ଆବୁଧାବି,୪।୧୧: ଅନେକ ଥର ଭାରତୀୟ ଟିମ୍ର ଓପନର୍ ରୋହିତ ଶର୍ମା ଏବଂ ଅଧିନାୟକ ବିରାଟ କୋହଲିଙ୍କ ଭିତରେ ସବୁକିଛି ଠିକ୍ ଚାଲୁନାହିଁ ବୋଲି ଚର୍ଚ୍ଚା ହୋଇଥାଏ। ଏଯାବତ ତାହା ସ୍ପଷ୍ଟ ହୋଇ ନ ଥିବା ବେଳେ ଆଫଗାନିସ୍ତାନ ବିପକ୍ଷ ମ୍ୟାଚ୍ ପୂର୍ବରୁ କୋହଲିଙ୍କ ପ୍ରଶଂସା କରୁଥିବା ନେଇ ରୋହିତଙ୍କ ଏକ ଭିଡିଓ ଏବେ ଭାଇରାଲ ହେଉଛି।
ଆଇସିସି ପକ୍ଷରୁ ଶେୟାର କରାଯାଇଥିବା ଉକ୍ତ ଭିଡିଓରେ ରୋହିତ କହିଛନ୍ତି, ସଫଳତା ପାଇବାକୁ ନେଇ କୋହଲିଙ୍କ ଭୋକ ଅବିଶ୍ୱାସନୀୟ। ପ୍ରତି ଥର ମଇଦାନରେ ସେ ନିରନ୍ତର ଭାବେ ଭଲ ପ୍ରଦର୍ଶନ କରିବାକୁ ଚାହାନ୍ତି। ହେଲେ ସବୁଥର ତାହା ସମ୍ଭବ ହୋଇ ନ ଥିଲେ ହେଁ ବିରାଟ ତାହା କରିଦେଖାଇଛନ୍ତି। ୨୦୦୮ରେ ସେ ଆସିଥିଲେ। ତା ପରଠାରୁ କ୍ରିକେଟର ଭାବେ ସେ ପରିପକ୍ୱ ହୋଇଛନ୍ତି। ମୁଁ ଭାବୁଛି ସେ ପ୍ରତି ବର୍ଷ ନିଜ ଖେଳରେ କିଛି ନା କିଛି ଶ୍ରେଷ୍ଠ କରିଛନ୍ତି। ପ୍ରତି ବର୍ଷ ସେ ଆହୁରୀ ଭଲ କରି ଦେଖାଇଛନ୍ତି। ବିଗତ ବର୍ଷରେ ସେ ସର୍ବଶ୍ରେଷ୍ଠ ଦେବାକୁ ଚେଷ୍ଟା କରୁଥିବା ଦେଖି ଆସିଛି ବୋଲି ରୋହିତ ଭିଡିଓରେ କହିଛନ୍ତି।