ନୂଆଦିଲ୍ଲୀ,୧୯।୩: ଇଂଲଣ୍ଡ ବିପକ୍ଷ ଚତୁର୍ଥ ଟି୨୦ ମ୍ୟାଚ୍ରେ ତୃତୀୟ ଅମ୍ପାୟାରଙ୍କ ଏକାଧିକ ଭୁଲ ନିଷ୍ପତ୍ତି ଅନେକଙ୍କୁ ଚକିତ କରିଥିଲା। ବିଶେଷକରି ଭଲ ଖେଳୁଥିବା ସୂର୍ଯ୍ୟକୁମାର ଯାଦବଙ୍କ ଉଇକେଟ ଯିବା ଅନେକଙ୍କୁ ନିରାଶ କରିଥିଲା। ଟେଲିଭିଜନ ରିପ୍ଲେରେ ପ୍ରମାଣ ନ ମିଳିବା ପରେ ପଡ଼ିଆରେ ଥିବା ଅମ୍ପାୟାରଙ୍କ ‘ସଫ୍ଟ ସିଗ୍ନାଲ’କୁ ଠିକ୍ ଦର୍ଶାଇ ଆଉଟ୍ ବୋଲି କହିଥିଲେ। ଏହି ଘଟଣାକୁ ନେଇ ରାଗି ଯାଇଥିଲେ ଅଧିନାୟକ ବିରାଟ କୋହଲି। ତାଙ୍କୁ ମ୍ୟାଚ୍ ପରେ ଏନେଇ ପଚରାଯିବା ପରେ ସେ କହିଥିଲେ, ଟେଷ୍ଟ ସିରିଜ୍ରେ ଅଜିଙ୍କ୍ୟ ରାହାନେ ମଧ୍ୟ ଗୋଟିଏ କ୍ୟାଚ୍ ଧରିଥିଲେ, ଯାହାକୁ ନେଇ ଆଶ୍ୱସ୍ତ ନ ଥିଲେ। ଯେତେବେଳେ ପରିଶ୍ରମ ଅଧାରୁ ଅଧା ହୋଇଥାଏ ସେତେବେଳେ ସଫ୍ଟ ସିଗ୍ନାଲ ପ୍ରମୁଖ ହୋଇଯାଇଥାଏ। ଅମ୍ପାୟାରମାନଙ୍କ ପାଇଁ ମଧ୍ୟ ମୋତେ ଜଣା ନାହିଁ ବୋଲି କିଛି ରହିବା ଆବଶ୍ୟକ। ଖେଳ ଠିକ୍ ଭାବେ ଚାଲୁ ସେଥିପାଇଁ ଏସବୁ ଜିନିଷ ସଜଡା ଯିବା ଆବଶ୍ୟକ। ଆମକୁ ପଡ଼ିଆରେ ସ୍ପଷ୍ଟତା ଆବଶ୍ୟକ ବୋଲି ବିରାଟ କହିଛନ୍ତି।
ପ୍ରକାଶ ଯେ, ସୂର୍ଯ୍ୟକୁମାର ୫୭ରନ୍ କରି ବ୍ୟାଟିଂ କରୁଥିବା ବେଳେ ସାମ୍ କୁରାନଙ୍କ ଓଭରରେ ଫାଇନ୍ ଲେଗ୍ ଆଡକୁ ଖେଳିବାକୁ ଚେଷ୍ଟା କରି କ୍ୟାଚ୍ ଦେଇଥିଲେ। ଏହାକୁ ଡେଭିଡ ମଲାନ ଧରିଥିଲେ। ପଡ଼ିଆରେ ଥିବା ଅମ୍ପାୟାର ଏହାକୁ ଆଉଟ୍ ବୋଲି କହିଥିଲେ। ହେଲେ ପରେ ସ୍ଥିତି ଏଭଳି ହେଲା ଏହାକୁ ତୃତୀୟ ଅମ୍ପାୟାରଙ୍କ ପାଖକୁ ପଠାଯାଇଥିଲା। ରିପ୍ଲେ ଦେଖାଯିବା ପରେ ବଲ୍ଟି ଘାସ ସ୍ପର୍ଶ କରିଥିବା ଦେଖାଯାଇଥିଲା। ତଥାପି ଅମ୍ପାୟାର ବିରେନ୍ଦ୍ର ଶର୍ମା କ୍ରିକେଟର ଆଉଟ୍ ନିଷ୍ପତ୍ତି ପୂର୍ବବତ ରଖିଥିଲେ।