ନୂଆଦିଲ୍ଲୀ, ୨୯।୯: ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲିଙ୍କୁ ଆଇପିଏଲ୍ରେ ଚାମ୍ପିୟନ ଖେଳାଳିଭାବେ ବିବେଚନା କରାଯାଇଥାଏ। କିନ୍ତୁ ଆଇପିଏଲ୍ର ଚଳିତ ତ୍ରୟୋଦଶ ସଂସ୍କରଣର ପ୍ରଥମ ୩ଟି ମ୍ୟାଚ୍କୁ ନଜର ପକାଇଲେ ବିରାଟଙ୍କ ବ୍ୟାଟ୍ ଶାନ୍ତ ରହିଥିବା ଜଣାପଡ଼ିଛି। ସେହିଭଳି ଆଇପିଏଲ୍ ଇତିହାସର ପ୍ରଥମ ୩ଟି ମ୍ୟାଚ୍ ଉପରେ ଯଦି ନଜର ପକାଇବା ତେବେ ବିରାଟଙ୍କ ଏହା ସବୁଠାରୁ ଖରାପ ପ୍ରଦର୍ଶନ।
ଚ୍ୟାଲେଞ୍ଜର୍ସ ବାଙ୍ଗାଲୋର ଅଧିନାୟକ ବିରାଟ ଚଳିତ ସିଜନରେ ସନ୍ରାଇଜର୍ସ ବିପକ୍ଷ ପ୍ରଥମ ମ୍ୟାଚ୍ରେ ମାତ୍ର ୧୪ ରନ୍ କରିପାରିଥିଲେ। ଏହାପରେ କିଙ୍ଗ୍ସ ଇଲେଭେନ ପଞ୍ଜାବ ବିପକ୍ଷରେ ସେ ୧ ରନ୍ କରିବାକୁ ସକ୍ଷମ ହୋଇଥିଲେ। ସେହିଭଳି ସୋମବାର ମୁମ୍ବାଇ ଇଣ୍ଡିଆନ୍ସ ବିପକ୍ଷରେ ଖେଳାଯାଇଥିବା ହାଇଭୋଲ୍ଟେଜ୍ ମୁକାବିଲାରେ କୋହଲି (୩ ରନ୍) ପୁଣିଥରେ ବ୍ୟାଟିଂରେ ବିଫଳ ହୋଇଥିଲେ। ଫଳରେ ଚଳିତ ସିଜନର ପ୍ରଥମ ୩ଟି ମ୍ୟାଚ୍ ଖେଳି ବିରାଟ ମାତ୍ର ୧୮ ରନ୍ ସଂଗ୍ରହ କରିପାରିଛନ୍ତି। ଯଦି ବିରାଟଙ୍କ ୧୨ ବର୍ଷର ଆଇପିଏଲ୍ ଇତିହାସ ଉପରେ ନଜର ପକାଇବା ତେବେ ପ୍ରଥମ ୩ଟି ମ୍ୟାଚ୍ ଦୃଷ୍ଟିରୁ ଏହା ସବୁଠାରୁ ଖରାପ ପ୍ରଦର୍ଶନ। ଏଥିପୂର୍ବରୁ ୨୦୧୦ ସିଜନର ପ୍ରଥମ ୩ଟି ମ୍ୟାଚ୍ରେ ସେ ମାତ୍ର ୩୪ ରନ୍ କରିପାରିଥିଲେ। ଯାହା ଆଇପିଏଲ୍ରେ ତାଙ୍କର ସବୁଠାରୁ ଖରାପ ପ୍ରଦର୍ଶନ ଥିଲା।
ଯଦି ବିରାଟଙ୍କ ଭଲ ପ୍ରଦର୍ଶନ ଉପରେ ନଜର ପକାଇବା ତେବେ ସେ ୨୦୧୬ରେ ପ୍ରଥମ ୩ଟି ମ୍ୟାଚ୍ରେ ୧୮୭ ରନ୍ ସଂଗ୍ରହ କରିଥିଲେ।