ଭାରତୀୟ ଅଧିନାୟକ ବିରାଟ କୋହଲି ଆଗାମୀ ଜାନୁଆରୀରେ ପିତା ହେବାକୁ ଯାଉଛନ୍ତି। ଏହି ସମୟରେ ଭାରତୀୟ ଦଳ ଅଷ୍ଟ୍ରେଲିଆ ଗସ୍ତରେ ଯାଇଥିବ। ସ୍ତ୍ରୀ ଅନୁଷ୍କାଙ୍କୁ ସମୟ ଦେବା ପାଇଁ କୋହଲି ଗସ୍ତ ମଝିରେ ଭାରତ ଆସିବାକୁ ନିଷ୍ପତ୍ତି ନେଇଛନ୍ତି। କୋହଲି ଅଷ୍ଟ୍ରେଲିଆରେ ୪ ମ୍ୟାଚ୍ ବିଶିଷ୍ଟ ଟେଷ୍ଟ ସିରିଜରେ କେବଳ ଗୋଟିଏ ଟେଷ୍ଟ ଖେଳି ଭାରତକୁ ଫେରିବେ। ଏନେଇ ବିସିସିଆଇ ମଧ୍ୟ ତାଙ୍କୁ ପିତୃତ୍ୱ ଛୁଟିକୁ ମଞ୍ଜୁରୀ ଦେଇଛି। ଏନେଇ ସୋସିଆସିଆଲ ମିଡିଆରେ କୋହଲିଙ୍କ ପ୍ରଶଂସକମାନେ କହିଛନ୍ତି ଯେ, ବର୍ଷର ସବୁଠାରୁ ଗୁରୁତ୍ୱପୂର୍ଣ୍ଣ ସିରିଜ୍ରେ କୋହଲି ଅଧାରୁ ଫେରିବା ଠିକ ନୁହେଁ। ଏଥି ସହ କେହି କେହି କହିଛନ୍ତି ଯେ କୋହଲି ତାଙ୍କ ଦାୟିତ୍ୱରୁ ଦୂରେଇ ଯାଉଛନ୍ତି। କିଛି ପ୍ରଶଂସକ କହିଛନ୍ତି ଯେ ୨୦୧୫ ମସିହାରେ ମହେନ୍ଦ୍ର ସିଂ ଧୋନୀଙ୍କର ମଧ୍ୟ ସମାନ ଅବସ୍ଥା ଥିଲା କିନ୍ତୁ ସେ ଘରକୁ ଫେରି ନ ଥିଲେ। ଧୋନୀ ସେତେବେଳେ ଅଷ୍ଟ୍ରେଲିଆରେ ଥିଲେ ଏବଂ ତାଙ୍କ ସ୍ତ୍ରୀ ସାକ୍ଷୀ ଝିଅ ଜିଭାଙ୍କୁ ଜନ୍ମ ଦେଇଥିଲେ। ଧୋନୀଙ୍କ ଝିଅ ଫେବୃଆରୀ ୬ ରେ ଜନ୍ମ ହୋଇଥିଲେ। ଏହାର ଦୁଇ ଦିନ ପରେ ଭାରତୀୟ ଦଳ ଅଷ୍ଟ୍ରେଲିଆ ବିପକ୍ଷରେ ୱାର୍ମ ଅପ ମ୍ୟାଚ ଖେଳିବାର ଥିଲା। ସେତେବେଳେ ଧୋନୀଙ୍କୁ ଭାରତ ନ ଫେରିବା ନେଇ ପ୍ରଶ୍ନ ମଧ୍ୟ କରାଯାଇଥିଲା। ଏହାର ଜବାବରେ ଧୋନୀ କହିଥିଲେ ମୁଁ ଦେଶର କର୍ତ୍ତବ୍ୟରେ ଅଛି,ବିଶ୍ୱକପ ଅତ୍ୟନ୍ତ ଗୁରୁତ୍ୱପୂର୍ଣ୍ଣ ବୋଲି ସେ କହିଥିଲେ।
ସୂଚନାଯୋଗ୍ୟ, ଜାନୁଆରୀ ପ୍ରଥମ ସପ୍ତାହରେ କୋହଲିଙ୍କ ସ୍ତ୍ରୀ ଅନୁଷ୍କା ଶର୍ମା ପ୍ରଥମ ସନ୍ତାନ ଜନ୍ମଦେବେ। ସୋମବାର ବିସିସିଆଇ ଏହା ନିଶ୍ଚିତ କରିଛି। ଆଡିଲେଡରେ ପ୍ରଥମ ଟେଷ୍ଟ ଖେଳିବା ପରେ କୋହଲି ଭାରତ ଫେରିବେ। ତାଙ୍କ ଯୋଜନା ବିଷୟରେ କୋହଲି ପୂର୍ବରୁ ବୋର୍ଡକୁ ସୂଚନା ଦେଇଥିଲେ। ଏବେ ବିସିସିଆଇ ତାଙ୍କ ପିତୃତ୍ୱ ଛୁଟିକୁ ଅନୁମୋଦନ କରିଛି।
