କୋଲକାତା,୭।୧୨ : ଆଇସିସି ଟି -୨୦ ବିଶ୍ୱକପ ୨୦୨୪ ପୂର୍ବରୁ ବିରାଟ କୋହଲି ବିଶ୍ୱକପ ଦଳରୁ ଓହରିଯିବାର ଆଶଙ୍କା ରହିଛି। ବିସିସିଆଇର ଏଭଳି ନିଷ୍ପତ୍ତି ପ୍ରଶଂସକଙ୍କୁ ଆଶ୍ଚର୍ଯ୍ୟ କରିଛି। ବିସିସିଆଇ ସ୍ପଷ୍ଟ କରିଛି ଯେ ଟି -୨୦ ବିଶ୍ୱକପରେ ତିନି ନମ୍ବରରେ ବ୍ୟାଟିଂ କରିବା ବିରାଟ କୋହଲି ପ୍ରଥମ ବିକଳ୍ପ ନୁହଁନ୍ତି। କୋହଲିଙ୍କ ଉତ୍ତରାଧିକାରୀ ଭାବରେ ଜଣେ ଯୁବ ବ୍ୟାଟ୍ସମ୍ୟାନ ଚୟନ କରାଯିବ। ଏହା ସହିତ ବିସିସିଆଇ ଏହା ମଧ୍ୟ ସ୍ପଷ୍ଟ କରିଛି ଯଦି ରୋହିତ ଶର୍ମା ଟି -୨୦ରେ ଅଧିନାୟକତ୍ୱ ପାଇଁ ରାଜି ହୁଅନ୍ତି, ତେବେ କେବଳ ରୋହିତ ଦଳର ନେତୃତ୍ୱ ନେବେ।
ଆସନ୍ତା ବର୍ଷ ଜୁନ ମାସରେ ଟି -୨୦ ବିଶ୍ୱକପ ଖେଳାଯିବ। ଏହି ବିଶ୍ୱକପ୍ରେ ବିରାଟ କୋହଲି ଏବଂ ରୋହିତ ଶର୍ମାଙ୍କ ଖେଳକୁ ନେଇ ନିରନ୍ତର ସନ୍ଦେହ ରହିଛି। ଦକ୍ଷିଣ ଆଫ୍ରିକା ଗସ୍ତ ପୂର୍ବରୁ କୋହଲି ନିଜେ ବିସିସିଆଇକୁ ହ୍ବାଇଟ ବଲ କ୍ରିକେଟରୁ ବିରତି ମାଗିଥିଲେ, ବର୍ତ୍ତମାନ କୋହଲିଙ୍କ ବିଶ୍ୱକପରେ ଖେଳିବା ସଙ୍କଟରେ ଅଛି। ବିସିସିଆଇ ସୂତ୍ରରୁ ପ୍ରକାଶ ଯଦି ବିରାଟ କୋହଲି ନିଜେ ଟି -୨୦ ବିଶ୍ୱକପରୁ ବିରତି ନିଅନ୍ତି, ତେବେ ଆମର କୌଣସି ଆପତ୍ତି ହେବ ନାହିଁ। ଯଦି କୋହଲି ନିଜେ ଏହା ଘୋଷଣା କରନ୍ତି ନାହିଁ, ତେବେ ଆମେ କୋହଲିଙ୍କ ସହ କଥା ହେବୁ ଏବଂ ଟି -୨୦ ରେ ଖେଳିବା ବିଷୟରେ ଆଲୋଚନା କରିବୁ।
ବିସିସିଆଇ ଆହୁରି ମଧ୍ୟ କହିଛି ଟି -୨୦ ବିଶ୍ୱକପରେ ୨ ନମ୍ବରରେ ଖେଳିବା କୋହଲି ପ୍ରଥମ ପସନ୍ଦ ନୁହନ୍ତି। ବିସିସିଆଇ ପାଇଁ ପ୍ରଥମ ପସନ୍ଦ ହେଉଛନ୍ତି ବିସ୍ଫୋରକ ବ୍ୟାଟ୍ସମ୍ୟାନ ଇଶାନ କିଶାନ। ଏଭଳି ପରିସ୍ଥିତିରେ କୋହଲିଙ୍କୁ ଟି -୨୦ ବିଶ୍ୱକପରେ ନ ଖେଳିବାର ଆଶଙ୍କା ଅଛି । ବିସିସିଆଇ ଏହା ମଧ୍ୟ କହିଛି ଆମେ ରୋହିତ ଶର୍ମାଙ୍କୁ ଟି -୨୦ ବିଶ୍ୱକପରେ ଅଧିନାୟକ ହେବା ପାଇଁ ଅନୁରୋଧ କରୁଛୁ। ଏଥିରୁ ଏହା ମଧ୍ୟ ସ୍ପଷ୍ଟ ହୋଇଛି ବିସିସିଆଇ ରୋହିତ ଶର୍ମାଙ୍କୁ ଦଳରେ ରଖିବାକୁ ଚାହୁଁଛି, କିନ୍ତୁ ବିରାଟ କୋହଲିଙ୍କୁ ରଖିବାକୁ ଚାହୁଁନାହିଁ। ଏଭଳି ପରିସ୍ଥିତିରେ ବିରାଟଙ୍କୁ ବିଶ୍ୱକପରେ ଖେଳାଯିବ କି ନାହିଁ ସେ ନେଇ କଳ୍ପନାଜଳ୍ପନା ଜାରି ରହିଛି।