ଚେନ୍ନାଇ, ୧୦ା୨- ଇଂଲଣ୍ଡ ବିପକ୍ଷ ପ୍ରଥମ ଟେଷ୍ଟରେ ବୃହତ୍ ପରାଜୟ ବରଣ କରିଛି ବିରାଟ କୋହଲିଙ୍କ ନେତୃତ୍ୱାଧୀନ ଭାରତୀୟ ଦଳ। ଅଷ୍ଟ୍ରେଲିଆ ବିପକ୍ଷ ପ୍ରଥମ ଟେଷ୍ଟରେ ଟିମ୍ ଇଣ୍ଡିଆର ଅବସ୍ଥା କ’ଣ ହୋଇଥିଲା, ତାହା ସଭିଙ୍କୁ ଜଣା। ସେତେବେଳେ ଭାରତୀୟ ଦଳର ଅଧିନାୟକ ଥିଲେ କୋହଲି। ତାଙ୍କ ନେତୃତ୍ୱରେ ଭାରତୀୟ ଦଳ ତା’ର ଅନ୍ତିମ ୪ ଟେଷ୍ଟରେ ପରାସ୍ତ ହୋଇଛି। ଏହି ଧାରା ନ ଭାଙ୍ଗିଲେ କୋହଲି ଏକ ବଡ଼ ନିଷ୍ପତ୍ତି ନେଇପାରନ୍ତି। ଏମିତି କିଛି ଆକଳନ କରିଛନ୍ତି ପୂର୍ବତନ ଇଂଲଣ୍ଡ ଖେଳାଳି ମଣ୍ଟି ପାନେସର।
”କୋହଲି ସର୍ବକାଳୀନ ଶ୍ରେଷ୍ଠ ବ୍ୟାଟ୍ସମ୍ୟାନ। କିନ୍ତୁ ତାଙ୍କ ନେତୃତ୍ୱରେ ଦଳ ଭଲ ପ୍ରଦର୍ଶନ କରିପାରୁ ନାହିଁ। ସେ କ୍ୟାକଟେନ ଥିବାବେଳେ ଦଳ ଖେଳିଥିବା ଅନ୍ତିମ ୪ ମ୍ୟାଚ୍ର ଫଳାଫଳ ତାହା ସ୍ପଷ୍ଟ କରୁଛି। ପରବର୍ତ୍ତୀ ମ୍ୟାଚ୍ରେ କୋହଲି ଅଧିକ ଚାପର ସମ୍ମୁଖୀନ ହେବେ। କାରଣ ଅଜିଙ୍କ୍ୟ ରାହାନେ ଅଧିନାୟକ ଭାବେ ଭଲ ପ୍ରଦର୍ଶନ କରୁଛନ୍ତି। ଯଦି ୫ମ ମ୍ୟାଚ୍ରେ ଦଳକୁ ପରାଜୟର ମୁହଁ ଦେଖିବାକୁ ପଡ଼େ, ତେବେ ମୁଁ ଭାବୁଛି କୋହଲି ଭାରତୀୟ ଦଳର ଅଧିନାୟକ ପଦରୁ ଓହରିଯିବେ ବୋଲି ପାନେସର ଏକ ସାକ୍ଷାତ୍କାରରେ କହିଛନ୍ତି। ଉଲ୍ଲେଖଥାଉ କି, ଅଷ୍ଟ୍ରେଲିଆ ଗସ୍ତ ପୂର୍ବରୁ ଭାରତୀୟ ଦଳ ନ୍ୟୁଜିଲାଣ୍ଡ ଗସ୍ତରେ ଯାଇ ଦୁଇଟିକିଆ ଟେଷ୍ଟ ମ୍ୟାଚ୍ ସିରିଜ୍ ଖେଳିଥିଲା। ଏହି ସିରିଜ୍ର ଉଭୟ ମ୍ୟାଚ୍ରେ ବିରାଟବାହିନୀକୁ ପରାଜୟର ମୁହଁ ଦେଖିବାକୁ ପଡ଼ିଥିଲା।