ନୂଆଦିଲ୍ଲୀ,୧୬।୧: ପଡ଼ିଆ ବାହାରେ ହେଉ ଅବା ଭିତରେ ଭାରତୀୟ ଅଧିନାୟକ ବିରାଟ କୋହଲିଙ୍କ ଜଲଓ୍ବା ଜାରି ରହିଛି। ନିକଟରେ ପିତା ହୋଇଥିବା ବିରାଟ ଆଉ ଏକ ରେକର୍ଡ କରିଛନ୍ତି। ଏସିଆର ସବୁଠାରୁ ଅଧିକ ପସନ୍ଦ କରାଯାଉଥିବା ସେଲିବ୍ରିଟି ପାଲଟିଛନ୍ତି ସେ। ସୋସିଆଲ ମିଡିଆ ପ୍ଲାଟଫର୍ମ ଇନ୍ଷ୍ଟାଗ୍ରାମରେ କୋହଲୀଙ୍କ ଫଲୋଅର୍ ସଂଖ୍ୟା ୯୦ ମିଲିୟନ ଛୁଇଁଛି। ଏପରି ରେକର୍ଡ କରିବାରେ ସେ ଏସିଆରେ ପ୍ରଥମ ହୋଇଥିବା ବେଳେ ଖେଳାଳି ଭାବେ ବିଶ୍ୱରେ ୪ର୍ଥରେ ଅଛନ୍ତି। ଏହି ତାଲିକା ଶୀର୍ଷରେ ପର୍ତ୍ତୁଗୀଜ ଫୁଟ୍ବଲ ଖେଳାଳି କ୍ରିଷ୍ଟିଆନୋ ରୋନାଲ୍ଡୋ, ଦ୍ୱିତୀୟରେ ଲିଓନେଲ ମେସି, ତୃତୀୟରେ ବ୍ରାଜିଲ ଫୁଟବଲ ତାରକା ନେୟମାର ରହିଛନ୍ତି।
ସେହିଭଳି ଭାରତୀୟ ସେଲିବ୍ରିଟିଙ୍କ ବିଷୟରେ କଥା ହେଲେ ବିରାଟ ପ୍ରିୟଙ୍କା ଚୋପ୍ରା, ଶ୍ରଦ୍ଧା କପୁର, ଦୀପିକା ପାଦ୍ୟୁକୋନ, ନେହା କକ୍କର, ନରେନ୍ଦ୍ର ମୋଦି, ଆଲିଆ ଭଟ୍ଟ, ଅକ୍ଷୟ କୁମାର, ଜାକ୍ଲିନ୍ ଫର୍ଣ୍ଣାଡିସ୍, କଟ୍ରିନା କୈଫ୍ ଆଦିଙ୍କୁ ପଛରେ ପକାଇଛନ୍ତି। ଆକାଉଣ୍ଟ ଦେଖିଲେ ଏବେ ବିରାଟଙ୍କ ଫଲୋଅର୍ସ ସଂଖ୍ୟା ୯୦.୨ ମିଲିୟନ ହୋଇଥିବା ବେଳେ ଦ୍ୱିତୀୟରେ ଥିବା ପ୍ରିୟଙ୍କା ୫୯.୭ ମିଲିୟନରେ ଅଛନ୍ତି।
ପ୍ରକାଶ ଯେ, ପିତା ହେବାକୁ ନେଇ ବିରାଟ ଏବେ ଅଷ୍ଟ୍ରେଲିଆ ଗସ୍ତ ଅଧାରୁ ଛାଡ଼ି ସ୍ବଦେଶ ଫେରିଥିଲେ। ନିକଟରେ ତାଙ୍କର ଏକ କନ୍ୟା ସନ୍ତାନ ଜନ୍ମ ନେଇଛି। ଆଗାମୀ ଦିନରେ ଇଂଲଣ୍ଡ ବିପକ୍ଷରେ ଭାରତ ଖେଳିବାକୁ ଯାଉଥିବା ବେଳେ ବିରାଟ ଏବେ ପରିବାର ସହ ସମୟ ବିତାଉଛନ୍ତି।