ମୋହାଲି,୫।୩: ଶ୍ରୀଲଙ୍କା ବିପକ୍ଷରେ ଭାରତ ଖେଳୁଥିବା ପ୍ରଥମ ଟେଷ୍ଟ ପୂର୍ବତନ ଅଧିନାୟକ ବିରାଟ କୋହଲିଙ୍କ ପାଇଁ ସ୍ବତନ୍ତ୍ର ଥିଲା। କାରଣ ଏହା ତାଙ୍କ କ୍ୟାରିୟରର ୧୦୦ତମ ଟେଷ୍ଟ ମ୍ୟାଚ୍ ଥିଲା । ପ୍ରଶଂସକମାନେ ଖାସ୍ ଦିନକୁ ଖାସ୍ କରିବାକୁ ଯାଇ କୋହଲି ଶତକ ମାରିବେ ବୋଲି ଆଶା ରଖିଥିଲେ । ହେଲେ ସେ ୪୫ ରନ୍ କରି ବୋଲ୍ଡ ହୋଇଯାଇଥିଲେ । ଖେଳାଳି ଭାବେ ଏହା ତାଙ୍କୁ ନିରାଶ କରିଛି ।
ପ୍ରଥମ ଦିନ ଖେଳ ଶେଷ ହେବା ପରେ କୋହଲି କହିଛନ୍ତି, ମୋତେ ଲାଗିଲା ଯେପରି ଏହା ମୋର ପ୍ରଥମ ଟେଷ୍ଟ। ମନ ଅଶାନ୍ତ ଥିଲା । ନର୍ଭସ ମଧ୍ୟ। ପ୍ରଥମେ ବ୍ୟାଟିଂ ଭଲ ଥିଲା । ହେଲେ ଏପରି ଆଉଟ୍ ହେବା ଦୁଃଖ ଦେଇଛି । ଖେଳାଳି ଭାବେ ନିରାଶ ହେବା ସ୍ବାଭାବିକ । କାରଣ ଆମ ମନରେ ବଡ଼ ଇନିଂସ ଖେଳି ଦଳର ସ୍ଥିତିକୁ ମଜଭୂତ କରିବାର ଇଚ୍ଛା ରହିଥାଏ । ହେଲେ କରୋନା ସମୟରେ ଖେଳ ଉପରେ ଧ୍ୟାନ ଦେବାକୁ ସମୟ ମିଳିପାରୁନାହିଁ । ତିନୋଟି ଯାକ ଫର୍ମାଟ ସହ ଆଇପିଏଲ୍ରେ ଏତେ ସମୟ ଯାଏ ଖେଳିବା କଠିନ ଥିଲା । ତଥାପି ଶରୀରକୁ ସେଭଳି ଅନୁକୂଳ କରିବାକୁ ନେଇ ମୁଁ ଗର୍ବ କରେ ବୋଲି ସେ କହିଛନ୍ତି ।