ଦୁବାଇ,୩୦।୯: ଆଇପିଏଲ୍ ୨୦୨୧ ଦ୍ୱିତୀୟ ପର୍ଯ୍ୟାୟ ମ୍ୟାଚ୍ରେ ଦ୍ୱିତୀୟ କ୍ରମାଗତ ବିଜୟ ପରେ ରୟାଲ ଚ୍ୟାଲେଞ୍ଜର୍ସ ବାଙ୍ଗାଲୋର(ଆର୍ସିବି) ଅଧିନାୟକ ବିରାଟ କୋହଲିଙ୍କ ମନୋଭାବରେ ପରିବର୍ତ୍ତନ ଘଟିଛି। ବୁଧବାର ଅନୁଷ୍ଠିତ ମ୍ୟାଚ୍ ପରେ ସେ ଅତ୍ୟନ୍ତ ଦୃଢ଼ ମନା ସହ ବିବୃତ୍ତି ରଖିଥିଲେ। ରାଜସ୍ଥାନ ରୟାଲ୍ସ ବିପକ୍ଷ ଚମତ୍କାର ବିଜୟ ପାଇଁ ସେ ବୋଲର୍ଙ୍କୁ ଶ୍ରେୟ ଦେବା ସହ ଏହା ଦଳ ପାଇଁ ଭଲ ସଙ୍କେତ ବୋଲି କହିଥିଲେ।
ଶେଷ ୯ ଓଭରରେ ରାଜସ୍ଥାନ ଟିମ୍ ୪୯ ରନ୍ କରିପାରିଥିଲା। ଏହି ସମୟ ମଧ୍ୟରେ ୮ ଉଇକେଟ ଯାଇଥିଲା। ଫଳରେ ରାଜସ୍ଥାନ ୯ ଉଇକେଟରେ ୧୫୦ ରନ୍ର ଟାର୍ଗେଟ ଆର୍ସିବିକୁ ଦେଇଥିଲା। ପରେ ୩ ଉଇକେଟ ହରାଇ ଆର୍ସିବି ୧୭.୧ ଓଭରରେ ଏହାକୁ କରିନେଇ ସହଜ ବିଜୟ ନିଜ ନାମରେ କରିଥିଲା।
ତେବେ ମ୍ୟାଚ୍ ପରେ ଦଳର ବିଜୟକୁ ନେଇ ଉତ୍ସାହିତ ଥିଲେ କୋହଲି। ସେ କହିଥିଲେ, ଆମେ ଜାଣୁ ଆମ ପାଖରେ ଭଲ ବୋଲର୍ ଅଛନ୍ତି। ଯଦି ଆମେ ଉଇକେଟ ନେଉଛୁ ତେବେ ବିକଳ୍ପ ଖୋଲିଯିବ। ବ୍ୟାଟ୍ସମ୍ୟାନ୍ମାନେ ମଧ୍ୟ ନିଜ ଭୁଲକୁ ଦେଖିବା ସହ ଅନୁରୂପ ଭାବେ ଖେଳିବାକୁ ଚେଷ୍ଟା କରିଥିଲେ। ଭଲ ବୋଲିଂ ସହ ପ୍ରାରମ୍ଭିକ ବ୍ୟାଟିଂ ଭଲ ଯାଇଥିଲା। ଫଳରେ ଦଳ ମଜଭୂତ ପ୍ରତ୍ୟାବର୍ତ୍ତନ କରିଛି ବୋଲି ସେ କହିଛନ୍ତି।