ନୂଆଦିଲ୍ଲୀ, ୧୫।୮: ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଲକ୍ ଡାଉନ୍ କାରଣରୁ ଗତ କିଛିଦିନ ହେବ ଘରେ ସମୟ ଅତିବାହିତ କରୁଛନ୍ତି। କିନ୍ତୁ ସରକାରଙ୍କ ପକ୍ଷରୁ ଲକ୍ ଡାଉନ୍ କୋହଳ କରାଯିବା ପରେ କିଛି କ୍ରିକେଟର୍ ନିକଟରେ ସେମାନଙ୍କ ଅଭ୍ୟାସ ଆରମ୍ଭ କରିଦେଇଛନ୍ତି। ତେବେ ମୁମ୍ବାଇରେ କରୋନା ପ୍ରଭାବ ଅଧିକ ରହିଥିବାରୁ କୋହଲି ଅଭ୍ୟାସ ଆରମ୍ଭ ନ କରି ଘରେ ରହିବାକୁ ପସନ୍ଦ କରିଛନ୍ତି। ତେଣୁ ଆଇପିଏଲ୍-୧୩ ପୂର୍ବରୁ ନିଜକୁ ଫିଟ୍ ରଖିବାକୁ ୩୧ ବର୍ଷୀୟ ଏହି ଷ୍ଟାର୍ କ୍ରିକେଟର୍ ଘରେ ଜିମ୍ରେ ବହୁତ ସମୟ ବିତାଉଛନ୍ତି। ଯାହାର ଫଟୋ ମଧ୍ୟ ସେ ନିକଟ ଅତୀତରେ ସୋସିଆଲ ମିଡିଆରେ ଶେୟାର କରିଛନ୍ତି। ଦିଲ୍ଲୀ ଜନ୍ମିତ କୋହଲି କିନ୍ତୁ ନିଜର ଏକ ସଦ୍ୟତମ ଫଟୋ ସୋସିଆଲ ମିଡିଆରେ ଶେୟାର କରିଛନ୍ତି, ଯାହାକୁ ନେଇ ଏବେ ବେଶ୍ ଚର୍ଚ୍ଚା। ଏହି ଫଟୋରେ ଦେଖାଯାଇଛି ଯେ, କୋହଲିଙ୍କ ଦାଢ଼ି ବଢ଼ିଯାଇଥିବାବେଳେ ସେଥିରୁ କିଛି ଅଂଶ ପାଚିଯାଇଛି। ‘ଭଲ ଟ୍ରେନିଂ ସେସନ ମୋତେ ଖୁସି ଦେଇଛି’ ବୋଲି ଏହି ଫଟୋ ତଳେ ସେ କ୍ୟାପସନ୍ରେ ଉଲ୍ଲେଖ କରିଛନ୍ତି। ଏହି ନୂଆ ଲୁକ୍ରେ କୋହଲି ବହୁତ ଆକର୍ଷଣୀୟ ଦେଖାଯାଉଛନ୍ତି। ପ୍ରଶଂସକ ମଧ୍ୟ ତାଙ୍କର ଏହି ଫଟୋକୁ ବେଶ୍ ପସନ୍ଦ କରିଛନ୍ତି। ଏଠାରେ ପ୍ରକାଶଯୋଗ୍ୟ, ଚଳିତ ବର୍ଷ ଆଇପିଏଲ୍ ସେପ୍ଟେମ୍ବର ୧୮ରୁ ୟୁଏଇରେ ଆରମ୍ଭ ହେବ। ଏଥିରେ ଭାଗ ନେବା ଲାଗି ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ କୋହଲି ସାଥୀ ଖେଳାଳିଙ୍କୁ ସହ ଆସନ୍ତା ସପ୍ତାହରେ ୟୁଏଇରେ ଅଭିମୁଖେ ଗସ୍ତ କରିବାର କାର୍ଯ୍ୟସୂଚୀ ରହିଛି।