ନୂଆଦିଲ୍ଲୀ,୨୦।୫: କଥାରେ ଅଛି ଅପେକ୍ଷାର ଫଳ ମିଠା। ସେଭଳି କିଛି ଘଟିଛି ଭାରତର ପୂର୍ବତନ ଅଧିନାୟକ ବିରାଟ କୋହଲିଙ୍କ କ୍ଷେତ୍ରରେ। ଦୀର୍ଘ ୩ ବର୍ଷ ହେଲା ଫର୍ମରେ ନ ଥିବାକୁ ନେଇ ସମାଲୋଚିତ ହୋଇ ଆସୁଛନ୍ତି ସେ। ବ୍ୟକ୍ତିଗତ ଭାବେ ବିଫଳ ହେବା ଯୋଗୁ ସେ ଅଧିନାୟକ ପଦ ମଧ୍ୟ ଛାଡ଼ି ଖେଳାଳି ଭାବେ ଦଳ ସହ ଯୋଡ଼ି ହୋଇ ରହିବାକୁ ପସନ୍ଦ କରିଥିଲେ। ଏହା ସତ୍ତ୍ୱେ ବିଫଳ ହୋଇ ଆସୁଥିଲେ ବିରାଟ। ହେଲେ ଚଳିତ ଆଇପିଏଲ୍ ସିଜନ୍ରେ ଗୁରୁବାର ଗୁଜରାଟ ଟାଇଟନ୍ସ ବିପକ୍ଷରେ ଖେଳାଯାଇଥିବା ମ୍ୟାଚ୍ରେ ଧୂଆଁଧାର ବ୍ୟାଟିଂ କରିଛନ୍ତି ସେ। ଆବଶ୍ୟକତା ସମୟରେ ୭୩ ରନ୍ର ଇନିଂସ କରି ଦଳକୁ ଜିତାଇଛନ୍ତି ସେ। ଏଥିଲାଗି ତାଙ୍କୁ ‘ପ୍ଲେୟର ଅଫ୍ ଦ ମ୍ୟାଚ୍’ ଭାବେ ଚୟନ କରାଯାଇଥିଲା।
ବିରାଟଙ୍କ ଏହି ଇନିଂସ ତାଙ୍କର ଶୁପ୍ତ ଆତ୍ମବିଶ୍ୱାସକୁ ଉଠାଇବ ବୋଲି କୁହାଯାଉଛି। ଏହି ପାଳିରେ ପ୍ରଶଂସକ ତାଙ୍କୁ ପୁରୁଣା ରୂପରେ ଦେଖିଥିଲେ। ବିରୋଧି ଦଳର ବୋଲର୍ଙ୍କ ଉପରେ ଭାରି ପଡ଼ିଥିଲେ ସେ। ଯେତେବେଳେ ସେ ମହମ୍ମଦ ଶାମୀଙ୍କ ବଲ୍ରେ ପ୍ରଥମ ଶଟ୍ ମାରିଥିଲେ ସେତେବେଳେ ଦିନ ତାଙ୍କର ହୋଇପାରେ ବୋଲି ଭାବିଥିବା ସେ ପ୍ରକାଶ କରିଛନ୍ତି।
୨୦୧୯ରେ ଶେଷଥର ପାଇଁ ବିରାଟ ଶତକ ମାରିଥିଲେ। ଏହାପରଠାରୁ ସେ ଶତକଟିଏ ମାରି ନାହାନ୍ତି। କେବଳ ଏତିକି ନୁହେଁ ରନ୍ କରିବାରେ ମଧ୍ୟ ସେ ବିଫଳ ହେଉଛନ୍ତି। ଆଇପିଏଲ୍ ୨୦୨୨ରେ ସେ ୩ ଥର ଗୋଲ୍ଡେନ୍ ଡକ୍ରେ ଆଉଟ୍ ହୋଇ ଚର୍ଚ୍ଚାକୁ ମଧ୍ୟ ଆସିଥିଲେ।
ତେବେ ବିରାଟ ଏଯାବତ ୧୪ ମ୍ୟାଚ୍ ଖେଳିଥିବା ବେଳେ ୩୦୯ ରନ୍ କରିଛନ୍ତି। ଏଥିରେ ୨ ଅର୍ଦ୍ଧଶତକ ରହିଛି। ଏହାଛଡ଼ା ତାଙ୍କ ପାଳିରେ ୩୦ ଚୌକା ଏବଂ ୭ ଛକା ରହିଛି।
