ଆବୁଧାବି, ୩।୧୦: ଚଳିତ ଆଇପିଏଲ୍ରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋରର ଅଧିନାୟକ ବିରାଟ କୋହଲିଙ୍କ ପ୍ରଦର୍ଶନ ବେଶ୍ ନୈରାଶ୍ୟଜନକ ରହିଛି। ପ୍ରଥମ ୩ଟି ମ୍ୟାଚ୍ରେ ସେ ଯଥାକ୍ରମେ ୩, ୧ ଓ ୧୪ ରନ୍ ସଂଗ୍ରହ କରିଛନ୍ତି। ତେବେ ଶନିବାର ବିରାଟଙ୍କ ନିକଟରେ ଏକ କୀର୍ତ୍ତିମାନ ସ୍ଥାପନ କରିବାର ସୁଯୋଗ ରହିଛି। ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର ବିପକ୍ଷ ମ୍ୟାଚ୍ରେ ସେ ଯଦି ଆଉ ୮୨ ରନ୍ ସଂଗ୍ରହ କରନ୍ତି ତେବେ ଟି୨୦ରେ ୯ ହଜାର ରନ୍ ପୂରଣ କରିବେ। କୋହଲି ଆଇପିଏଲ୍ରେ ୧୮୦ ମ୍ୟାଚ୍ ଖେଳି ୫,୪୩୦ ରନ୍ କରିଛନ୍ତି। ଯାହା ମଧ୍ୟରେ ୫ ଶତକ ଓ ୩୬ ଅର୍ଦ୍ଧଶତକ ସାମିଲ ରହିଛି। ଆଇପିଏଲ୍ରେ ସର୍ବାଧିକ ରନ୍ ସଂଗ୍ରହକାରୀ ବ୍ୟାଟ୍ସମ୍ୟାନ ତାଲିକାରେ ସେ ସର୍ବାଗ୍ରେ ରହିଛନ୍ତି। କିନ୍ତୁ କୋହଲି ଓଭରଅଲ୍ (ଜାତୀୟ, ଅନ୍ତର୍ଜାତୀୟ ଓ ଟି୨୦ ଲିଗ୍) ତାଙ୍କ ଟି୨୦ କ୍ୟାରିୟରରେ ୮୯୧୮ ରନ୍ କରିଛନ୍ତି। ଯଦି ସେ ଶନିବାର ରାଜସ୍ଥାନ ବିପକ୍ଷରେ ୮୨ ରନ୍ ସଂଗ୍ରହ କରନ୍ତି ତେବେ ଟି୨୦ରେ ୯ ହଜାର ରନ୍ ପୂରଣ କରିବେ। ଏଥିସହ ଏହି ସଫଳତା ହାସଲ କରିବାରେ ସେ ପ୍ରଥମ ଭାରତୀୟ ବ୍ୟାଟ୍ସମ୍ୟାନ ହେବାର ସୌଭାଗ୍ୟ ଲାଭ କରିବେ। ତେବେ ମୋଟ୍ ଉପରେ ବିଶ୍ୱର ୭ମ ବ୍ୟାଟ୍ସମ୍ୟାନ ଭାବେ କୋହଲି ଟି୨୦ରେ ଏହି ମାଇଲଖୁଣ୍ଟ ଛୁଇଁବେ।