ଦୁବାଇ, ୨୨।୮: ବିଶ୍ୱର ସବୁଠାରୁ ବ୍ୟୟବହୁଳ ଟି୨୦ ଟୁର୍ନାମେଣ୍ଟ ଇଣ୍ଡିଆନ୍ ପ୍ରିମିୟର ଲିଗ୍ (ଆଇପିଏଲ୍)ର ତ୍ରୟୋଦଶ ସଂସ୍କରଣ ସେପ୍ଟେମ୍ବର ୧୯ରୁ ୟୁଏଇରେ ଆରମ୍ଭ ହେବ। ଏଥିରେ ଅଂଶଗ୍ରହଣ କରିବା ଲାଗି ପର୍ଯ୍ୟାୟକ୍ରମେ ପ୍ରାୟ ସମସ୍ତ ଟିମ୍ ୟୁଏଇରେ ପହଞ୍ଚି ସାରିଲେଣି। ଆଇପିଏଲ୍ ଫ୍ରାଞ୍ଚାଇଜ ରୟାଲ୍ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ବିରାଟ କୋହଲି ଏହିକ୍ରମରେ ଦୁବାଇରେ ପହଞ୍ଚିଛନ୍ତି। ସାଥୀ ଖେଳାଳିଙ୍କ ସହ କୋହଲି ଦୁବାଇରେ ପହଞ୍ଚିବା ପରେ ଏକ ଫଟୋ ଶେୟାର କରିଛନ୍ତି। ଯେଉଁଥିରେ ସେ ‘ହେଲୋ ଦୁବାଇ’ ବୋଲି କ୍ୟାପ୍ସନରେ ଉଲ୍ଲେଖ କରିଛନ୍ତି। ଷଷ୍ଠ ଦଳ ଭାବେ ବାଙ୍ଗାଲୋର ଦୁବାଇରେ ଅବତାରଣ କରିଛି। କେବଳ ସନ୍ରାଇଜର୍ସ ହାଇଦ୍ରାବାଦ ଓ ଦିଲ୍ଲୀ କ୍ୟାପିଟାଲ୍ସ ଦୁବାଇରେ ପହଞ୍ଚିବାର ବାକି ରହିଛି। ଖେଳାଳିମାନେ ଗୋଟିଏ ହୋଟେଲରେ ରହୁଥିଲେ ମଧ୍ୟ କରୋନା କଟକଣା ଲାଗି କେବଳ ବାଲ୍କୋନିରେ ସାଥୀ ଖେଳାଳିଙ୍କ ସହ କଥାବାର୍ତ୍ତା ହୋଇପାରିବେ ବୋଲି ଜଣାପଡ଼ିଛି। କୋହଲି ବର୍ତ୍ତମାନ ସୁଦ୍ଧା ରୟାଲ ଚାଲେଞ୍ଜର୍ସ ପାଇଁ ୧୭୭ ମ୍ୟାଚ୍ ଖେଳିସାରିଛନ୍ତି। ଯେଉଁଥିରେ ସେ ୪ ଶତକ ଓ ୭ ଅର୍ଦ୍ଧଶତକ ସହ ମୋଟ୍ ୫,୪୧୨ ରନ୍ ସଂଗ୍ରହ କରିଛନ୍ତି। ୨୦୧୬ ସଂସ୍କରଣରେ ସେ ସର୍ବାଧିକ ୯୭୩ ରନ୍ କରି ‘ଅରେଞ୍ଜ କ୍ୟାପ୍’ର ଅଧିକାରୀ ହୋଇଥିଲେ।