ଦୁବାଇ,୨୬।୯: ଭାରତୀୟ ଅଧିନାୟକ ବିରାଟ କୋହଲି ରବିବାର ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ୫୧ ରନ୍ର ଅର୍ଦ୍ଧଶତୀୟ ଇନିଂସ ଖେଳିଥିଲେ। ଏହି ଅବସରରେ ଟି୨୦ କ୍ରିକେଟ (ଅନ୍ତର୍ଜାତୀୟ, ଘରୋଇ ଓ ଫ୍ରାଞ୍ଚାଇଜ ଭିତ୍ତିକ ଲିଗ୍)ରେ ୧୦ ହଜାର ରନ୍ ପୂରଣ କରିଛନ୍ତି କୋହଲି। ସେ ପ୍ରଥମ ଭାରତୀୟ ଭାବେ ଏହି ସ୍ବତନ୍ତ୍ର ରେକର୍ଡର ଅଧିକାରୀ ହୋଇଛନ୍ତି। ଏହି ମାଇଲଷ୍ଟୋନ ସ୍ପର୍ଶ କରିବା ପାଇଁ ୩୨ ବର୍ଷୀୟ ବ୍ୟାଟ୍ସମ୍ୟାନଙ୍କୁ ଖେଳିବାକୁ ପଡ଼ିଥିଲା ୨୯୯ତମ ଇନିଂସ। ତାଙ୍କ ନାମରେ ୫ ଶତକ ଓ ୭୩ଟି ଅର୍ଦ୍ଧଶତକ ରହିଛି।
କୋହଲିଙ୍କ ବ୍ୟତୀତ କେବଳ ବିଶ୍ୱ ୪ଜଣ ବ୍ୟାଟ୍ସମ୍ୟାନ ଟି୨୦ ଫର୍ମାଟରେ ୧୦ ହଜାର ରନ୍ ପୂରଣ କରିଛନ୍ତି। ଏହି ତାଲିକାରେ ଶୀର୍ଷରେ ଅଛନ୍ତି ଓ୍ବେଷ୍ଟଇଣ୍ଡିଜ ଓପନର କ୍ରିସ ଗେଲ। ତାଙ୍କ ନାମରେ ରହିଛି ସର୍ବାଧିକ ୧୪,୨୭୫ ରନ୍। ତାଙ୍କ ପଛକୁ କିରନ ପୋଲାର୍ଡ (୧୧,୧୯୫), ପାକିସ୍ତାନର ଶୋଏବ ମଲିକ (୧୦,୮୦୮) ଓ ଡେଭିଡ୍ ଓ୍ବାର୍ନର (୧୦,୦୧୯) ରହିଛନ୍ତି। ୧୦,୦୩୮ ରନ୍ ସହ ତାଲିକାର ଚତୁର୍ଥ ସ୍ଥାନରେ ଅଛନ୍ତି କୋହଲି।