ନୂଆଦିଲ୍ଲୀ, ୨୬।୭: କରୋନା ମହାମାରୀ ଲାଗି ଭାରତୀୟ କ୍ରିକେଟ୍ ଦଳର ଅଧିନାୟକ ବିରାଟ କୋହଲି ଏବେ ଅଧିକାଂଶ ସମୟ ଘରେ ସ୍ତ୍ରୀ ତଥା ବଲିଉଡ୍ ଅଭିନେତ୍ରୀ ଅନୁଷ୍କା ଶର୍ମାଙ୍କ ସହ ଏକାଠି ସମୟ ବିତାଇବାର ସୁଯୋଗ ପାଇଛନ୍ତି। ଏହି ଲକ୍ ଡାଉନ ସମୟ ମଧ୍ୟରେ ସେ ଅନୁଷ୍ଖାଙ୍କ ଜନ୍ମଦିନରେ ନିଜେ ଏକ କେକ୍ ପ୍ରସ୍ତୁତ କରିଥିଲେ। ଯାହାକୁ କ୍ୱାରାଣ୍ଟାଇନର ସବୁଠାରୁ ସୁନ୍ଦର ମୁହୂର୍ତ୍ତ ଥିଲା ବୋଲି କୋହଲି ଏକ ସାକ୍ଷାତ୍କାରରେ କହିଛନ୍ତି। ଭାରତୀୟ ଟେଷ୍ଟ ଦଳର ଓପନର୍ ମୟଙ୍କ ଅଗ୍ରଓ୍ବାଲ୍ଙ୍କ ସହ ଶୋ ‘ଓପନ୍ ନେଟ୍ସ ଓ୍ବିଥ୍ ମୟଙ୍କ’ରେ ବାର୍ତ୍ତାଳପ ସମୟରେ କୋହଲିଙ୍କୁ କିଛି ପ୍ରଶ୍ନ ପଚରା ଯାଇଥିଲା। ଯେଉଁଥିରେ କୋହଲିଙ୍କୁ ମୟଙ୍କ ପଚାରିଥିଲେ କ୍ୱାରାଣ୍ଟାଇନର ସବୁଠାରୁ ସୁନ୍ଦର ମୁହୂର୍ତ୍ତ କ’ଣ ଥିଲା। ଏହାର ଉତ୍ତରରେ କୋହଲି କହିଥିଲେ, ‘ମୁଁ ମୋ ଜୀବନରେ ପ୍ରଥମ ଥର ଲାଗି ଏକ କେକ୍ ଅନୁଷ୍କାଙ୍କ ଜନ୍ମଦିନରେ ପ୍ରସ୍ତୁତ କରିଥିଲି। ଯାହାକି କ୍ୱାରାଣ୍ଟାଇନରେ ମୋ ଲାଗି ସବୁଠାରୁ ସ୍ମରଣୀୟ ମୁହୂର୍ତ୍ତ ଥିଲା, କାହିଁକି ନା ପୂର୍ବରୁ ମୁଁ କେବେ କେକ୍ ତିଆରି କରି ନ ଥିଲି।’ ପ୍ରଥମ ପ୍ରୟାସରେ ଏହା ବହୁତ ଭଲ ହୋଇଥିଲା। ଅନୁଷ୍କା ମୋତେ କହିଥିଲେ ଯେ ସେ କେକ୍କୁ ଭଲ ପାଆନ୍ତି। ଯାହା ବହୁତ ସ୍ବତନ୍ତ୍ର ଥିଲା ବୋଲି କୋହଲି ଆହୁରି ମଧ୍ୟ କହିଛନ୍ତି। ଏଥିପୂର୍ବରୁ ଗତ ଏପ୍ରିଲରେ ଇଂଲଣ୍ଡର ପୂର୍ବତନ କ୍ରିକେଟର୍ କେଭିନ୍ ପିଟରସନଙ୍କ ସହ ଇନ୍ଷ୍ଟାଗ୍ରାମରେ ଏକ ଚାର୍ଟ ଅବସରରେ କୋହଲି କହିଥିଲେ, ସେ ଲକ୍ ଡାଉନ୍ ସମୟରେ ଘରେ ସ୍ତ୍ରୀଙ୍କ ସହ ଏକାଠି ସମୟ ଅତିବାହିତ କରୁଛନ୍ତି।