ଦୁବାଇ,୨୩।୧୦: ଭାରତୀୟ ଅଧିନାୟକ ବିରାଟ କୋହଲି ଶନିବାର ପାକିସ୍ତାନକୁ ଏକ ଶକ୍ତିଶାଳୀ ଦଳ ବୋଲି କହିଛନ୍ତି। ଟି୨୦ ଓ ଦିନିକିଆ ବିଶ୍ୱକପ୍ରେ ଦୁଇ ଚିରପ୍ରତିଦ୍ୱନ୍ଦ୍ୱୀ ଦଳ ୧୨ ଥର ପରସ୍ପରକୁ ଭେଟିଛନ୍ତି। ପ୍ରତ୍ୟେକ ଥର ପାକିସ୍ତାନକୁ ପରାଜୟର ମୁହଁ ଦେଖିବାକୁ ପଡ଼ିଛି।
“ଆମେ କଦାପି ରେକର୍ଡ ଓ ପୂର୍ବ ପ୍ରଦର୍ଶନ ସମ୍ପର୍କରେ ଆଲୋଚନା କରୁ ନାହିଁ। ଏଭଳି ତଥ୍ୟ ବିଭ୍ରାନ୍ତ କରେ। ସବୁଠୁ ଗୁରୁତ୍ୱପୂର୍ଣ୍ଣ କଥା ହେଲା ନିର୍ଦ୍ଦିଷ୍ଟ ମ୍ୟାଚ୍ରେ ଆମ ଯୋଜନାକୁ ଆମେ କେଉଁ ଭଳି କାର୍ଯ୍ୟକାରୀ କରୁଛେ। ମୋ ମତରେ ପାକିସ୍ତାନ ଏକ ଶକ୍ତିଶାଳୀ ଦଳ। ତାଙ୍କ ବିପକ୍ଷରେ ଆମକୁ ଶ୍ରେଷ୍ଠ କ୍ରିକେଟ ଖେଳିବାକୁ ପଡ଼ିବ। କାରଣ ତାଙ୍କ ପାଖରେ ଅନେକ ପ୍ରତିଭାଶାଳୀ ଖେଳାଳି ଅଛନ୍ତି, ଯେଉଁମାନେ ହଠାତ୍ ମ୍ୟାଚ୍ ବଦଳାଇ ଦେଇପାରିବେ” ବୋଲି ବହୁ ପ୍ରତିକ୍ଷିତ ମ୍ୟାଚ୍ ପୂର୍ବରୁ ଆୟୋଜିତ ଖବରଦାତା ସମ୍ମିଳନୀରେ କୋହଲି କହିଛନ୍ତି।