ନୂଆଦିଲ୍ଲୀ,୯।୯: ଟି-୨୦ ବିଶ୍ୱକପ୍ ୨୦୨୧ ପାଇଁ ଭାରତୀୟ କ୍ରିକେଟ ଟିମ୍ ଘୋଷଣା କରାଯାଇଛି। ୧୫ ସଦସ୍ୟ ଥିବା ଟିମ୍ର ଅଧିନାୟକ ଦାୟିତ୍ୱ ସମ୍ଭାଳିବେ ବିରାଟ କୋହଲି। ବିରାଟ ପ୍ରଥମ ଥର ପାଇଁ ଟି-୨୦ ବିଶ୍ୱକପ୍ରେ ଭାରତୀୟ ଦଳର ନେତୃତ୍ୱ ନେବାକୁ ଯାଉଛନ୍ତି। ଏହାପୂର୍ବରୁ ୨୦୦୭ରୁ ୨୦୧୬ ପର୍ଯ୍ୟନ୍ତ ଏମ୍ଏସ୍ ଧୋନୀ ଅଧିନାୟକ ରହିଥିଲେ। ହେଲେ ଚଳିତ ଥର ମେଣ୍ଟର ଭାବେ ସେ ଖେଳାଳିଙ୍କ ସହ ରହିବେ।
ବିରାଟଙ୍କ ଅଧିନାୟକତ୍ୱରେ ଭାରତୀୟ ଦଳ ଟେଷ୍ଟ କ୍ରିକେଟରେ ଭଲ ପ୍ରଦର୍ଶନ କରୁଛି। ହେଲେ ରବି ଶାସ୍ତ୍ରୀଙ୍କ ସହ ତାଙ୍କ ଯୋଡ଼ି ଆଇସିସି ଟ୍ରଫି ଜିତି ପାରିନାହିଁ। ଏଣୁ ୟୁଏଇରେ ହେବାକୁ ଥିବା ବିଶ୍ୱକପ୍ ଉପରେ ସମସ୍ତଙ୍କ ନଜର ରହିଛି।
ଅନ୍ତରାଷ୍ଟ୍ରୀୟ ଟି୨୦ରେ ବିରାଟଙ୍କ ଅଧିନାୟକତ୍ୱର ରେକର୍ଡକୁ ଯଦି ଦେଖାଯାଏ ତେବେ ତାଙ୍କ ନେତୃତ୍ୱରେ ଭାରତୀୟ ଟିମ୍ ଏଯାବତ ମୋଟ ୪୫ ଟି-୨୦ ମ୍ୟାଚ୍ ଖେଳିଛନ୍ତି। ଏଥିରୁ ୨୭ଟିରେ ଦଳ ବିଜେତା ହୋଇଥିବା ବେଳେ ୧୪ରେ ପରାସ୍ତ ହୋଇଛି। ୨ ମ୍ୟାଚ୍ ଡ୍ର ହୋଇଥିବା ବେଳେ ୨ଟିର ଫଳାଫଳ ବାହାରି ନ ଥିଲା। ଅପରପକ୍ଷେ ଧୋନୀଙ୍କ ନେତୃତ୍ୱରେ ଦଳ ୭୨ ମ୍ୟାଚ୍ ଖେଳିଥିବା ବେଳେ ୪୧ରେ ବିଜୟ ଏବଂ ୨୮ରେ ପରାଜିତ ହୋଇଛି। ସେଥିରୁ ଗୋଟିଏ ଡ୍ର ଥିବା ବେଳେ ୨ଟିର ଫଳାଫଳ ବାହାରି ନାହିଁ।
