ନୂଆଦିଲ୍ଲୀ,୬।୮: ଏକ ବର୍ଷରୁ ଅଧିକ ସମୟ ଧରି ଖରାପ ଫର୍ମ ଜାରି ରଖିଛନ୍ତି ଭାରତୀୟ ଅଧିନାୟକ ବିରାଟ କୋହଲି। ଏବେ ଦଳ ଇଂଲଣ୍ଡ ଗସ୍ତରେ ଥିବା ବେଳେ ପ୍ରଶଂସକମାନେ ତାଙ୍କଠାରୁ ବହୁତ କିଛି ଆଶା କରିଥିଲେ। ହେଲେ ଗୁରୁବାର ପ୍ରଥମ ଇନିଂସରେ ପଡ଼ିଆକୁ ଓହ୍ଲାଇ ସେ ଜେମ୍ସ ଆଣ୍ଡରସନଙ୍କ ବଲ୍ରେ ଆଉଟ୍ ହୋଇଯାଇଥିଲେ।ଏହାଦ୍ୱାରା ସେ ଅନେକ ଲଜ୍ଜାଜନକ ରେକର୍ଡ ନିଜ ନାମରେ କରିଛନ୍ତି ଯେଉଁଥିରେ ସେ ପୂର୍ବତନ ଅଧିନାୟକ ମହେନ୍ଦ୍ର ସିଂହ ଧୋନିଙ୍କୁ ପଛରେ ପକାଇଛନ୍ତି।
ଗୁରୁବାର ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ବିରାଟ ଚେତେଶ୍ୱର ପୂଜାରାଙ୍କ ଉଇକେଟ ଯିବା ପରେ ପଡ଼ିଆକୁ ଓହ୍ଲାଇଥିଲେ। ହେଲେ ଜେମ୍ସ ଆଣ୍ଡରସନଙ୍କ ବଲ୍ରେ କୌଣସି ରନ୍ ନ କରି ଆଉଟ୍ ହୋଇଥିଲେ। ଫଳରେ ସେ ଜଣେ ଭାରତୀୟ ଅଧିନାୟକ ଭାବେ ଟେଷ୍ଟ କ୍ରିକେଟରେ ସର୍ବାଧିକ ଥର ଶୂନରେ ଆଉଟ୍ ହୋଇଥିବା ଖେଳାଳି ପାଲଟିଛନ୍ତି।
ଏପରି ରହିଛି ତାଲିକା:
୧-ବିରାଟ କୋହଲି-୯ ଥର
୨-ମହେନ୍ଦ୍ର ସିଂହ ଧୋନୀ-୮ ଥର
୩-ଏମ୍ଏକେ ପଟୌଦି-୭ ଥର
ଏହାଛଡ଼ା ଟେଷ୍ଟ କ୍ରିକେଟରେ ଇଂଲଣ୍ଡ ବିପକ୍ଷରେ ୬ ଥର ଶୂନରେ ଆଉଟ୍ ହୋଇଥିବା ବେଳେ ଅନ୍ୟ ଦଳ ବିରୋଧରେ ୭ ଥର ଆଉଟ୍ ହୋଇଛନ୍ତି।
ଅନ୍ତର୍ଜାତୀୟ କ୍ରିକେଟରେ ଆଣ୍ଡରସନଙ୍କ ବଲ୍ରୁ ସର୍ବାଧିକ ଥର ଆଉଟ୍ ହୋଇଥିବା ଖେଳାଳିମାନଙ୍କ ଭିତରେ ତୃତୀୟ ସ୍ଥାନରେ ଅଛନ୍ତି ବିରାଟ। ମହାନ କ୍ରିକେଟର ସଚିନ ତେନ୍ଦୁଲକର ଏହି ତାଲିକା ଶୀର୍ଷରେ ଅଛନ୍ତି। ସେହିଭଳି ‘ଗୋଲ୍ଡେନ୍ ଡକ୍’ ଅର୍ଥାତ ପ୍ରଥମ ବଲ୍ରେ ସର୍ବାଧିକ ଥର ଶୂନରେ ଆଉଟ୍ ହୋଇଥିବା ଭାରତୀୟ ଅଧିନାୟକ ପାଲଟିଛନ୍ତି ବିରାଟ। ସେ ୩ ଥର ସେପରି ହୋଇଛନ୍ତି।