ନୂଆଦିଲ୍ଲୀ,୩୦।୩: ବିଗତ ଦିନରେ ଭାରତୀୟ ଅଧିନାୟକ ବିରାଟ କୋହଲି ଏବଂ ଉପଅଧିନାୟକ ରୋହିତ ଶର୍ମାଙ୍କ ମଧ୍ୟରେ ସମ୍ପର୍କ ଖଟା ନେଇ ଗଣମାଧ୍ୟମରେ ଚର୍ଚ୍ଚା ଲାଗି ରହିଥିଲା। ଏକାଧିକ ଘଟଣାରେ ଉଭୟ ପରସ୍ପରର ବିଚାରକୁ ବିରୋଧ କରୁଥିଲେ। ହେଲେ ଏବେ ପରିସ୍ଥିତି ଓଲଟା। ବିରାଟ ଏବଂ ରୋହିତ ପରସ୍ପର ସହ କଥା ହୋଇ ମନୋମାଳିନ୍ୟ ଦୂର କରିଛନ୍ତି। ଏବେ ସେମାନେ ନୂଆ ନୂଆ ବନ୍ଧୁତାର ସମ୍ପର୍କରେ ଯୋଡ଼ି ହୋଇଛନ୍ତି। ଏପରି କରିବାରେ କୋଚ୍ ରବି ଶାସ୍ତ୍ରୀ ଗୁରୁତ୍ୱପୂର୍ଣ୍ଣ ଭୂମିକା ନିର୍ବାହ କରିଥିବା କୁହାଯାଉଛି।
ଇଂଲଣ୍ଡ ବିପକ୍ଷରେ ସିରିଜ ଜିତିବା ବ୍ୟତୀତ ଭାରତୀୟ ଡ୍ରେସିଂ ରୁମ୍ରେ ବହୁତ କିଛି ବଦଳିଯାଇଛି। ଗତ କିଛି ସପ୍ତାହରେ ବିରାଟ ଏବଂ ରୋହିତଙ୍କ ମଧ୍ୟରେ ସମ୍ପର୍କ ମଜଭୂତ ହୋଇଛି। ଯାହା ଦଳ ପାଇଁ ଶୁଭଙ୍କର। ଉଭୟ ଏବେ ନିଜର ଖେଳ, ଦଳ ବିଷୟରେ ପରସ୍ପର ସହ ଆଲୋଚନା କରୁଛନ୍ତି। ଯଦି ଉଭୟଙ୍କ ଚିନ୍ତାଧାରା ଏକ ହୁଏ ତେବେ ଦଳ ପାଇଁ ଭଲ ହେବ ବୋଲି ସେମାନେ ବୁଝିସାରିଛନ୍ତି। ଏହା ଗତ ୪ ମାସ ମଧ୍ୟରେ ବାସ୍ତବିକ ବଡ଼ ସଫଳତା।