ଦୁବାଇ,୪।୧୧:: ବିରାଟ କୋହଲିଙ୍କ ନେତୃତ୍ୱରେ ଟିମ ଇଣ୍ଡିଆ ଟି -୨୦ ବିଶ୍ୱକପ୍ର ତୃତୀୟ ମ୍ୟାଚ୍ରେ ଆଫଗାନିସ୍ତାନକୁ ୬୬ ରନ୍ରେ ପରାସ୍ତ କରିଛି। ଏହି ମ୍ୟାଚରେ ଭାରତୀୟ ଦଳର ବ୍ୟାଟ୍ସମ୍ୟାନ ଏବଂ ବୋଲରମାନେ ଚମତ୍କାର ପ୍ରଦର୍ଶନ କରିଥିଲେ। ଏହି ମ୍ୟାଚରେ ଟିମ ଇଣ୍ଡିଆ ଦୁଇଟି ବଡ ପରିବର୍ତ୍ତନ କରିଥିଲା ଏବଂ ଏହି ପଦକ୍ଷେପଟି ଠିକ ଥିଲା। ଫଳରେ ଭାରତ ସହଜରେ ମ୍ୟାଚ୍ ଜିତିଥିଲା।
ଅନେକ ବର୍ଷ ପରେ ପ୍ରଥମ ଥର ପାଇଁ ଅଶ୍ୱିନ ଭାରତ ପାଇଁ ଟି -୨୦ ମ୍ୟାଚ ଖେଳିବାର ସୁଯୋଗ ପାଇଥିଲେ। ତାଙ୍କୁ ପ୍ରଥମ ଦୁଇଟି ମ୍ୟାଚରେ ଅଧିନାୟକ ବିରାଟ କୋହଲି ସୁଯୋଗ ଦେଇ ନ ଥିଲେ, ଯେଉଁ କାରଣରୁ ଦଳକୁ ପରାଜୟର ସମ୍ମୁଖୀନ ହେବାକୁ ପଡିଥିଲା। ଏହି ମ୍ୟାଚରେ ଅଶ୍ୱିନ ଚମତ୍କାର ଭାବେ ବୋଲିଂ କରିଥିଲେ ଏବଂ ୪ ଓଭରରେ ମାତ୍ର ୧୪ ରନ ପାଇଁ ୨ ଗୁରୁତ୍ୱପୂର୍ଣ୍ଣ ଉଇକେଟ ନେଇଥିଲେ। ଅଶ୍ୱିନ ପୁଣି ଥରେ ଦେଖାଇଲେ ଯେ, ସେ ଶ୍ରେଷ୍ଠ ସ୍ପିନ ବୋଲର କାହିଁକି? ଯଦି ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷ ପ୍ରଥମ ଦୁଇଟି ମ୍ୟାଚରେ ଅଶ୍ୱିନଙ୍କୁ ସୁଯୋଗ ଦିଆଯାଇଥାନ୍ତା, ତେବେ ତାଙ୍କ ଫଳାଫଳ ଅଲଗା ହୋଇଥାନ୍ତା। ମ୍ୟାଚ୍ ପରେ କୋହଲି ସ୍ବୀକାର ମଧ୍ୟ କରିଥିଲେ ଯେ, ଅଶ୍ୱିନ ଜଣେ ବିଶ୍ୱସ୍ତରୀୟ ବୋଲର୍।
ଅଶ୍ୱିନଙ୍କ ସ୍ଥାନରେ ବିରାଟ କୋହଲି ବାରମ୍ବାର ବରୁଣ ଚକ୍ରବର୍ତ୍ତୀଙ୍କୁ ସୁଯୋଗ ଦେଉଥିଲେ। ଚକ୍ରବର୍ତ୍ତୀ ଆଇପିଏଲରେ ଭଲ ପ୍ରଦର୍ଶନ କରିଥାଇ ପାରନ୍ତି, କିନ୍ତୁ ବିଶ୍ୱକପ ପରି ଏକ ବଡ଼ ପର୍ଯ୍ୟାୟ ପାଇଁ ତାଙ୍କର ଅଭିଜ୍ଞତା ନ ଥିଲା। ମିଷ୍ଟ୍ରି ସ୍ପିନର ଭାବେ ବିବେଚିତ ଚକ୍ରବର୍ତ୍ତୀ ପ୍ରଥମ ଦୁଇଟି ମ୍ୟାଚ୍ରେ ବିଶେଷ କିଛି କରିନାହାଁନ୍ତି। ବରୁଣ ପାକିସ୍ତାନ ଏବଂ ନ୍ୟୁଜିଲାଣ୍ଡ ବିପକ୍ଷରେ କୌଣସି ଉଇକେଟ ପାଇ ନ ଥିଲେ।