ନୂଆଦିଲ୍ଲୀ,୧।୩: ଶ୍ରୀଲଙ୍କା ବିପକ୍ଷରେ ମୋହାଲିରେ ମାର୍ଚ୍ଚ ୪ରୁ ପ୍ରଥମ ଟେଷ୍ଟ ମ୍ୟାଚ୍ ଖେଳିବ ଭାରତ। ଏହା ପୂର୍ବତନ ଅଧିନାୟକ ବିରାଟ କୋହଲିଙ୍କ ଲାଗି ବେଶ ଗୁରୁତ୍ୱପୂର୍ଣ୍ଣ। କାରଣ ଏହା ତାଙ୍କ କ୍ୟାରିୟରର ୧୦୦ତମ ଟେଷ୍ଟ ମ୍ୟାଚ୍। ବିରାଟଙ୍କ ବ୍ୟତିତ ତାଙ୍କ ପ୍ରଶଂସକମାନେ ଏହି ମୁକାବିଲାକୁ ଅପେକ୍ଷା କରି ରହିଛନ୍ତି। ଶତକ ହାସଲ କରି ବିରାଟ ଏହି ଦିନକୁ ସ୍ମରଣୀୟ କରିଦିଅନ୍ତୁ ବୋଲି ପ୍ରଶଂସକ ଚାହୁଁଛନ୍ତି।
ଶେଷଥର ପାଇଁ ୨୦୧୯ ନଭେମ୍ବର ୨୨ରେ ବାଂଲାଦେଶ ବିପକ୍ଷରେ ଖେଳାଯାଇଥିବା ଦିବାରାତ୍ର ମ୍ୟାଚ୍ରେ ଶତକ ମାରିଥିଲେ ବିରାଟ। ତାଙ୍କ ଟେଷ୍ଟ କ୍ୟାରିୟରର ଏହା ୨୭ତମ ଶତକ ଥିଲା। ଏହାପରଠାରୁ ଖରାପ ଫର୍ମକୁ ନେଇ ଚର୍ଚ୍ଚାରେ ଅଛନ୍ତି ସେ। ଗତ ତିନି ବର୍ଷ ଧରି ତାଙ୍କ ବ୍ୟାଟ୍୍ରୁ ଶତକ ବାହାରି ନାହିଁ। ଏପରି ସ୍ଥିତିରେ ପୁଣି ଥରେ ସେ ନିଜ ଫର୍ମକୁ ଫେରି ଶତକ ହାସଲ କରନ୍ତୁ ବୋଲି ପ୍ରଶଂସକମାନେ ପ୍ରାର୍ଥନା କରୁଥିବା ଦେଖାଯାଇଛି।
ଏଯାବତ ବିରାଟ ମୋଟ ୭୦ ଅନ୍ତର୍ଜାତୀୟ ଶତକ ମାରିଛନ୍ତି। ଏଥିରେ ୪୩ ଦିନିକିଆ ଶତକ ରହିଥିବା ବେଳେ ସେ ସର୍ବାଧିକ ଶତକ ମାରିଥିବା କ୍ରିକେଟର ତାଲିକାରେ ସେ ତୃତୀୟ ସ୍ଥାନରେ ଅଛନ୍ତି। ଏହି ତାଲିକା ଶୀର୍ଷରେ ମହାନ ବ୍ୟାଟ୍ସମ୍ୟାନ ସଚିନ ତେନ୍ଦୁଲକର(୧୦୦ ଶତକ) ଏବଂ ଦ୍ୱିତୀୟ ସ୍ଥାନରେ ଅଷ୍ଟ୍ରେଲିଆର ପୂର୍ବ ଅଧିନାୟକ ରିକି ପଣ୍ଟିଂ(୭୧) ଅଛନ୍ତି। ଯଦି ବିରାଟ ମୋହାଲି ଟେଷ୍ଟରେ ଶତକ ମାରିବାରେ ସଫଳ ହୁଅନ୍ତି ତେବେ ସେ ରିକି ପଣ୍ଟିଂଙ୍କ ରେକର୍ଡର ସମକକ୍ଷ ହୋଇଯିବେ। ଏହାଛଡ଼ା ଏହି ଉପଲବ୍ଧି ହାସଲ କରିଥିବା ପ୍ରଥମ ଭାରତୀୟ ବ୍ୟାଟ୍ସମ୍ୟାନ ସେ ପାଲଟିବେ। ସାରା ବିଶ୍ୱରେ ମୋଟ ୭୦ ଖେଳାଳି ୧୦୦ତମ ଟେଷ୍ଟ ଖେଳିଥିବା ବେଳେ କେବଳ ୯ଜଣ ଏଥିରେ ଶତକ ହାସଲ କରିଛନ୍ତି।
