ନୂଆଦିଲ୍ଲୀ,୧୮।୧: ଅନ୍ୟ ଖେଳାଳିଙ୍କ ନେତୃତ୍ୱରେ ଖେଳିବା ପାଇଁ ବିରାଟ କୋହଲିଙ୍କୁ ଅହଂଙ୍କାର ଛାଡ଼ିବାକୁ ପଡ଼ିବ। ପୂର୍ବତନ ଭାରତୀୟ ଅଧିନାୟକଙ୍କୁ ଏଭଳି ପରାମର୍ଶ ଦେଇଛନ୍ତି ୧୯୮୩ ବିଶ୍ୱକପ୍ ଚାମ୍ପିୟନ ଅଧିନାୟକ କପିଳ ଦେବ। ୩୩ ବର୍ଷୀୟ କୋହଲି ଶନିବାର ସନ୍ଧ୍ୟାରେ ହଠାତ୍ ଟେଷ୍ଟ ଅଧିନାୟକ ପଦରୁ ଓହରିବା ନେଇ ଘୋଷଣା କରିଥିଲେ। ଏହି ନିଷ୍ପତ୍ତିକୁ କିମ୍ବଦନ୍ତୀ ଅଲରାଉଣ୍ଡର ସ୍ବାଗତ କରିଛନ୍ତି। କିନ୍ତୁ ନୂଆ ଅଧିନାୟକଙ୍କ ନେତୃତ୍ୱରେ ଖେଳିବାକୁ ହେଲେ ତାଙ୍କୁ ଅହଂକାର ଭୁଲିବାକୁ ପଡ଼ିବ ବୋଲି ସେ କହିଛନ୍ତି।
“ଏପରିକି ସୁନୀଲ ଗାଭାସ୍କର ମୋ ତଳେ ଖେଳିଥିଲେ। ମୁଁ କେ. ଶ୍ରୀକାନ୍ତ ଓ ମହମ୍ମଦ ଆଝାରୁଦ୍ଦିନଙ୍କ ନେତୃତ୍ୱରେ ଖେଳିଥିଲି। ମୋର ଅହଂକାର ନ ଥିଲା, ଏବେ ମଧ୍ୟ ନାହିଁ। ଜଣେ ଯୁବ ନେତୃତ୍ୱରେ ଖେଳିବା ପାଇଁ କୋହଲିଙ୍କୁ ଅହଂକାର ଭୁଲିବାକୁ ପଡ଼ିବ। ଏହା ତାଙ୍କୁ ଓ ଭାରତୀୟ କ୍ରିକେଟକୁ ସାହାଯ୍ୟ କରିବ। ନୂଆ କ୍ୟାପଟେନ ଏବଂ ନୂଆ ଖେଳାଳିଙ୍କୁ କୋହଲି ଗାଇଡ୍ କରିବା ଉଚିତ। ଆମେ କୋହଲିଙ୍କ ଭଳି ବ୍ୟାଟରଙ୍କୁ ହରାଇ ପାରିବା ନାହିଁ। ବର୍ତ୍ତମାନ ସେ ଖରାପ ସମୟ ଦେଇ ଗତି କରୁଛନ୍ତି ଏବଂ ପ୍ରବଳ ଚାପରେ ଥିବା ଜଣାପଡ଼ୁଛନ୍ତି” ବୋଲି ୬୩ ବର୍ଷୀୟ କପିଳ କହିଛନ୍ତି।