ଦୁବାଇ,୨୭।୧୨: ଚଳିତ ଦଶନ୍ଧିର ପ୍ରତ୍ୟେକ ଫର୍ମାଟ ପାଇଁ ରବିବାର ଶ୍ରେଷ୍ଠ ଦଳ ଘୋଷଣା କରିଛି ଅନ୍ତର୍ଜାତୀୟ କ୍ରିକେଟ ପରିଷଦ (ଆଇସିସି)। ଟି୨୦ ଓ ଦିନିକଆ ଫର୍ମାଟରେ ଭାରତୀୟ ଦଳର ଅଧିକ ଖେଳାଳିଙ୍କୁ ସ୍ଥାନ ମିଳିଛି। ଆଇସିସିର ଉଭୟ ଦିନିକିଆ ଓ ଟି୨୦ ଦଳରେ ସ୍ଥାନ ପାଇଥିବା ଭାରତୀୟ ଖେଳାଳିମାନେ ହେଲେ ବିରାଟ କୋହଲି, ରୋହିତ ଶର୍ମା ଓ ମହେନ୍ଦ୍ର ସିଂ ଧୋନୀ। ଯଶ୍ରପୀତ ବୁମରାଙ୍କୁ କେବଳ ଛୋଟିଆ ଫର୍ମାଟ ଲାଗି ଘୋଷିତ ଦଳରେ ଯାଗା ମିଳିଥିବାବେଳେ ଟେଷ୍ଟ ଦଳରେ ସ୍ଥାନ ପାଇଛନ୍ତି ରବିଚନ୍ଦ୍ରନ ଅଶ୍ୱିନ। ତାଙ୍କ ବ୍ୟତୀତ ଅନ୍ୟ ଭାରତୀୟ ଭାବେ କୋହଲିଙ୍କୁ ଟେଷ୍ଟ ଦଳରେ ସୁଯୋଗ ମିଳିଛି। ଧୋନୀଙ୍କୁ ସୀମିତ ଓଭର କ୍ରିକେଟ ଦଳର ଅଧିନାୟକ ଚୟନ କରାଯାଇଥିବା ବେଳେ କୋହଲିଙ୍କୁ ଟେଷ୍ଟ ଦଳର ନେତୃତ୍ୱ ଦିଆଯାଇଛି।
ଦଶନ୍ଧିର ଟି୨୦ ପୁରୁଷ ଦଳରେ ସ୍ଥାନ ପାଇଥିବା ଅନ୍ୟ ଖେଳାଳିମାନେ ହେଲେ କ୍ରିସ୍ ଗେଲ, ଆରୋନ ଫିଞ୍ଚ, ଏବି ଡି ଭିଲିୟର୍ସ, ଗ୍ଲେନ ମ୍ୟାକ୍ସଓ୍ବେଲ, କିରନ ପୋଲାର୍ଡ, ରଶିଦ ଖାନ ଓ ଲାସିଥ ମଲିଙ୍ଗା।
ଭାରତୀୟ ଖେଳାଳିଙ୍କ ବ୍ୟତୀତ ଦିନିକିଆ ଦଳରେ ଡେଭିଡ୍ ଓ୍ବାର୍ନର, ଡି ଭିଲିୟର୍ସ, ଶାକିବ ଅଲ ହାସନ, ବେନ ଷ୍ଟୋକ୍ସ, ମିଚେଲ ଷ୍ଟାର୍କ, ଟ୍ରେଣ୍ଟ ବୋଲ୍ଟ, ଇମ୍ରାନ ତାହିର ଓ ମଲିଙ୍ଗାଙ୍କୁ ସାମିଲ କରାଯାଇଛି।
କୋହଲି ଓ ଅଶ୍ୱିନଙ୍କ ବ୍ୟତୀତ ଟେଷ୍ଟ ଦଳରେ ଆଲେଷ୍ଟର କୁକ୍, ଓ୍ବାର୍ନର, କେନ ଓ୍ବିଲିୟମସନ, ଷ୍ଟିଭ ସ୍ମିଥ, କୁମାର ସଙ୍ଗକାରା, ଷ୍ଟୋକ୍ସ, ଡେଲ ଷ୍ଟେନ, ଷ୍ଟୁଆର୍ଟ ବ୍ରଡ ଓ ଜେମ୍ସ ଆଣ୍ଡରସନ।
