ନୂଆଦିଲ୍ଲୀ,୯।୧୧: ବିରାଟ କୋହଲି ଭାରତୀୟ ଟି୨୦ ଦଳର ଅଧିନାୟକ ପଦ ଛାଡ଼ିବା ପରେ ରୋହିତ ଶର୍ମାଙ୍କୁ ଦିଆଯାଇଛି ଗୁରୁଦାୟିତ୍ୱ। ଆସନ୍ତା ୧୭ ତାରିଖରୁ ନ୍ୟୁଜିଲାଣ୍ଡ ବିପକ୍ଷରେ ଆରମ୍ଭ ହେବାକୁ ଯାଉଛି ୩ ମ୍ୟାଚ୍ ବିଶିଷ୍ଟ ଟି୨୦ ସିରିଜ୍। ଏଥିଲାଗି ମଙ୍ଗଳବାର ୧୬ ଜଣିଆ ଭାରତୀୟ ଦଳ ଘୋଷଣା କରାଯାଇଛି। ପୂର୍ବତନ ଅଧିନାୟକ କୋହଲିଙ୍କୁ ଏହି ସିରିଜ୍ରୁ ବିଶ୍ରାମ ଦିଆଯାଇଛି।
କୋହଲି ଟି୨୦ ଦଳର ନେତୃତ୍ୱ ଛାଡ଼ି ସାରିଥିବାରୁ ଭେଟେରାନ ଓପନର ରୋହିତଙ୍କୁ ଅଧିନାୟକ ପଦ ଦିଆଯିବ ବୋଲି ଆଶା କରାଯାଉଥିଲା। ତାହା ହିଁ ଘଟିଛି। ରୋହିତଙ୍କୁ ଉପ ଅଧିନାୟକ ଭାବେ ସହାୟତା କରିବେ ଷ୍ଟାର ଉଇକେଟ ବ୍ୟାଟ୍ସମ୍ୟାନ ଲୋକେଶ ରାହୁଲ। ଦଳରେ ଉଇକେଟକିପର ବ୍ୟାଟର ରିଷଭ ପନ୍ତ, ସୂର୍ଯ୍ୟକୁମାର ଯାଦବ, ଇଶାନ କିଷନ, ରବିଚନ୍ଦ୍ରନ ଅଶ୍ୱିନ ଓ ଭୁବନେଶ୍ୱର କୁମାରଙ୍କୁ ଯାଗା ମିଳିଛି। ଏମାନେ ଟି୨୦ ବିଶ୍ୱକପ୍ରେ ଭାରତୀୟ ଦଳର ଅଂଶ ଥିଲେ। ଷ୍ଟାଣ୍ଡବାଇ ଖେଳାଳି ଭାବେ ସ୍ଥାନ ପାଇଥିବା ଦୀପକ ଚହର, ଶେୟାସ ଆୟର ଓ ଅକ୍ଷର ପଟେଲଙ୍କୁ ନ୍ୟୁଜିଲାଣ୍ଡ ବିପକ୍ଷ ସିରିଜ୍ ଲାଗି ଦଳରେ ରଖାଯାଇଛି।
ଭାରତୀୟ ଟି୨୦ ଦଳ: ରୋହିତ ଶର୍ମା (ଅଧିନାୟକ), ଲୋକେଶ ରାହୁଲ (ଉପ ଅଧିନାୟକ), ରୁତୁରାଜ ଗାଏକ୍ୱାଡ, ଶ୍ରେୟାସ ଆୟର, ସୂର୍ଯ୍ୟକୁମାର ଯାଦବ, ରିଷଭ ପନ୍ତ ଓ ଇଶାନ କିଷନ, ଭେଙ୍କଟେଶ ଆୟାର, ୟୁଜବେନ୍ଦ୍ର ଚହଲ, ରବିଚନ୍ଦ୍ରନ ଅଶ୍ୱିନ, ଅକ୍ଷର ପଟେଲ, ଅଭେଶ ଖାନ, ଭୁବନେଶ୍ୱର କୁମାର, ଦୀପକ ଚହର, ହର୍ଶଲ ପଟେଲ ଓ ମହମ୍ମଦ ସିରାଜ।