ଅହମ୍ମଦାବାଦ,୩୦।୪ : ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର (ଆର୍ସିବି)ର ଦୁର୍ବଳତା ପୁଣି ଥରେ ପଦାରେ ପଡ଼ିଛି। ଟପ୍ ଅର୍ଡର ଉପରେ ହିଁ ଆର୍ସିବି ସମ୍ପୂର୍ଣ୍ଣ ନିର୍ଭରଶୀଳ। ଉପର କ୍ରମର ଷ୍ଟାର ବ୍ୟାଟ୍ସମ୍ୟାନ ଫେଲ୍ ମାରିଲେ, କଥା ଶେଷ। ସେଭଳି କିଛି ଦୃଶ୍ୟ ଶୁକ୍ରବାର କିଙ୍ଗ୍ସ ପଞ୍ଜାବ ବିପକ୍ଷ ମ୍ୟାଚ୍ରେ ଦେଖିବାକୁ ମିଳିଲା। ଲୋକେଶ ରାହୁଲଙ୍କ ପଞ୍ଜାବ ୩୪ ରନ୍ରେ ବାଙ୍ଗାଲୋରକୁ ହରାଇ ଦେଇଛି। ବିଜୟ ଯୋଗୁ ୬ ପଏଣ୍ଟ ସହ ପଞ୍ଚମ ସ୍ଥାନକୁ ଉଠିଛି ପଞ୍ଜାବ। ଅନ୍ୟପକ୍ଷରେ ପରାଜୟ ସତ୍ତ୍ୱେ ୩ୟ ସ୍ଥାନ ବଜାୟ ରଖିଛି ବାଙ୍ଗାଲୋର (୧୦ ପଏଣ୍ଟ)।
ଇନିଂସ ଆରମ୍ଭରୁ ଅଧିନାୟକ ରାହୁଲ ଓ କ୍ରିସ ଗେଲ୍ ପଡ଼ିଆର ଚାରିଆଡ଼େ ଛକା, ଚୌକାର ବର୍ଷା କରିଥିଲେ। ଦ୍ୱିତୀୟ ଉଇକେଟ ଲାଗି ୭ ଓଭରରେ ୮୦ ରନ୍ କରିଥିଲେ ଏହି ଦୁଇ ବ୍ୟାଟ୍ସମ୍ୟାନ। ଗେଲ (୪୬ ରନ୍, ୬ ଚୌକା ଓ ୨ ଛକା)ଙ୍କ ଉଇକେଟ ସହ ମ୍ୟାଚ୍କୁ ଫେରିଥିଲା ଆରସିବି। ମାତ୍ର ୧୯ ରନ୍ରେ ୪ ଉଇକେଟ ହରାଇ ଦିଗହରା ହୋଇଯାଇଥିଲା ପଞ୍ଜାବର ଇନିଂସ। କିନ୍ତୁ ଶେଷକୁ ରାହୁଲ ଓ ହରପ୍ରୀତ ଦଳକୁ ଦେଇଥିଲେ ଭଲ ଫିନିଶ। ଦୁହେଁ ଅନ୍ତିମ ୩୨ ବଲରେ ଦଳୀୟ ସ୍କୋରରେ ଯୋଡ଼ି ଥିଲେ ୬୧ ରନ୍। ଫଳରେ ୫ ଉଇକେଟ ହରାଇ ୧୭୯ ରନ୍ କରିବାକୁ ସକ୍ଷମ ହୋଇଥିଲା ପଞ୍ଜାବ। ରାହୁଲ ୯୧ *(୭ ଚୌକା ଓ ୫ ଛକା) ଓ ବ୍ରାର ୨୫* (୧ ଚୌକା ଓ ୨ ଛକା) ରନ୍ କରିଥିଲେ।
ଜବାବରେ କୋହଲି(୩୫)ଙ୍କୁ ଛାଡ଼ି ଦେଲେ ଫେଲ୍ ମାରିଥିଲେ ଆର୍ସିବିର ପ୍ରତ୍ୟେକ ବ୍ୟାଟ୍ସମ୍ୟାନ। ଗ୍ଲେନ ମ୍ୟାକ୍ସଓ୍ବେଲ (୦) ଓ ଏବି ଡି’ ଭିଲର୍ସ (୩)ଙ୍କ ଉଇକେଟ ପଡ଼ିବା ପରେ ଆତ୍ମସମର୍ପଣ କରିଦେଇଥିଲା ଆରସିବି। ଶେଷ ଆଡ଼କୁ ହର୍ଶଲ ପଟେଲ (୩୧ ରନ୍, ୩ ଚୌକା ଓ ୨ ଛକା) ଓ କାଇଲ ଜାମିଶନ (୧୧ ରନ୍, ୧ ଲେଖାଏ ଚୌକା ଓ ଛକା) କିଛି ବଡ଼ ଶଟ୍ ଖେଳିଥିଲେ। ଫଳରେ ବାଙ୍ଗାଲୋର ୮ ଉଇକେଟ ହରାଇ ୧୪୫ ରନ୍ କରିବାକୁ ସକ୍ଷମ ହୋଇଥିଲା।