳେ। ଚଳିତ ବର୍ଷ ଟି୨୦ ବିଶ୍ୱକପ୍ ହେବାକୁ ଯାଉଥିବା ବେଳେ ଉଭୟଙ୍କ ଉପରେ କୋଟି କୋଟି ପ୍ରଶଂସକଙ୍କ ନଜର ରହିବ। ବିଶେଷକରି ଏକ ରେକର୍ଡ ପାଇଁ ଉଭୟ ପ୍ରତିନ୍ଦ୍ୱନ୍ଦିତା କରୁଛନ୍ତି।
ବିରାଟ ଏବଂ ରୋହିତ ଟି୨୦ କ୍ରିକେଟରେ ଅନେକ ରେକର୍ଡ କରିଛନ୍ତି। ଆଇପିଏଲ୍ରେ ମଧ୍ୟ ରନ୍ କରିବାକୁ ନେଇ ଉଭୟଙ୍କ ମଧ୍ୟ ଟକ୍କର ଦେଖିବାକୁ ମିଳୁଛି। ହେଲେ ଏବେ ଯେଉଁ ରେକର୍ଡ କଥା ଉଠୁଛି ତାହା ହେଲା ଟି୨୦ ଅନ୍ତଃରାଷ୍ଟ୍ରୀୟ କ୍ରିକେଟର ଭାବେ ରେକର୍ଡ। ଦେଶ ପାଇଁ ଖେଳୁଥିବା ଖେଳାଳି ଭାବେ ଗୋଟିଏ ପାଳିରେ ସବୁଠାରୁ ଅଧିକ ଥର ଶ୍ରେଷ୍ଠ ବ୍ୟାଟ୍ସମ୍ୟାନ୍ ହେବାର ରେକର୍ଡ ତାଲିକାରେ ଉଭୟ ପ୍ରତିନ୍ଦ୍ୱନ୍ଦିତା କରୁଛନ୍ତି।
ଏହି ମାମଲାରେ ଶୀର୍ଷରେ ଅଛନ୍ତି ରୋହିତ। ସେ ଏଯାବତ ୧୦୮ ଟି୨୦ ଅନ୍ତଃରାଷ୍ଟ୍ରୀୟ ମ୍ୟାଚ୍ ଖେଳିଥିବା ବେଳେ ୨୭ ଥର୍ ଟିମ୍ ପାଇଁ ସବୁଠୁ ଅଧିକ ରନ୍ କରିଛନ୍ତି। ସେହିଭଳି ବିରାଟ ୮୫ ମ୍ୟାଚ୍ରେ ୨୫ ଥର ଟିମ୍ର ସବୁଠାରୁ ଅଧିକ ରନ୍ କରିଥିବା ଖେଳାଳି ପାଲଟିଛନ୍ତି।
ଗୋଟିଏ ପାଳିରେ ସର୍ବାଧିକ ଥର ଦଳ ପକ୍ଷରୁ ସର୍ବାଧିକ ରନ୍ କରିଥିବା ଖେଳାଳି:
୧- ରୋହିତ ଶର୍ମା-୨୭ ଥର
୨-ବିରାଟ କୋହଲି-୨୫ ଥର
୩- ପୋଲ ଷ୍ଟର୍ଲିଂ-୨୨ ଥର, ମାର୍ଟିନ ଗୁଷ୍ଟିଲ-୨୨ ଥର
୪-ଡେଭିଡ୍ ଓ୍ବାର୍ନର-୨୧ ଥର, ଆରୋନ ଫିଞ୍ଚ-୨୧ ଥର
୫-ମହମ୍ମଦ ହାଫିଜ୍-୨୦ ଥର
ଟି୨୦ କ୍ରିକେଟରେ ରନ୍ ବିଷୟରେ କଥା ହେଲେ ବିରାଟ ରୋହିତଙ୍କ ଆଗରେ ରହିଛନ୍ତି। ସେ ଏଯାବତ ୮୫ ଟି୨୦ ମ୍ୟାଚ୍ ଖେଳି ୨୯୨୮ ରନ୍ କରିଛନ୍ତି। ଅପରପକ୍ଷେ ରୋହିତ ୧୦୮ ମ୍ୟାଚ୍ରେ ୨୭୭୩ ରନ୍ କରିଛନ୍ତି।