ନୂଆଦିଲ୍ଲୀ,୧୯।୧୨: ଭାରତୀୟ ଦଳର ଅଧିନାୟକ ବିରାଟ କୋହଲି ନିଜର ଦୃଢ଼ ମାନସିକତା ପାଇଁ ଜଣାଶୁଣା। କ୍ରିକେଟ୍ ପଡ଼ିଆରେ ବିରାଟଙ୍କୁ ଦେଖିଲେ ଯେକେହି ତାହା ଠଉରାଇପାରିବ। ହେଲେ ସମସ୍ତଙ୍କ ଭଳି ପିରାଟଙ୍କ ଜୀବନରେ ମଧ୍ୟ ଖରାପ ସମୟ ଆସିଛି। ୨୦୧୪ରେ ଇଂଲଣ୍ଡ ବିପକ୍ଷରେ ଭଲ ପ୍ରଦର୍ଶନ କରି ନ ପାରିବା ଯୋଗୁ ସେ ଭାଙ୍ଗି ପଡ଼ିଥିଲେ। ତାଙ୍କ ଜୀବନରେ ନକରାତ୍ମକତା ଭରି ଯାଇଥିଲା ।
ନିକଟରେ କ୍ରିକେଟ ଅଷ୍ଟ୍ରେଲିଆ ବିରାଟ ଏକ ଭିଡିଓ ଶେୟାର କରିଥିଲା। ଏଥିରେ କୋହଲି କ୍ୟାରିୟରର ସବୁଠାରୁ ଖରାପ ସମୟକୁ ମନେ ପକାଇଥିଲେ। ସେଥିରେ ୨୦୦୯ ଆଇସିସି ଚମ୍ପିଆନ୍ସ ଟ୍ରଫିର ଦକ୍ଷିଣ ଆଫ୍ରିକା ବିପକ୍ଷ ଗ୍ରୁପ୍ ପର୍ଯ୍ୟାୟ ମ୍ୟାଚ୍ ରହିଛି। ଘଟଣା ସମ୍ପର୍କରେ କୋହଲି କହିଛନ୍ତି, ୨୦୦୯ ଚମ୍ପିଆନ୍ସ ଟ୍ରଫିରେ ଭାରତ ବିପକ୍ଷରେ ପାକିସ୍ତାନ ୩୦୩ ରନ୍ କରିଥିଲେ। ଏହାର ଜବାବରେ ଭାରତର ଓପନିଂ ଯୋଡି ସଚିନ ତେନ୍ଦୁଲକର ଏବଂ ଗୌତମ ଗମ୍ଭୀର ଭଲ ପ୍ରଦର୍ଶନ କରିବାରେ ବିଫଳ ହୋଇଥିଲେ। ଗମ୍ଭୀର ୫୭ ରନ୍ କରିଥିବା ବେଳେ ତେନ୍ଦୁଲକର ୮ ରନ୍ କରିଥିଲେ। କୋହଲି ୪ର୍ଥ ସ୍ଥାନରେ ବ୍ୟାଟିଂ କରିବାକୁ ଆସିଥିବାରୁ ଚାପରେ ଥିଲେ। ଫଳରେ ମାତ୍ର ୧୬ ରନ୍ କରି ସେ ଆଉଟ୍ ହୋଇଯାଇଥିଲେ। ଏହି ପାଳି ଖେଳିବା ପରେ ତାଙ୍କୁ କ୍ୟାରିୟର ଶେଷ ହୋଇଯିବା ପରି ମନେ ହୋଇଥିଲା। ହାଇ ଭୋଲ୍ଟେଜ୍ ମ୍ୟାଚ୍ରେ ଭଲ ପ୍ରଦର୍ଶନ କରି ପାରି ନ ଥିବାରୁ ତାଙ୍କୁ ସେ ଦିନ ନିଦ ହୋଇ ନ ଥିଲା। ସକାଳ ୫ଟା ଯାଏ ପଙ୍ଖାକୁ ଚାହିଁ ରହିଥିଲେ। ଏବେ ଏହି ଘଟଣାକୁ ୧୧ ବର୍ଷ ବିତିସାରିଛି। ଜୀବନର ନକରାତ୍ମକତା ସହ ଲଢ଼ି ସେ ତିନି ଫର୍ମାଟରେ ଭାରତୀୟ ଦଳର ନେତୃତ୍ୱ ନେଉଛନ୍ତି।